20 قاراشادا وتەتىن كەزەكتەن تىس پرەزيدەنت سايلاۋى كەزىندە ەلىمىزدەگى 86 ۋچاسكەدە داۋىس بەرۋ 1 ساعات بۇرىن باستالادى. بۇل تۋرالى بۇگىن قر ورتالىق سايلاۋ كوميسسياسىنىڭ توراعاسى نۇرلان ءابدىروۆ حابارلادى.

«وكىلەتتىكتەرگە سايكەس، سايلاۋ زاڭناماسىندا كوزدەلگەن تارتىپپەن ءتيىستى اۋماقتىق كوميسسيالارى داۋىس بەرۋدى باستاۋدىڭ وزگە ۋاقىتىن بەلگىلەۋ جونىندە شەشىم قابىلدادى. وبلىستاردىڭ، استانا، الماتى، شىمكەنت قالالارىنىڭ اۋماقتىق كوميسسيالارىنان ۇسىنىلعان جەدەل مالىمەتتەر بويىنشا ءتيىستى اۋماقتىق كوميسسيالاردىڭ شەشىمدەرىمەن 86 سايلاۋ ۋچاسكەسىندە داۋىس بەرۋ جەرگىلىكتى ۋاقىت بويىنشا تاڭعى ساعات 06.00-دە باستالادى. قالا قۇراۋشى كاسىپورىنداردىڭ اۋىسىمدىق جۇمىس كەستەسى ەسكەرىلەدى. ونىڭ ىشىندە 47-ءسى ازاماتتاردىڭ ۋاقىتشا بولاتىن جەرلەرىندەگى ۋچاسكەلەر»، - دەدى ول وسك وتىرىسىندا.

ونىڭ اتاپ وتۋىنشە، ساعات 20.00-گە دەيىن داۋىس بەرۋدىڭ اياقتالۋ ۋاقىتىن بەلگىلەۋ بويىنشا شەشىمدەر قابىلدانعان جوق.

«اسكەري بولىمدەردە، ستاتسيونارلىق ەمدەۋ-پروفيلاكتيكالىق مەكەمەلەردە، الىس جانە جەتۋ قيىن اۋدانداردا، شالعايداعى مال شارۋاشىلىعى ۋچاسكەلەرىندە، دەمالىس ۇيلەرىندە، ساناتوريلەردە، تەرگەۋ يزولياتورلارى مەن ۋاقىتشا ۇستاۋ ورىندارىندا، سونداي-اق قازاقستاننىڭ شەت مەملەكەتتەردەگى وكىلدىكتەرى جانىنان قۇرىلعان 514 ۋچاسكەلىك سايلاۋ كوميسسياسى تىزىمىنە ەنگىزىلگەن بارلىق سايلاۋشىلار داۋىس بەرسە، كەز كەلگەن ۋاقىتتا داۋىس بەرۋ اياقتالدى دەپ جاريالانا الادى»، - دەدى نۇرلان ءابدىروۆ.

Abai.kz