قاراشانىڭ ورتاسىندا الەم حالقىنىڭ سانى 8 ملرد ادامعا جەتەدى دەپ بولجانۋدا. بۇل تۋرالى بۇۇ باس حاتشىسى انتونيۋ گۋتەرريشتىڭ باق-قا ارنالعان ۇندەۋىندە ايتىلعان.

وندا بۇۇ باسشىسى الداعى ونجىلدىقتاردا حالىق ءوسىمىنىڭ ەڭ جوعارى كورسەتكىشتەرى بار ەلدەر ورنىقتى دامۋ مەن وركەندەۋدىڭ لوكوموتيۆىنە اينالادى دەگەن ءۇمىتىن ءبىلدىردى. «قاراشا ايىنىڭ ورتاسىندا الەم حالقىنىڭ سانى سەگىز ميللياردقا جەتەدى – بۇل تاماقتانۋ، دەنساۋلىق ساقتاۋ جانە سانيتاريا سالاسىنداعى عىلىمي جەتىستىكتەردىڭ دالەلى»، - دەدى بۇۇ باسشىسى.

سونىمەن بىرگە ول بۇل دەموگرافيالىق جەتىستىكتەر ميللياردتاعان ادامنىڭ قيىن جاعدايدا ءومىر سۇرۋىنە، جۇزدەگەن ميلليونداردىڭ تاماقتانباۋىنا جانە ءتىپتى اشتىققا ۇشىراۋىنا بايلانىستى ەكەنىن اتاپ ءوتتى. كوپتەگەن ادام سوعىس پەن كليماتتىق اپات سالدارىنان ۇيلەرىنەن كەتۋگە ءماجبۇر.

«ەگەر ءبىز بايلار مەن كەدەيلەر اراسىنداعى الشاقتىقتى جويماساق، سەگىز ميلليارد حالقى بار الەمدە شيەلەنىستەر مەن سەنىمسىزدىكتەر، داعدارىستار مەن قاقتىعىستار جالعاسا بەرمەك»، – دەپ ەسكەرتتى بۇۇ باس حاتشىسى.

ونىڭ ايتۋىنشا، بىرنەشە ميللياردەر ادامزاتتىڭ ەڭ كەدەي جارتىسىنداي بايلىقتى باسقارادى. الەمدەگى ەڭ باي ادامداردىڭ ءبىر پايىزى الەمدىك تابىستىڭ بەستەن ءبىر بولىگىن قۇرايدى. ەڭ باي ەلدەردەگى ادامدار كەدەي ەلدەردىڭ تۇرعىندارىنا قاراعاندا 30 جىلعا ۇزاعىراق ءومىر سۇرە الادى. بۇل رەتتە جالپى الەم حالقىنىڭ ءال-اۋقاتىنىڭ وسۋىنە جانە دەنساۋلىق ساقتاۋ سالاسىنداعى كورسەتكىشتەردىڭ جاقسارۋىنا قاراي تەڭسىزدىك كورىنىستەرى كۇشەيە تۇسۋدە.

Abai.kz