"ومۋ" اۋعان تەلەارناسىنىڭ حابارلاۋىنشا، اۋعانستان ۇلتتىق قارسىلىق مايدانىنىڭ جەتەكشىسى احماد ماسۋد وتكەن سەيسەنبىدە وسى ەلدىڭ بيلىگىمەن كەلىسسوز جۇرگىزۋ ءۇشىن رەسەيگە اتتانعان.

تەلەارنا دەرەككوزىنىڭ مالىمەتىنشە، كەيىنگى بىرنەشە ايدا تاجىكستانعا ايماقتىڭ بىرقاتار ەلدەرى مەن باسقا ەلدەردىڭ ديپلوماتتارى كەلىپ، دۋشانبەدە احماد ماسۋدپەن كەزدەسكەن، ونىمەن اۋعانستانداعى جاعدايدى تالقىلاعان. احماد ماسۋد قازىر تاجىكستاندا تۇرادى، الايدا دۋشانبە بيلىگى بۇل مالىمەتتى ەشقاشان راستاعان ەمەس، دەپ ايتىلدى تەلەارنا رەپورتاجىندا.

"ومۋ" مالىمەتىنشە، كاتاردىڭ اۋعان ماسەلەسى جونىندەگى ارنايى وكىلى مۋتلاك يبن ءماجيد ءال-كاحتاني تاجىكستاندا ەكى رەت بولعان. تەلەارنا دەرەككوزدەرى احماد ماسۋدتىڭ ءۇندىستان مەن يران وكىلدەرىمەن كەلىسسوز جۇرگىزگەنىن دە حابارلادى. مالىمەتكە قاراعاندا، كەلىسسوزدەردە اۋعانستاندا "جاڭا ۇكىمەت" قۇرۋ ماسەلەسى ءسوز بولعان.

بىلتىر تامىزدا اۋعانستان بيلىگىنە كەلگەن "تاليبان" قوزعالىسى احماد ماسۋدتىڭ رەسەيگە ساپارى تۋرالى ازىرگە ەشقانداي مالىمەت تاراتپادى.

بىرنەشە كۇن بۇرىن عانا ماسكەۋدە اۋعانستان جونىندەگى كەلىسسوزدەردىڭ ءتورتىنشى جينالىسى وتكەن. وعان رەسەي، ءۇندىستان، قىتاي، پاكىستان، يران جانە ورتالىق ازيا ەلدەرىنىڭ وكىلدەرى قاتىسقان. بۇل جينالىسقا "تاليبان" قوزعالىسى شاقىرىلماعان. جيىنعا قاتىسۋشىلار اۋعانستاندا "ينكليۋزيۆ ۇكىمەت" قۇرۋ ماڭىزدى ەكەنىن مالىمدەگەن.

سوعان قاراماستان، رەسەي ءالى كۇنگە دەيىن تالىپتەرمەن قارىم-قاتىناس جاساپ وتىر. كرەمل اۋعانستان ۇلتتىق قارسىلىق مايدانىن قولدايتىنى تۋرالى ەشقانداي مالىمدەمە جاساماعان. دەگەنمەن رەسەي 1996-2001 جىلدارى احماد ماسۋدتىڭ اكەسى احماد شاح ماسۋدتىڭ سولتۇستىك اليانسىن قولداپ كەلگەن. يران مەن ءۇندىستان دا "تاليبانعا" قارسى بۇل اليانستى جاقتاعان.

تالىپتەر 2021 جىلعى 15 تامىزدا اۋعانستاندا بيلىك باسىنا كەلگەن سوڭ احماد ماسۋد پاندجشەر شاتقالىنا بەكىنىپ، اۋعانستان ۇلتتىق قارسىلىق مايدانىن قۇردى. كەيىنگى ايلاردا مايدان كۇشتەرى پاندجشەردە، انداروبتا، كاپيسادا، باعلاندا جانە تاحور مەن باداحشان پروۆينتسيالارىنىڭ ءبىر بولىگىندە تالىپتەرمەن ۇرىس جۇرگىزدى.

Abai.kz