قارجىلىق مونيتورينگ اگەنتتىگىنىڭ توراعاسى جانات ەليمانوۆ مەملەكەت باسشىسىنىڭ قابىلداۋىندا بولىپ، اگەنتتىكتىڭ بيىلعى 10 ايدا اتقارعان  جۇمىسى تۋرالى ەسەپ  بەردى. بۇل تۋرالى اقوردا حابارلادى.

مەملەكەت باسشىسىنا قىلمىستىق ىستەردى جاپپاي قوزعاۋ تاجىريبەسىنىڭ جويىلعانى جانە ادال بيزنەستى قىلمىستىق قۋدالاۋدىڭ ازايعانى جونىندە باياندالدى. سونىڭ ناتيجەسىندە سوتقا دەيىنگى تەرگەپ-تەكسەرۋ امالدارىنىڭ سانى جىل سايىن ازايىپ كەلە جاتقانى بايقالادى. اتاپ ايتقاندا، وتكەن جىلمەن سالىستىرعاندا تىركەلگەن ىستەر سانى 30 پايىزعا تومەندەگەن.

جانات ەليمانوۆتىڭ ايتۋىنشا، قابىلدانعان شارالار كەلتىرىلگەن شىعىنداردى وتەۋگە، 300 ميلليارد تەڭگەدەن استام اكتيۆتى قايتارۋعا مۇمكىندىك بەردى. جيىرما بەس ۇيىمداسقان قىلمىستىق توپتىڭ جولى كەسىلدى.

اقشانى قولما-قول شىعارۋمەن اينالىساتىن 119 توپتىڭ قىزمەتىنە توسقاۋىل قويىلدى.

بۇدان بولەك، مەملەكەت باسشىسىنا 25 قارجى پيراميداسى جويىلىپ، جابىرلەنۋشىلەردىڭ 8,3 ميلليارد تەڭگە شىعىنى وتەلگەنى تۋرالى باياندالدى. قارجىلىق پيراميدالارمەن كۇرەس اياسىندا زاڭسىز مازمۇنداعى 8,8 مىڭعا جۋىق سايت پەن اككاۋنت بۇعاتتالعان. پرەزيدەنتتىڭ تاپسىرماسىن ورىنداۋ ماقساتىندا قارجىلىق بارلاۋ قىزمەتى ەسىرتكى ساتاتىن 15 ينتەرنەت-دۇكەندى اشكەرەلەگەن. ولاردىڭ جالپى ساۋدا اينالىمى 4,4 ميلليارد تەڭگەنى قۇرايدى جانە 27 مىڭنان اسا ازاماتتى قامتىعان. بۇل ماتەريالدار ىشكى ىستەر مينيسترلىگى مەن ۇلتتىق قاۋىپسىزدىك قىزمەتىنە جولداندى. تسيفرلىق اكتيۆتەردى پايدالانا وتىرىپ، قىلمىستىق جولمەن تاپقان كىرىستى جىلىستاتۋعا جانە تەرروريزمدى قارجىلاندىرۋعا قارسى كۇرەس اياسىندا اگەنتتىك Binance ءىرى حالىقارالىق كريپتوبيرجاسىمەن ىنتىماقتاستىق تۋرالى مەموراندۋمعا قول قويعان.

سونىمەن قاتار پرەزيدەنتكە  قازاقستاننىڭ «قارجىنى جىلىستاتۋعا قارسى كۇرەس» ۇلتتىق جۇيەسى  فاتف تالاپتارىنا سايكەستىگى بويىنشا ءوزارا باعالاۋدان ءوتىپ جاتقانى جونىندە مالىمەت بەرىلدى.

Abai.kz