بىرىككەن ۇلتتار ۇيىمىنىڭ دامۋ باعدارلاماسى ارقىلى ەلىمىزدە ەنەرگيانى ۇنەمدەۋ سالاسىندا بىرنەشە جوبا جۇزەگە اسقالى جاتقانى تۋرالى قر يندۋستريا جانە ينفراقۇرىلىمدىق دامۋ ۆيتسە-ءمينيسترى مارات قاراباەۆ مالىمدەدى.

«ەلىمىزدە ەنەرگيا ۇنەمدەۋ جانە ونىڭ تيىمدىلىگىن ارتتىرۋ ماسەلەسىن شەشۋ مەن سالانى ىلگەرىلەتۋدە حالىقارالىق ۇيىمداردىڭ بەلسەندىلىگىن ەرەكشە اتاپ وتكىم كەلەدى. بۇگىنگى تاڭدا بۇۇ دامۋ باعدارلاماسىمەن (ەنەرگيانى ءتيىمدى جارىقتاندىرۋدى ىلگەرىلەتۋ) جانە دۇنيەجۇزىلىك بانكىمەن (قازاقستاندا ەنەرگيا تيىمدىلىگىن ارتتىرۋ) 25 ملن اقش دوللار سوماسىنا 2 جوبا ىسكە استى. ودان باسقا بۇۇ دامۋ باعدارلاماسى ارقىلى 17,7 ملن اقش دوللارعا تاعى 3 جوبا ىسكە اسۋ ساتىسىندا»، - دەدى مارات قاراباەۆ ەلوردادا ءوتىپ جاتقان IV حالىقارالىق ەنەرگيا ۇنەمدەۋ فورۋمىندا.

سونداي-اق، ۆيتسە-مينيستر جوعارىدا اتالعان ءۇش جوباعا جەكە توقتالىپ ءوتتى.

«تومەن كومىرتەكتى دامىتۋعا ارنالعان تۇراقتى قالالار» جوباسىنىڭ قۇنى - 5,9 ملن اقش دوللارى. ەلىمىزدە ەنەرگيا تيىمدىلىگىنە ينۆەستور تارتۋ ءۇشىن جاعداي جاساۋ جوباسىنا 8,3 ملن دوللار قارالعان. سول سياقتى قازاقستاندا ەلەكتر تۇرمىستىق قۇرال-جابدىقتاردىڭ ەنەرگيا تيىمدىلىگىن ستاندارتتاۋ، سەرتيفيكاتتاۋ جانە تاڭبالاۋ سالاسى بويىنشا 3,5 ملن دوللاردىڭ جوباسى ىسكە اسادى»، - دەيدى ول.

ودان بولەك، مارات قاراباەۆ بيىل ەۋروپالىق وداق جانە گەرمانيا ۇكىمەتىنىڭ قولداۋىمەن ەنەرگيا ۇنەمدەۋ سالاسىندا تاعى بىرنەشە جوبانىڭ ىسكە قوسىلاتىنىن ايتتى.

ايتا كەتەيىك، استانادا IV حالىقارالىق ەنەرگيا ۇنەمدەۋ فورۋمى وتىپ جاتىر.

اتالعان شاراعا مەملەكەتتىك قۇزىرلى ورگاندار وكىلدەرى، وتاندىق جانە شەتەلدىك ەنەرگيا وندىرەتىن ۇيىم باسشىلارى مەن سالا ماماندارى قاتىسۋدا.

Abai.kz