ەسىم-سويلارى ەلىمىزگە بەلگىلى قالامگەرلەر، زيالى قاۋىم وكىلدەرى مەن مادەنيەت مايتالماندارى ەكس-مادەنيەت ءمينيسترى ارىستانبەك مۇحامەديۇلىنىڭ ءىسىن تەرگەۋدى باقىلاۋعا الۋدى سۇراپ، قاسىم-جومارت توقاەۆقا حات جولدادى.  ەكس-مينيستر ارىستانبەك مۇحامەديۇلىنا اراشا سۇراعان حاتتىڭ ءماتىنى Abai.kz پورتالىنىڭ رەداكتسياسىنا دا جولدانىپتى.      

قازاقستان رەسپۋبليكاسىنىڭ
    پرەزيدەنتى ق. ك. توقاەۆقا

قۇرمەتتى قاسىم-جومارت كەمەلۇلى!

ءسىز كوتەرگەن «جاڭا قازاقستان» يدەياسى اۋقىمدى رەفورمالار مەن وڭ وزگەرىستەرگە نەگىز سالىپ، تىڭ مۇمكىندىكتەر مەن زاماناۋي ۇردىستەرگە جول اشتى. جارقىن بولاشاق قۇرۋداعى جاسامپاز جوسپارلار مەن كەشەندى باعدارلامالار ايقىندالدى.

ادىلەتتى مەملەكەت قۇرۋ كەزەڭىندەگى قازاقستاننىڭ بۇگىنگى جاعدايىندا ءسىزدىڭ حالىققا ارناعان جولداۋىڭىزدىڭ تاريحي ماڭىزى وزگەشە. ونى «ادىلەتتى مەملەكەت. ءبىرتۇتاس ۇلت. بەرەكەلى قوعام» دەگەن اتى دا انىقتاپ تۇر. وسى كيەلى ءۇش ۇعىم – كۇللى حالىقتىڭ كوكەيىندەگى ويى ەكەنى راس! ەل الدىندا تاعى ءبىر ۇلكەن سىندارلى سىناق تۇر. بۇل جولعى پرەزيدەنت سايلاۋىنا حالىق ايرىقشا بەلسەندىلىكپەن قاتىسۋعا نيەت ەتىپ وتىر. سارا جول مەن دارا جولدى ايشىقتاپ بەرگەن ءسىز ءۇشىن داۋىس بەرىپ، سەنىم بىلدىرەتىنىمىزدى ايتا وتىرىپ،   بىرقاتار مادەنيەت جانە ونەر قايراتكەرلەرى اتىنان وزىڭىزدەن اراشا سۇراپ، حات جولداۋدى ءجون كوردىك. وزىڭىزگە ءمالىم، ەلىمىزدىڭ مادەنيەت جانە سپورت سالاسىن باسقارعان ەكس-مينيستر ارىستانبەك مۇحامەديۇلى «التىن ادامنىڭ الەم مۋزەيلەرىنە شەرۋى» حالىقارالىق كورمەسى بويىنشا تەرگەلۋ ۇستىندە.  بۇل ءىس – ءبىزدى، ياعني، مادەنيەت سالاسىنىڭ وكىلدەرىن قاتتى الاڭداتادى.

جاستايىنان ونەر مەن بىلىمگە قۇشتار بولىپ،  ەڭبەكقورلىعىمەن تانىلعان ارىستانبەك  قازاق حالقىنىڭ ونەرى مەن مادەنيەتى ءۇشىن ەرەن ەڭبەك سىڭىرگەن ۇلتجاندى تۇلعا.

قاراپايىم وتباسىندا ومىرگە كەلىپ، ءوز كۇشىمەن بيىككە كوتەرىلگەن ول قانشاما دارىندى جاستاردى قولداپ، قامقورلىق كورسەتتى.

ول – ونەردىڭ دامۋىن قالادى، مادەنيەت كوشىنىڭ العا جىلجۋىن ماقسات ەتتى، تاريحتىڭ تىنىسىن اشىپ، بولاشاق ەنشىسىنە ۇلى مۇرالار اماناتىن قالدىرۋدى ارماندادى. ونەردىڭ كوكجيەگىن كەڭەيتىپ قانا قويماي، سپورتتىڭ دامۋىنا دا ەرەكشە دەن قويدى.

