چەح جۇرتى مىنا جاھاندانۋ زامانىندا، ەۋروپا حالقى اراسىندا شەكارا جويىلعاندا ءبىزدى چەح قىلىپ تۇرعان چەح ءتىلى دەپ بىلەدى. ەلدە قىزمەتتىڭ ءبارى چەح تىلىندە جۇرەدى، شەتەلدىكتەرگە ارنالعان پوليتسيا بولىمشەسىندە "مۇندا تەك چەح تىلىندە قىزمەت كورسەتىلەدى" دەپ جازىلعان تاقتايشا تۇرادى. شەتەلدىكتەرگە ارنالعان پوليتسيا بولىمشەسىنە، چەحياعا ەندى كەلگەنىمدە وسى بولىمشەگە چەح ءتىلىن بىلەتىن قازاق تانىسىمدى اپارعان ەدىم. پوليتسيادا سەنىڭ چەحياعا كەشە كوشىپ كەلگەنىڭە ءمان بەرمەيدى دە. چەحشا سويلەيدى. اعىلشىنشا سويلەسەڭ قىزمەت كورسەتكىسى كەلمەي، چەحشا جاۋاپ بەرەدى.

ءۇش جىلدان كەيىن وسى پوليتسيا بولىمشەسىنە بارىپ، قازاقستاننان كەلەتىن قوناقتارىما ۆيزاعا شاقىرتۋ جاساتپاق بولعانىمدا، سونداعى ءبىر پوليتسەي:

–  ۇش جىل تۇرىپ جاتىرسىز، قالاي چەحشا بىلمەيسىز؟ - دەپ قاباق شىتقانى ءالى ەستە.

كەيىن چەح تانىسىمنىڭ بىرىنەن:

– نەگە چەح ورگاندارى شەتەلدىكتەرگە چەح تىلىندە سويلەۋدى تالاپ ەتەدى؟- دەپ سۇراعانىمدا،

– ءبىزدى چەح ەتىپ تۇرعان ءتىلىمىز بەن Skoda كولىگى ەدى، Skoda نەمىستەردىڭ قولىنا كەتتى، ەندى ءبىزدى ۇلت رەتىندە ساقتاپ تۇرعان تىلدەن باسقا نەمىز قالدى؟- دەپ كۇلگەن.

بۇعان قوسا، تۇراقتى تۇرۋعا رۇقسات (پمج) الۋ ءۇشىن چەح ءتىلىن A2 دەڭگەيىندە ءبىلۋ شارت. پمج الۋعا چەح تىلىنەن ءبىرىنشى تەست تاپسىرۋ شىعىنى مەملەكەت ەسەبىنەن. ءبىرىنشى تەستەن A2 دەڭگەيىن الا الماساڭىز 2-3 رەت تاپسىرۋ اقىلى.

تاعى ءبىر ءتىل ساقتاۋعا دەگەن ەڭ ۇلكەن جوباسى - گرانت. چەح ءتىلىن بىلگەن كەز كەلگەن شەتەلدىك چەحيادا گرانتتا وقي الادى. چەح ءتىلىن مەڭگەرگەن شەتەلدىك گرانتقا كونكۋرسقا تۇسەردە چەحيا ازاماتتارىمەن تەڭ قۇقىققا يە. مىنە، 11 ميلليونعا جەتەر جەتپەس چەح حالقىنىڭ جانى چەح تىلىندە. جانىن قورعاۋ ءۇشىن كەيدە كۇشكە دە سالادى. سەبەبى چەح حالقى جانىنىڭ ء(تىلىنىڭ) جابىرقاعانىن قالامايدى.

رۋسلان مەدەلبەك

Abai.kz