تارازدا «قازفوسفات» قىزمەتكەرلەرى نارازىلىققا شىقتى. ولاردىڭ ايتۋىنشا، مەكەمە باسشىسى ولەگ كۋليكوۆ جۇمىسشىلاردى «بارانى» دەپ بالاعاتتاعان.

زاۋىت اۋماعىندا 200-دەن استام ادام جينالىپ، رەسەي ازاماتى كۋليكوۆتى «كوپشىلىك الدىندا كەشىرىم سۇراسىن، جۇمىستان شىقسىن» دەپ تالاپ ەتتى.

نارازىلىق ۆيدەولارى جۋرناليست نۇرادين راكايدىڭ الەۋمەتتىك پاراقشاسىندا جاريالانعان.

جينالعان جۇمىسشىلار جالاقى مولشەرى مەن زاۋىتتىڭ دەنساۋلىققا كەلتىرەتىن زيانى ءۇشىن تولەيتىن تولەم مولشەرىن 30 پايىزعا كوتەرۋدى تالاپ ەتتى.

«قاراپايىم قىزمەتكەرلەردىڭ جالاقى مولشەرى – 150-180 مىڭ تەڭگە ارالىعىندا، ال باسشىلىق قىزمەتتەگىلەر 18-24 ميلليون تەڭگە ارالىعىندا جالاقى الادى. ءبىز بۇعان قارسىمىز»،-دەدى ولار.

وقيعا ورنىنا تارازدىڭ اكىمى باقىتجان ورىنبەكوۆ كەلدى. ول جۇمىسشىلاردان بارلىق تالاپ-شاعىمدى حات تۇرىندە اكىمدىككە جولداۋدى سۇرادى.

كەيىن جامبىل اۋدانى اكىمدىگى كۋليكوۆتىڭ كەشىرىم سۇراعانىن جانە قىزمەتتەن قۋىلعانىن حابارلادى.

««قازفوسفات» زاۋىتىندا ورىن العان جۇمىسشىلار نارازىلىعىنا سايكەس رەسەي ازاماتى جۇمىسشىلاردان كەشىرىم سۇرادى جانە جۇمىستان بوساتىلدى. سونداي-اق جۇمىسشىلاردىڭ تالاپ-تىلەكتەرى  مەن ۇسىنىس-پىكىرلەرى بويىنشا جۇمىسشى توپ قۇرىلىپ، زەردەلەۋ جۇمىستارى ۇيىمداستىرىلۋدا. ۇلتارالىق ماسەلە ورىن الماعان. زاۋىت شتاتتىق رەجيمدە جۇمىس جۇرگىزۋدە»،-دەپ جازدى اكىمدىك حابارلاماسىندا.

جامبىل وبلىسىنىڭ اكىمدىگى "جامبىل وبلىسى اكىمىنىڭ ءبىرىنشى ورىنباسارى نۇرجان كالەندەروۆ، وبلىس اكىمىنىڭ ورىنباسارى قاناتبەك مادىبەك، وبلىس پروكۋرورىنىڭ ورىنباسارى نۇربەك ۇلاسبەكۇلى قىزمەتكەرلەرمەن كەزدەسىپ، ءتۇسىندىرۋ جۇمىستارىن جۇرگىزگەنىن مالىمدەدى.

Abai.kz