«ارسەلورميتتال تەمىرتاۋ» كومپانياسىنىڭ لەنين شاحتاسىنداعى اپاتتى تەكسەرۋدىڭ قورىتىندىلارى 23 قاراشادا جاريالانادى. بۇل تۋرالى قر توتەنشە جاعدايلار ءمينيسترى يۋري يلين ايتتى.

«23 قاراشادا قورىتىندى بەرەمىز. ءبىز باق وكىلدەرىن جيناپ تەرگەپ-تەكسەرۋدىڭ قورىتىندىسىن جاريالايمىز. قازىر كوميسسيا جۇمىس ىستەپ جاتىر»، - دەدى يۋري يلين ۇكىمەت كۋلۋارىندا.

ەستەرىڭىزگە سالا كەتەيىك، 3 قاراشادا قاراعاندى وبلىسىنداعى «ارسەلورميتتال تەمىرتاۋ» اق-نىڭ لەنين اتىنداعى شاحتاسىندا گاز اپاتى بولىپ، 5 كەنشى قازا تاپتى. تاعى تورتەۋى جاراقاتتانىپ، اۋرۋحاناعا ءتۇستى. تج فاكتىسى بويىنشا قر قك 277-بابىنىڭ 3-بولىگى («تاۋ-كەن نەمەسە قۇرىلىس جۇمىستارىن جۇرگىزۋ كەزىندە قاۋىپسىزدىك ەرەجەلەرىن بۇزۋ») بويىنشا قىلمىستىق ءىس قوزعالدى.

مەملەكەت باسشىسى «ارسەلورميتتال تەمىرتاۋ» كاسىپورنىندا اپاتتار ءجيى قايتالانا بەرەتىن جاعدايعا جەتكەنىن ايتىپ، كومپانياعا تەكسەرۋ جۇرگىزۋ كەرەكتىگى تۋرالى ايتقان بولاتىن.

Abai.kz