مەملەكەت باسشىسى قاسىم-جومارت توقاەۆ وڭدەلمەگەن بالىقتى شەتەلگە شىعارۋعا شەكتەۋ قويۋ مۇمكىندىگىن قاراستىرۋعا تاپسىرما بەردى.
بۇگىن اتىراۋ وبلىسىنا جۇمىس ساپارىمەن بارعان پرەزيدەنت ءوڭىردىڭ بالىق شارۋاشىلىعىنا ەرەكشە توقتالدى.
"وسى جەردىڭ اۋلانعان بالىعى رەسەي، ازەربايجان، يزرايل سياقتى ەلدەرگە ەكسپورتتالىپ جاتىر. كوبىنە مۇزداتىلعان، وڭدەلمەگەن شيكى بالىق جىبەرىلەدى", - دەدى توقاەۆ جەرگىلىكتى حالىقپەن بولعان كەزدەسۋدە.
ونىڭ ايتۋىنشا، بۇگىندە دايىن ءونىم ەكسپورتىن ۇلعايتۋعا مول مۇمكىندىك بار. بۇعان وبلىستاعى بالىق كاسىپورىندارىنىڭ شاماسى دا جەتەدى.
"ولاردىڭ جۇمىسىن حالىقارالىق ساپا ستاندارتىنا سايكەس كەلتىرۋ كەرەك. سوندىقتان، قازىرگى جاعدايدى ەسكەرە وتىرىپ، وڭدەلمەگەن بالىقتى شەتەلگە شىعارۋعا شەكتەۋ قويۋ مۇمكىندىگىن قاراستىرۋ قاجەت دەپ سانايمىن", - دەيدى توقاەۆ.
قازىرگى كەزدە اتىراۋ وبلىسىندا بەكىرە بالىعىن وسىرەتىن جانە قارا ۋىلدىرىق وندىرەتىن ەكى شارۋاشىلىق بار. 2025 جىلعا دەيىن تاعى 8 كاسىپورىن اشىلادى دەگەن جوسپار بار.
پرەزيدەنت وسىنداي شارۋاشىلىقتى دامىتۋ ءۇشىن قولايلى ينۆەستيتسيالىق جاعداي جاساپ، جاستاردى كوپتەپ تارتۋ قاجەت دەپ سانايدى. ول ءۇشىن مەملەكەت تاراپىنان كومەك كورسەتىلۋى شارت. ال جەرگىلىكتى بيلىك ءۇشىن بالىق شارۋاشىلىعىن دامىتۋ باستى مىندەتتىڭ ءبىرى بولۋعا ءتيىس.
