ازەربايجاننىڭ شۋشا قالاسىندا تۇركى مەملەكەتتەرى ۇيىمى مۇفتيلەر كەڭەسىنىڭ ەرەجەسى بەكىتىلىپ، ءدىن باسشىلارى قول قويۋ ءراسىمىن وتكىزدى. كەڭەس اياسىندا بىرلەسكەن دەكلاراتسيا قابىلداندى. جيىندا ءسوز العان قمدب توراعاسى، باس ءمۇفتي شۋشاداعى تاريحي باسقوسۋدىڭ ماڭىزىنا توقتالدى.

«قادىرلى باۋىرلار! بۇگىن وزدەرىڭىزبەن بىرگە تۇركى مەملەكەتتەرى ۇيىمىنا مۇشە ەلدەردىڭ مۇسىلماندار باسقارمالارىنىڭ باسشىلارى وسى قالادا ەرەجەنى بەكىتىپ، قول قويىلدى. ەندى تۇركى مەملەكەتتەرى مۇفتيلەرى وسى ەرەجە اياسىندا بىرىگىپ ءىس قىلادى. ءبىز بۇعان دەيىن تۇركيانىڭ ستامبۇل، قازاقستاننىڭ رۋحاني استاناسى تۇركىستان قالاسىندا باس قوستىق. جيىندا تۇركى ەلدەرىنىڭ جۇمىس جوسپارى تالقىلاندى. بۇگىنگى ازەربايجان جەرىندەگى ءۇشىنشى وتىرىستا كەڭەستىڭ ەرەجەسى تولىق بەكىتىلدى. باستاماعا قولداۋ كورسەتكەن بارشاڭىزعا اللا رازى بولسىن! ەرەجە اياسىندا الداعى ۋاقىتتا بىرقاتار ءىرى جوبالار، ءدىني تەرىس اعىممەن كۇرەس، تاريحي قۇندىلىقتاردى تۇگەندەۋ، عۇلامالار كەڭەسىنىڭ جيىنىن وتكىزۋ، بابالار جولىن جاڭعىرتۋ جۇمىستارى كۇتىپ تۇر. سوندىقتان كەڭەس جۇمىسىنا تابىس تىلەيمىن»، – دەدى باس ءمۇفتي.

كەڭەس ەرەجەسىندە نەگىزىنەن تۇركى دۇنيەسىنە ورتاق قۇندىلىقتاردى دارىپتەۋ، وتباسى، سالت-ءداستۇر، تۇركى ەلدەرىنەن شىققان ءدىن قايراتكەرلەرىن ناسيحاتتاۋ، جات اعىممەن كۇرەس، بىرلەسە سيمپوزيۋم مەن كونفەرەنتسيالار ۇيىمداستىرۋ، ءدىني ادەبيەتتەر مەن تۇركى تىلدەرىندە تاراعان شىعارمالاردى تانىتۋ، عۇلامالار كەڭەسىنىڭ جۇمىسىن وتكىزۋ سىندى ماسەلەلەر قامتىلعان.

Abai.kz