قازاقستان ەلشىلىكتەرى جانىنداعى 63 ۋچاسكەدە داۋىس بەرۋ ءجۇرىپ جاتىر. بۇل تۋرالى قر ورتالىق سايلاۋ كوميسسياسىنىڭ مۇشەسى ءسابيلا مۇستافينا ايتتى. 

«قازاقستان رەسپۋبليكاسىنىڭ شەت مەملەكەتتەردەگى وكىلدىكتەرى جانىنان قۇرىلعان 68 سايلاۋ ۋچاسكەسىنىڭ 63-ىندە داۋىس بەرۋ ءجۇرىپ جاتىر. بارلىق سايلاۋ ۋچاسكەسىندە داۋىس بەرۋ پروتسەسىن كانديداتتاردىڭ سەنىم بىلدىرگەن ادامدارى، ساياسي پارتيالاردىڭ، قوعامدىق بىرلەستىكتەردىڭ جانە بۇقارالىق اقپارات قۇرالدارىنىڭ وكىلدەرى بايقاپ وتىر»، - دەدى ءسابيلا مۇستافينا.

بۇگىن ەلىمىزدە كەزەكتەن تىس پرەزيدەنت سايلاۋى ءوتىپ جاتىر. بارلىق وڭىردە 10 033 ۋچاسكە داۋىس بەرۋگە كىرىستى. سونىمەن قاتار شەت مەملەكەتتەردەگى قازاقستان رەسپۋبليكاسىنىڭ وكىلدىكتەرى جانىنداعى 63 ۋچاسكەدە داۋىس بەرۋ باستالدى. شەتەلدەگى 5 ۋچاسكەدە جەرگىلىكتى ۋاقىتپەن داۋىس بەرۋ باستالاتىن بولادى. وسىلايشا، قازىرگى ۋاقىتتا سايلاۋ 10 096 ۋچاسكەدە وتۋدە.

Abai.kz