قاسىم-جومارت توقاەۆ بۇگىن الماتى قالاسى جۇرتشىلىعىمەن كەزدەسۋ وتكىزدى. كەزدەسۋ بارىسىندا مەملەكەت باسشىسى الماتىداعى قاڭتار وقيعاسى تۋرالى ايتتى.

«ەلىمىزدىڭ التىن بەسىگى – الماتىنى قيراتىپ جاتقانى وسى قالانىڭ پەرزەنتى رەتىندە مەنىڭ دە جانىما باتتى. دەگەنمەن، ءدال سول ساتتە ابدىراپ، ۋاقىت ۇتتىرۋعا ەش قاقىمىز بولعان جوق. وندا ابدەن داندايسىپ كەتكەن قاراقشىلار قالامىزدى كۇل-تالقان ەتەر ەدى.

ەل تاعدىرى سىنعا تۇسكەن جاۋاپتى ساتتە حالقىمىز مىزعىماس بىرلىگى مەن قايتپاس قايسارلىعىن تانىتتى. مەملەكەتتىگىمىزدى ساقتاپ قالۋ ءۇشىن ءبىز قانداي تاۋەكەلگە دە باراتىنىمىزدى ايقىن كورسەتتىك. سول قيىن كۇندەردە بۇكىل قازاقستان حالقى الماتىلىقتاردىڭ تىلەۋىن تىلەدى. وكىنىشكە قاراي، قازىر كەيبىرەۋلەر قىلمىستىق ارەكەتتى حالىق كوتەرىلىسى دەپ اقتاۋعا تىرىسىپ ءجۇر.

تاعى دا ايتامىن: حالىقتىڭ بەيبىت شەرۋى مەن قاراقشىلار جاساعان قاندى قىلمىستىڭ اراسىن اجىراتا ءبىلۋ كەرەك. ءبىز جەدەل جانە باتىل ارەكەت جاساعاننىڭ ارقاسىندا ەل ىشىندە دەرەۋ ءتارتىپ ورناتتىق. قابىلداعان شەشىمدەرىمىز جانە ءىس-ارەكەتىمىز بۇكىل دۇنيە جۇزىندە تۇسىنىستىكپەن مويىندالدى، ءتىپتى، قولداۋ تاپتى»، - دەدى.

Abai.kz