ول – مادەنيەت پەن سپورتتى باسقارعان جىلدارى قازاق ەلىنىڭ قورجىنىن جەمىس پەن جەڭىسكە تولتىردى. ءوزى دە سپورتتى جانىنا سەرىك ەتتى. كوپكە ۇلگى بولۋعا تىرىستى جانە ول قاسيەتىن اسىرا دالەلدەدى دە.

ارىستانبەك مۇحامەديۇلىنىڭ باسقا يگى ىستەرىنەن بولەك، ونىڭ تىكەلەي باستاماسىمەن قازاقستان تاريحىندا العاش رەت «كينەماتوگرافيا تۋرالى»، «تاريحي، مادەني مۇرالاردى ساقتاۋ تۋرالى» زاڭدار قابىلداندى. ءار جىل سايىن شىلدەنىڭ ءبىرىنشى جەكسەنبىسىندە اتالىپ ءوتىپ جاتقان «ۇلتتىق دومبىرا» كۇنى دە - ارىستانبەك مۇحامەديۇلىنىڭ تىكەلەي قولتاڭباسى.

ۇلتىم، جۇرتىم، ونەرىم دەپ ىشكەن اسىن جەرگە قويعان ازاماتتان ەلدىڭ قارجىسىنا قول سالاتىن ارسىز قىلىق شىقپايتىنىنا قارت جۇرەگىمىز سەنىمدى.

ول – پاراساتتى وتباسىنىڭ پەرزەنتى، قاناعاتشىل اتا-انانىڭ ۇلى، ەڭبەگى مەن ونەرىنە رياسىز اق باتامىزدى بەرگەن ءبىزدىڭ شاكىرتىمىز، ەلدىڭ بالاسى.

ءوز جولىمەن كەلە جاتقان ازاماتىنا جاسالعان جالا قايتا تۇزەلىپ، شىندىقتىڭ بەتى اشىلىپ، جاقسىلىقتىڭ جىلى تاڭى اتارىنا  سەنگىمىز كەلەدى.

جازا – جالانىڭ ەمەس، شىندىقتىڭ كەسىمى بولۋى ءتيىس!

ءبىزدىڭ دە سىزدەن سۇرارىمىز شىنايىلىق پەن ادالدىق قانا. كوز الدىمىزدا ءوسىپ، ەلىمىزگە ەرەن ەڭبەك ەتىپ، قاشاندا جان-جاقتىلىق پەن ىزدەنىمپازدىقتى كوكسەگەن ازاماتتار جاڭا قازاقستان ءۇشىن دە ماڭىزدى.

بۇل رەتتە، ەلدىڭ رۋحاني بايلىعىن، بولاشاعىن ويلاپ، مينيستر دارەجەسىنە كوتەرىلسە دە قاراپايىمدىلىعىنان تانباعان ا. مۇحامەديۇلىنىڭ ىسىنە بۇرمالاۋشىلىقپەن قيانات جاساماي تۋرالىق تانىتۋعا، ادىلدىك پەن شىندىققا تىكە قاراۋعا ىقپال ەتۋىڭىزدى سۇرايمىز.

قازاق حالقىنىڭ ۇلتتىق سيپاتىن ەرەكشەلەيتىن حالىقارالىق بىرەگەي باعىتتاعى ناقتى باعدارلاماسى بار.

نەگە ەل رۋحىن اسقاقتاتاتىن ايرىقشا جوسپارلارعا جول بەرمەي، ەل ءۇشىن قىزمەت ىستەۋگە توسقاۋىل بولىپ، تاس قامالدا ۇستاۋىمىز كەرەك؟

ارىستانبەك مۇحامەديۇلىنىڭ سوت الدىنداعى ءىسى ءادىل شەشىمىن تاۋىپ، كىناسىزدىگى دالەلدەنۋىن تالاپ ەتەمىز!

سوتتىڭ ءادىل بولۋىن سۇرايمىز!

قۇرمەتتى قاسىم-جومارت كەمەلۇلى!

