باسى: مايدانداعى ۋكراينا ارۋلارى: مارگاريتا ريۆچاچەنكو

جالعاسى: مايدانداعى ۋكراينا ارۋلارى: وكسانا رۋبانياك

ۋكراينادا سوعىس باستالعالى 8 ايدان استى. سودان بەرى ەرلەرمەن قاتار قان مايداندا وتانىن قورعاپ جۇرگەن ايەلدەر ەرلىكتىڭ تاماشا ۇلگىسى بولا ءبىلدى.

ءبىز بۇگىن سىزدەرگە – اتقىش الەكساندرانى تانىستىرماقپىز.

جاسى – 23-تە، اسكەري شەنى جوق، ەرىكتى.

– 24 اقپاندا تاڭەرتەڭ كوزىڭىزدى اشقاندا ەڭ ءبىرىنشى نە ويلادىڭىز، نە ىستەدىڭىز؟

-مەن وياۋ بولاتىنمىن. ول ءتۇنى ۇيىقتامادىم. ءبىرىنشى جارىلىستىڭ داۋسىن ەستىگەندە-اق نە بولىپ جاتقانىن ءتۇسىندىم. تاڭعى ساعات سەگىزدىڭ بولعانىن كۇتتىم، سودان كەيىن دالاعا شىقتىم. اقشامدى اۋىستىرىپ كەلدىم دە، اسكەردەگى اعايىننىڭ قاتارىنا قوسىلۋ ءۇشىن ۇيدەگى جانۋارلارىمدى قايدا قويامىن دەپ ويلاندىم. 28 اقپاندا بولىمشەگە بارىپ، اسكەرگە قوسىلدىم.

– سوعىسقا بارۋ تۋرالى شەشىمدى قالاي قابىلدادىڭىز؟

مەندە سوعىسقا بارۋدان باسقا امال بولمادى. قانشا جەردەن وزىمشىلدىك بولىپ كورىنسە دە سىزگە ايتايىن، مەن بۇل سوعىستىڭ ايتەۋىر ءبىر كۇنى بولارىن ءبىلىپ، كۇتتىم. نەعۇرلىم تەز باستالسا، سوعىرلىم تەز اياقتالاتىنىن ءتۇسىندىم.

– بۇل جەردەگى قىزمەتىڭىز قانداي، كۇنىڭىز قالاي وتەدى؟

رەسمي تۇردە – مەرگەنمىن، بىراق مەنىڭ ءارتۇرلى سالالاردا جەتكىلىكتى تاجىريبەم بار بولعاندىقتان، ءارتۇرلى جۇمىستاردى اتقارامىن. مەديتسينالىق كومەك، ءىس جۇرگىزۋگە كومەك كەرەك بولسا، جاردەمدەسەمىن.

– ءسىزدىڭ بولىمشەڭىزدە گەندەرلىك كەمسىتۋشىلىك بار ما؟

قازىرگى بولىمشەگە تاپ بولعانىما قۋانامىن. مۇندا ءبىرىنشى كۇننەن باستاپ ماعان جاقسى قارادى. بىراق 24 اقپانعا دەيىن ءارتۇرلى باتالوندا جۇمىس ىستەپ كوردىم، سول جەردە گەندەرلىك كەمسىتۋشىلىككە تاپ بولدىم. گەندەرلىك كەمسىتۋشىلىكتىڭ نەدەن پايدا بولاتىنىن بىلەمىن، سوندىقتان جۇرەگىمە جاقىن قابىلدامايمىن. ۋكراينادا ەرلەرمەن بىردەي دەڭگەيدە قىزمەت ەتەتىن ايەل اسكەريلەرگە قاتىستى كەمسىتۋشىلىك بار، وكىنىشكە وراي، بۇل قالىپتى جاعدايعا اينالىپ جاتادى. ومىردە فەمينيزمنىڭ وكىلى ەمەسپىن، بىراق كەيدە سەن مىندەتىڭدى ەر ادامنان ارتىق ورىنداپ تۇرساڭ دا، ەرلەردىڭ ءسوزى ماڭىزدى بولىپ تۇراتىنىن كورەسىڭ. اسكەردە دە سولاي، ءوزىنىڭ يەرارحياسى بار.

– قانداي قيىندىقتاردى باستان كەشتىڭىز؟

باسىمداعى جالعىز قيىندىق – انامدى ۋايىمدايمىن. دوستارىمنىڭ قازا بولعانى جانىمدى اۋىرتادى. ال اسكەردەگى جاعدايعا ەش قينالمايمىن. بۇل – سوعىس. بارىنە دايىن بولۋىڭ كەرەك.

