بۇگىن ورتالىق سايلاۋ كوميسسياسىنىڭ وتىرىسىندا 20 قاراشادا وتەتىن پرەزيدەنت سايلاۋىنا كانديداتتاردىڭ پىكىرسايىسىنىڭ رەگلامەنتى مەن قاتىسۋشىلار ءتىزىمى بەكىتىلدى. تەلەۆيزيالىق پىكىرسايىس 11 قاراشادا «حابار» تەلەارناسىنىڭ ەفيرىندە وتەدى.

«قر ورتالىق سايلاۋ كوميسسياسىنىڭ قاۋلىسىمەن بەكىتىلگەن سايلاۋ الدىنداعى پىكىرسايىستى وتكىزۋ قاعيدالارى مەن شارتتارىنا سايكەس، وسك رەگلامەنتىمەن كەلىسەدى جانە سايلاۋ الدىنداعى پىكىرسايىسقا قاتىسۋشىلاردىڭ ءتىزىمىن بەكىتەدى. قازىرگى ۋاقىتتا«حابار» تەلەارناسى پرەزيدەنتتىككە كانديداتتاردىڭ سايلاۋ الدىنداعى پىكىرسايىسىن وتكىزۋ رەگلامەنتىن ازىرلەدى. رەگلامەنت جوباسى وسك-گە كەلىسۋگە ۇسىنىلدى. جوبادا سايلاۋ الدىنداعى پىكىرتالاستى وتكىزۋ تالاپتارى قاراستىرىلادى»، - دەدى قر وسك مۇشەسى اناستاسيا ششەگورتسوۆا.

«رەگلامەنتكە سايكەس، پرەزيدەنتتىككە كانديداتتىڭ سايلاۋ الدىنداعى پىكىرسايىسى 4 راۋندتا وتكىزىلەدى. راۋندتارعا سايكەس، پىكىرسايىسقا قاتىسۋشىلار وزدەرىنىڭ سايلاۋ باعدارلاماسىمەن ءسوز سويلەۋگە، قارسىلاستارىنا سۇراق قويۋعا، سايلاۋشىلاردىڭ سۇراقتارىنا جاۋاپ بەرۋگە، سونىمەن قاتار سايلاۋشىلارعا ۇندەۋ جاساۋعا مۇمكىندىك الادى. رەگلامەنت جوباسى سايلاۋ الدىنداعى پىكىرسايىستاردى وتكىزۋ قاعيدالارى مەن شارتتارىنا سايكەس كەلەدى»، - دەدى ول.

ونىڭ  cوزىنشە، سايلاۋ الدىنداعى پىكىرسايىستار مەن پىكىرتالاستارعا قاتىسۋ ءۇشىن كانديداتۋرالاردى قر پرەزيدەنتتىگىنە كانديداتتاردىڭ سايلاۋ شتابتارى ۇسىندى.

«الىنعان مالىمەت نەگىزىندە تەلەۆيزيالىق پىكىرسايىسقا قاتىسۋشىلاردىڭ كەلەسى قۇرامى ۇسىنىلادى: ابدەن قاراقات جاقسىلىققىزى، اۋەسباەۆ نۇرلان ساتىبالدىۇلى، دايراباەۆ جيگۋلي مولداحالىقۇلى، قاجىكەن مەيرام زەكەشۇلى، قوشانوۆ ەرلان جاقانۇلى، تۇرسىنبەكوۆا سالتانات پارحاتقىزى. وسىلايشا، پىكىرسايىس وتكىزۋ رەگلامەنتىمەن كەلىسۋ، سونىمەن قاتار تەلەۆيزيالىق پىكىرسايسقا قاتىسۋشىلاردىڭ ءتىزىمىن بەكىتۋ تۋرالى قاۋلى جوباسى قاراۋعا ۇسىنىلادى»، - دەدى وسك مۇشەسى.

اناستاسيا ششەگورتسوۆا قازىرگى مەملەكەت باسشىسى قاسىم-جومارت توقاەۆتىڭ 11 قاراشادا وتەتىن سايلاۋ الدىنداعى تەلەۆيزيالىق پىكىرتالاسقا نەلىكتەن قاتىسپايتىنىن دا ءتۇسىندىردى.

«ۇگىت-ناسيحاتتى كانديداتتىڭ ءوزى انىقتايتىن سەنىمدى وكىلى وكىلەتتىگى شەگىندە جۇرگىزەدى. سوندىقتان بۇل جاعدايدا سەنىمدى وكىل كانديداتتىڭ اتىنان پىكىرسايىسقا قاتىسادى. ويتكەنى، كانديدات وعان سەنىم ءبىلدىرىپ وتىر. ناقتى سەبەبىنە كەلەر بولساق، بۇل سۇراقتىڭ ورتالىق سايلاۋ كوميسسياسىنا قاتىسى جوق. ءبىز العاشقى وتىرىس وتكىزگەننەن كەيىن بارلىق شتابقا ساۋال جىبەردىك. شتاب بىزگە دەباتقا قاتىساتىن كانديداتۋرالاردى ۇسىندى. سەنىمحاتىن قارادىق. ولار مىندەتتەرگە تولىق ساي كەلەدى. سوندىقتان وسىنداي ءتىزىم بەكىتىلىپ وتىر»، - دەدى اناستاسيا ششەگورتسوۆا.

ايتا كەتەيىك، 11 قاراشادا وتەتىن سايلاۋ الدىنداعى تەلەۆيزيالىق پىكىرسايىسقا قاسىم-جومارت كەمەلۇلىنان باسقا كانديداتتاردىڭ بارلىعى قاتىسادى.

Abai.kz