شىعىس قازاقستان وبلىسىنىڭ ريددەر قالاسىنداعى جىلۋ ەلەكتر ورتالىعىندا تاعى دا اقاۋ شىقتى. وسىعان وراي قالا اكىمدىگى رەسمي مالىمدەمە جاسادى.

«9 قاراشادا جىلۋ ەلەكتر ورتالىعىنداعى №6 جوعارى قىسىمدى قازاندىق ىسكە قوسىلعان بولاتىن. 10 قاراشا كۇنى تۇنگى ساعات 01:00-دە تەمپەراتۋراسى 65 گرادۋسقا جەتكەن №6 قازاندىق اپاتتى جاعدايدا ءسوندىرىلدى. بىردەن جوندەۋ جۇمىستارى باستالىپ كەتتى»، - دەدى قالا اكىمى دميتري گوركوۆوي.

ونىڭ ايتۋىنشا، قازىرگى ۋاقىتتا ورتاشا قىسىمدى 3 قازاندىق جۇمىس ىستەپ تۇر. اپاتتى جويۋعا بارلىق ماماندار مەن جابدىقتار جۇمىلدىرىلعان.

ەسكە سالساق، 5 قاراشا كۇنى ساعات 20.00-دە اتالعان ورتالىقتاعى كۇل شىعارۋ جۇيەسىندەگى سورعى ىستەن شىعىپ، №1 قازاندىق اگرەگاتىنىڭ قوسالقى جابدىعى اپاتتى جاعدايدا اجىراتىلعان. سونىڭ سالدارىنان 22 مىڭنان استام ابونەنت ءۇشىن جىلۋ بەرۋ ازايتىلدى.

ريددەر قالاسىندا توتەنشە جاعداي جاريالاندى. مەكتەپ وقۋشىلارى 11 قاراشاعا دەيىن ونلاين وقۋعا كوشىرىلدى.

ال ريددەر تۇرعىندارى جەو-نى كوممۋنالدىق مەنشىككە قايتارۋ تۋرالى پەتيتسيا جازدى.

Abai.kz