– تولىققاندى سوعىس كەزىندە ءسىزدى نە تاڭعالدىردى؟

اياق-قولىنان ايىرىلسا دا مايدان شەبىنە قايتىپ كەلىپ جاتقان دوستارىم تاڭعالدىرادى. ۆالەنتينا اتتى قۇربىم جان-جاعىنان وق جاۋىپ جاتسا دا، نيكولاەۆاداعى بازاردا كوكونىس ساتىپ، كۇيەۋىنە برونەجيلەتكە اقشا جيناپ ءجۇر. مىنە، وسىنداي، ءبىزدىڭ حالىق. ولار ۋكراينانىڭ بەت-بەينەسى. وسى ادامدار ءبىزدىڭ جارقىن بولاشاعىمىزدى قۇرۋشىلار.

– قازىر ءسىزدىڭ رۋحىڭىزدى تۇسىرمەي تۇرعان نە؟

رۋحىمدى كوتەرەتىن – ۋكراينانىڭ جاس ءورىم جەتكىنشەكتەرى، بالالارى. سوعىستىڭ ازابىن تارتىپ، ءومىرى قيىلىپ جاتقان بالالار جۇرەگىمدى قاتتى اۋىرتادى. بالالاردىڭ كوز جاسىن كورگەندە ومىردەن ءتۇڭىلۋ دەگەندى ۇمىتام. ءبىز بولاشاق بالدىرعانداردىڭ اشىق اسپان استىندا، تاۋەلسىز ۋكراينادا ءومىر ءسۇرۋى ءۇشىن ءبارىن ىستەۋىمىز كەرەك. ولار سوعىس دەگەندى تەك تاريح كىتاپتارىنان عانا وقۋى كەرەك.

– ۋكراينانىڭ بولاشاعىنان قانداي پەرسپەكتيۆالاردى كورەسىز؟

ۋكراينانى بارلىق سالادان ۇلكەن، جاڭا، جارقىن بولاشاق كۇتىپ تۇر. ءبىز قازىر تاريحتى قۇرىپ جاتىرمىز، كۇشەيىپ كەلەمىز. كوپشىلىك كەرىسىنشە بولادى دەپ ويلادى. ءبىزدىڭ كەمەل كەلەشەگىمىز بار، بىراق وعان جەتۋ ءۇشىن كۇرەستەر مەن قيىندىقتاردان وتەمىز. مىنانى ۇمىتپاعان ابزال: تەك قۇلداردى عانا وڭاي باسىپ الۋعا بولادى. سوندىقتان ۋكراينانىڭ تاۋەلسىزدىگىن تارتىپ الۋعا ارەكەت جاساۋ ازىرگە توقتاي قويمايدى.

– سوعىستان كەيىن ومىرىڭىزدەگى نە نارسەنى ماڭگىلىككە وزگەرتەسىز؟

مەن قالاسام دا، قالاماسام دا سوعىستان كەيىن كوپ نارسە وزگەرەدى. دۇنيەتانىم، ءومىردى قابىلداۋ باسقاشا بولادى. مەنىڭ بىلەتىنىم، ەندىگارى جاقىن ادامدارىمنىڭ، دوستارىمنىڭ اماندىعىنا شۇكىر ەتەتىن بولام. دوستارىم – مەنىڭ بايلىعىم.

– ۋكراينالىقتار مەن الەمگە نە ايتاسىز؟

ۋكراينالىقتارعا كۇشتى بولىڭىزدار دەگىم كەلەدى. ەڭسەلەرىڭىزدى تۇسىرمەڭىزدەر. قانشا قيىن بولسا دا، ۇمىتتەرىڭىز وشپەسىن. اگرەسسور ەلمەن سوعىسىپ جاتقان حالىق ءۇشىن ەڭ اۋىر قاتەلىك – ول ەل ىشىندە ەكىنشى سوعىس ءورتىن تۇتاتۋ. ءبىز ءبىر-ءبىرىمىزدى قولداۋىمىز كەرەك، باعالاۋىمىز كەرەك. ال وسى سوعىستا بىزگە قول ۇشىن بەرىپ جاتقان ەلدەرگە بۇكىل ۋكراينا حالقىنىڭ اتىنان، اسكەريلەر اتىنان العىسىمدى بىلدىرگىم كەلەدى.

دايىنداعان ايجان تەمىرحان

Abai.kz