تيمۋر قۇلىباەۆ ۇلتتىق وليمپيادا كوميتەتتەرى قاۋىمداستىعىنىڭ اتقارۋ كوميتەتىنىڭ قۇرامىنا قايتا سايلاندى. ونىڭ كانديداتۋراسىن ازيا وليمپيادا كەڭەسى تانىستىردى.

ۇلتتىق وليمپيادا كوميتەتتەرى قاۋىمداستىعىنىڭ اتقارۋ كوميتەتى ۇيىمنىڭ باسشىلىق ورگانى بولىپ سانالادى. وعان ۇلتتىق وليمپيادا كوميتەتتەرىنىڭ 32 وكىلى، قاۋىمداستىق پرەزيدەنتى مەن اعا ورىنباسارى، باس حاتشىسى، دۇنيەجۇزىلىك وليمپيادا قوزعالىسىنىڭ بەلسەندى وكىلدەرى دە مۇشە.

تيمۋر قۇلىباەۆ 2015 جىلدان بەرى كونتينەنتالدىق قاۋىمداستىقتىڭ ۆيتسە-پرەزيدەنتى، حالىقارالىق وليمپيادا كوميتەتىنىڭ قوعاممەن بايلانىس جانە سپورت ارقىلى قوعامدى دامىتۋ كوميسسياسىنىڭ مۇشەسى.

2022 جىلى قىركۇيەكتە تيمۋر قۇلىباەۆ حالىقارالىق وليمپيادا كوميتەتىنىڭ "وليمپيزم 365" كوميسسياسىنىڭ قۇرامىنا ەنگەن. اتالعان كوميسسيا بۇۇ-نىڭ تۇراقتى دامۋ سالاسىندا قويعان ماقساتتارىنا جەتۋدە سپورتتىڭ ءرولىن ارتتىرۋ شارالارىمەن اينالىسادى.

تيمۋر قۇلىباەۆ سونىمەن بىرگە قازاقستان ۇلتتىق وليمپيادا كوميتەتىنە دە جەتەكشىلىك ەتەدى.

Abai.kz