قر پارلامەنتى سەناتى حالىقارالىق قاتىناستار، قورعانىس جانە قاۋىپسىزدىك كوميتەتىنىڭ توراعاسى مۇحتار قۇل-مۇحاممەد رەسەيدىڭ تەلەارناسىندا سولوۆەۆ جۇرگىزگەن باعدارلاماداعى رەسەيلىك ساراپشىلاردىڭ سوزدەرىنە جاۋاپ بەردى

«سۇمىراي سولوۆەۆ الەمنىