رەسەي مەن ۋكراينا الەمدەگى استىق ءونىمىنىڭ  30 پايىزعا جۋىعىن بەرەدى. رەسەيدىڭ ۋكرايناعا سوعىس اشۋى الەم ەلدەرىندە استىق تاپشىلىعىن ارتتىردى. سوعىسقا دەيىن ەكى ەل افريكا جانە وڭتۇستىك شىعىس ازياداعى كەدەي ەلدەرگە استىق جەتكىزۋ بويىنشا كوشباسشى بولاتىن. 

رەسەي ۋكرايناعا سوعىس اشىپ، دونەتسك، لۋگانسك، حاركوۆ، زاپوروجە جانە حەرسون وبلىستارىن وككۋپاتسيالاعان سوڭ، جەرگىلىكتى استىق قويمالارىن توناپ، بيدايدى قۇرلىق جانە سۋ جولى ارقىلى رەسەيگە تاسي باستادى. ءبىراز بولىگىن سيرياعا جەتكىزدى. استىق قويمالارىن تاۋىسقان رەسەي استىق ورۋعا، ەگۋگە قاجەتتى اۋىل شارۋاشىلىق تەحنيكالارىن دا ەلىنە اكەتتى، اكەتە الماعانىن جويۋعا تىرىستى. استىق القاپتارىنا ءورت قويۋعا ۇمتىلعان ساتتەرى دە بولدى.

رەسەي ۋكراينانىڭ استىعىن جويۋ ارقىلى ەكى ماقساتتى كوزدەدى. ۋكراينا الەمدە 400 ملنعا جۋىق حالىقتى استىقپەن قامتاماسىز ەتىپ وتىر، ونىڭ باسىم كوپشىلىگى كەدەي مەملەكەتتەردىڭ حالقى. كەدەي ەلدەردە استىق تاپشىلىعى ارتسا، وندا بوسقىندار لەگى ەۋروپاعا اعىلادى. بۇل ءوز كەزەگىندە ەۋروپادا ەكونوميكالىق داعدارىستى كۇشەيتەدى، مىنە، سوندىقتان دا استىق تاپشىلىعىن ماسكەۋ ساياسي قۇرال ەتكىسى كەلدى. سانكتسيانى جەڭىلدەتسە نەمەسە تولىق الىپ تاستاسا، وندا استىقتى جويۋدى، توناۋدى توقتاتامىز دەپ بەيرەسمي سيگنالدار جولدادى. رەسەي ۋكراينا اۋماعىنان ءبىر ءدان شىقپاۋى ءۇشىن بارىن سالدى. قارا تەڭىزدى مينالاۋ ارقىلى ۋكراينا پورتتارىنان استىق تاسىمالداۋدى بۇعاتتادى.

22 شىلدەدە ستامبۇل قالاسىندا استىق تاسىمالداۋعا شەكتەۋ قويمايتىن كەلىسىم جاسالدى. تۇركيا، رەسەي، ۋكراينا جانە بۇۇ اراسىندا جاسالعان كەلىسىمگە ساي ارنايى ءدالىز جاسالىپ، ول بويىنشا كەمەلەر استىقتى شىعارۋ مۇمكىندىگىنە يە بولدى. كەمەلەردى كىرۋ جانە شىعۋ ساتىندە تەكسەرۋ جۇمىستارى ىسكە اساتىن. كەلىسىم جالپى 120 كۇنگە جاسالىپ، ارتىنشا ونى ۇزارتۋ مۇمكىندىكتەرى قاراستىرىلۋى ءتيىس ەدى. استىق تاسىمالداۋعا 390-عا جۋىق جۇك كەمەلەرى قاتاسقان بولاتىن.

قازان ايىنىڭ 29 كۇنى باسقىنشى قولىنداعى قىرىمداعى رەسەيدىڭ قارا تەڭىز فلوتىنا شابۋىل جاسالدى. سەۆاستوپول ماڭىندا بىرنەشە كاميكادزە دروندار كەمەلەرگە شابۋىل جاساپ، 4 كەمە زاقىمدانعان. ۋكراينا "بۇل شابۋىلعا قاتىسىمىز جوق" دەپ مالىمدەدى، ال رەسەي شابۋىلدى كيەۆ ۇيىمداستىردى دەپ ايىپتاپ، استىق كەلىسىمىنەن شىعاتىنىن مالىمدەدى. بىرجاقتى نەگىزدە كەلىسىمنەن شىقتى، ال بۇۇ مەن ناتو رەسەيدىڭ بۇل شەشىمىن ايىپتادى.

رەسەي كيەۆتى "لاس بومبامەن" بوپسالاي الماعان سوڭ، بۇرىنعى انىنە قايتا باسىپ، استىق تاپشىلىعى ارقىلى اشتىق جاساپ، ەۆروپاعا قىسىمدى كۇشەيتپەك. ال كيەۆ "كەلىسىمدى قالاعان ساتىندە ۇزە سالاتىن رەسەي سىندى ەلمەن كەلىسسوز جۇرگىزىپ، ۋاقىت جوعالتۋ اقىماقتىق" دەيدى.

اسحات قاسەنعالي

Abai.kz