قازاقستانعا 300 مىڭ دوللاردان استام ينۆەستيتسيا قۇيعان شەتەلدىكتەرگە ەلدە تۇرۋعا ىقتيارحات بەرىلۋى مۇمكىن. بۇل تۋرالى قر پرەمەر-ءمينيسترىنىڭ ورىنباسارى – ساۋدا جانە ينتەگراتسيا ءمينيسترى سەرىك جۇمانعارين مالىمدەدى.

"قازاقستان رەسپۋبليكاسى پرەزيدەنتىنىڭ 2022 جىلعى 1 قىركۇيەكتەگى جولداۋىنا سايكەس قازاقستان ەكونوميكاسىنا 300 مىڭ دوللاردان استام ينۆەستيتسيا قۇيعان شەتەلدىك بيزنەسمەندەرگە ەلدە تۇرۋعا ىقتيارحات الۋ قۇقىعىمەن قوسا، 10 جىلعا ۆيزا الۋ مۇمكىندىگىن بەرۋگە باعىتتالعان زاڭ جوباسىن ازىرلەۋ بويىنشا جۇمىس جۇرگىزىلۋدە", - دەدى ول.

ونىڭ ايتۋىنشا، ەڭ الدىمەن جۇمىس ىستەپ تۇرعان كاسىپورىنداردىڭ نەگىزگى كاپيتالىنا بولىنگەن ينۆەستيتسيا، قۇنى جوعارى ونىمدەردىڭ ونەركاسىپتىك ءوندىرىسىن قۇرۋ، جاڭا تەحنولوگيالار مەن قىزمەتتەر كورسەتۋ ەسكەرىلەتىن بولادى.

"ياعني، قازاقستان ەكونوميكاسى ءۇشىن مۋلتيپليكاتيۆتىك ناتيجە بەرەتىن ينۆەستيتسيالار (سالىق تۇسىمدەرى تۇرىندەگى بيۋدجەتكە قوسىمشا قارجىلىق تۇسىمدەر، جاڭا جۇمىس ورىندارىن قۇرۋ جانە ت.ب.)", - دەپ ءتۇسىندىردى مينيستر.

Abai.kz