ءوزىڭىز ايتقانداي،  ءبىز كۇن سايىن ەسكى مەن جاڭانىڭ، توقىراۋ مەن دامۋدىڭ اراسىنان تاڭداۋ جاسايمىز. ۇلت مۇددەسى ءۇشىن ۇيىسۋعا شاقىرعان باستاماڭىزدى تولىقتاي قولدايمىز! راسىندا دا ءبارىمىز بىرلىگىمىزدى بەكەمدەي بىلسەك، ەشقاشان ادىلدىكتەن اتتاماساق، بەرەكەلى ەل بولاتىنىمىز انىق!

تورەگەلدى شارمانوۆ

دۇنيەجۇزىلىك دەنساۋلىق ساقتاۋ ۇيىمىنىڭ ەڭ جوعارعى ناگراداسى «لەون بەرنارد» اتىنداعى مەدالدىڭ يەگەرى، «قازاقستاننىڭ ەڭبەك ەرى»، قازاق تاعامتانۋ اكادەمياسىنىڭ پرەزيدەنتى، رەسەي عىلىم اكادەمياسىنىڭ جانە قازاقستان رەسپۋبليكاسى ۇلتتىق عىلىم اكادەمياسىنىڭ اكادەميگى، مەديتسينا عىلىمدارىنىڭ دوكتورى، پروفەسسور;

بيبىگۇل تولەگەنوۆا

كسرو حالىق ءارتىسى، سوتسياليستىك ەڭبەك ەرى، كسرو جانە قازاقستاننىڭ مەملەكەتتىك سىيلىعىنىڭ لاۋرەاتى;

ءسابيت دوسانوۆ

قر مەملەكەتتىك سىيلىقتىڭ يەگەرى، جازۋشى، دراماتۋرگ، سىنشى، قر ەڭبەك سىڭىرگەن قايراتكەرى، «پاراسات» وردەنىنىڭ يەگەرى، م.شولوحوۆ اتىنداعى حالىقارالىق سىيلىقتىڭ لاۋرەاتى، رەسەي پەداگوگيكا جانە الەۋمەتتىك عىلىمدار اكادەمياسىنىڭ اكادەميگى;

مۇحتار شاحانوۆ

قازاقستاننىڭ حالىق جازۋشىسى، «قازاقستاننىڭ ەڭبەك ەرى»، «تۇركى تىلدەس حالىقتار اراسىنداعى ەڭ ۇزدىك الەم اقىنى»;  

ءاسانالى ءاشىموۆ

قازاقستان جانە كسرو حالىق ءارتيسى، مەملەكەتتىك سىيلىقتاردىڭ لاۋرەاتى، «قازاقستاننىڭ ەڭبەك ەرى»;

پەرنەبەك مومىنوۆ

مۋزىكا زەرتتەۋشىسى، ونەرتانۋشى، قازاقستاننىڭ ەڭبەك سىڭىرگەن قايراتكەرى، قازاق ۇلتتىق ونەر اكادەمياسىنىڭ پروفەسسورى، پەداگوگيكا عىلىمدارىنىڭ كانديداتى;

داريعا تۇرانقۇلوۆا

ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ پروفەسسورى، قازاقستاننىڭ ەڭبەك سىڭىرگەن قايراتكەرى قازاقستان ءبىلىم بەرۋ ءىسىنىڭ قۇرمەتتى قىزىمەتكەرى;

امان قۇلباەۆ

ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ پروفەسسورى،  قازاقستاننىڭ ەڭبەك سىڭىرگەن قايراتكەرى، ونەرتانۋ كانديداتى;

گۇلدانا ساپارعاليەۆا

 ت. جۇرگەنوۆ اتىنداعى قازاق ۇلتتىق ونەر اكادەمياسىنىڭ جەكە ءان ورىنداۋ كافەدراسىنىڭ ءپروفوسسورى، قازاقستاننىڭ ەڭبەك سىڭىرگەن قايراتكەرى;

دالەل ءۋاش

ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ پروفەسسورى،  قازاقستاننىڭ ەڭبەك سىڭىرگەن قايراتكەرى،  حالىقارالىق كونكۋرستاردىڭ لاۋرەاتى

داريكو حاسانعاليەۆا

«شاپاعات مەدالىنىڭ يەگەرلەرى»، «قۇرمەت وردەنىنىڭ يەگەرلەرى»، كسرو دەنساۋلىق ساقتاۋ سالاسىنىڭ ۇزدىگى;

حاسەن سماگۋلوۆ

قر ەڭبەك سىڭىرگەن قايراتكەرى.

Abai.kz