اقىن، قوعام قايراتكەرى اۋىت مۇقيبەك پارتيا قۇراتىنىن مالىمدەدى. بۇل تۋرالى ءوزىنىڭ Facebook پاراقشاسىندا جاريالادى. 

"بۇگىن «Qazaq Armany» دەگەن جاڭا ساياسي پارتيا قۇرۋ تۋرالى شەشىم قابىلدادىم!

ارداقتى الاش جۇرتى! قۇرمەتتى ۇلى كوشكە مۇددەلى قاۋىم!

سىزدەردى قايتا جاڭعىرتىلعان «رەسپۋبليكا كۇنى» مەرەكەسىمەن شىن جۇرەكتەن قۇتتىقتايمىن.

بۇگىن – مەنىڭ تاريحي وتانىم قازاقستان رەسپۋبليكاسىنا ورالعانىما 24 جىل! 1998 جىلى 24 قازاندا جەزدەم دەمەۋحان باقىتنۇر مەن ورازحان گۇلباداننىڭ شاقىرۋىمەن قاسيەتتى قازاقستان توپىراعىنا تۇڭعىش رەت تابانىم تيگەن بولاتىن.

سول 24 جىلدىڭ العاشقى ون ەكى جىلى الماتىدا، قازاقتىڭ اسا كورنەكتى اقىنى تۇمانباي مولداعاليەۆتىڭ جانىندا ءوتتى.

ال، سوڭعى ون ەكى جىلدا استانادا، اقوردانىڭ تۇبىندە كوشى-قون ساياساتىمەن تىنباي اينالىسىپ، اتالعان سالاعا قاتىستى زاڭدار مەن نورماتيۆتىك قۇجاتتاردى ۋاقىت تالابىنا ساي جەتىلدىرە تۇسۋگە بارىمدى سالىپ كەلەمىن.

كوشى-قون – تۇڭعىش پرەزيدەنت نۇرسۇلتان نازارباەۆ تاۋەلسىزدىكتىڭ تاڭى اتار-اتپاس، ەلەڭ-الاڭ شاقتان باستاپ نەگىزىن قالاعان; قازىرگى پرەزيدەنتىمىز قاسىم-جومارت توقاەۆ جالعاستىرىپ كەلە جاتقان – ۇلى ساياسات!

ۇلى كوشتىڭ ارقاسىندا، 1 ملن 101,2 مىڭ ەتنيكالىق قازاق وتانىمىزعا ورالدى. ءالى التى ميلليون قازاق شەكارا سىرتىندا قالىپ وتىر.

سوڭعى ون بەس جىلدىڭ كولەمىندە ۇلى كوش ىشكى جانە سىرتقى كۇشتەردىڭ سان مارتە الۋان ءتۇرلى كەدەرگىسىنە تاپ بولىپ، بۇرىن-سوڭدى بولماعان زور توقىراۋعا ۇشىرادى.

ول از بولعانداي، پرەزيدەنتىمىز قاسىم-جومارت توقاەۆتىڭ كوشى-قون ساياساتى جونىندەگى بەرگەن نۇسقاۋلارى مەن تاپسىرمالارى ۇكىمەت تاراپىنان مۇلدە ورىندالىپ جاتقان جوق.

ونىڭ دالەلى — 2022 جىلى 5 قىركۇيەكتە ۇكىمەت جاريالاعان «قازاقستان رەسپۋبليكاسى كوشى-قون ساياساتىنىڭ 2023 - 2027 جىلدارعا ارنالعان تۇجىرىمداماسى».

قىسقاسى، ۇلى كوش توقتاپ قالۋدىڭ از-اق الدىندا تۇر!

ارداقتى الاش جۇرتى! قۇرمەتتى ۇلى كوشكە مۇددەلى قاۋىم!

پرەزيدەنتىمىز قاسىم-جومارت توقاەۆ ەل تىزگىنىن قولعا الا سالىپ بەرگەن سۇحباتىندا، «شەتەلدەگى قانداستارىمىزدى ەلگە قايتارۋ ءىسى ەشقاشان نازاردان تىس قالعان ەمەس، قالمايدى دا. دۇنيەجۇزىندەگى قانداستارىمىزدىڭ باسىن تۋعان جەردە بىرىكتىرۋ – ءبىزدىڭ قاسيەتتى پارىزىمىز»، - دەگەن بولاتىن.

ەندەشە، ۇلى كوشتىڭ بولاشاق تاعدىرىن ەسكەرە وتىرىپ، پرەزيدەنتىمىز قاسىم-جومارت توقاەۆتىڭ ۇلى مۇراتىن ءوز دەڭگەيىندە جۇزەگە اسىرۋىن قولداۋ ماقساتىندا، بۇگىن «Qazaq Armany» دەگەن جاڭا ساياسي پارتيا قۇرۋ تۋرالى شەشىم قابىلدادىم!

التى قۇرلىقتا جۇرگەن التى الاشتىڭ بالاسى، «شەت جۇرتتا قازاق قالماسىن!» ۇرانى استىندا ءبىر پارتيا بولىپ بىرىگەيىك!",-دەپ جازدى اۋىت مۇقيبەك. 

Abai.kz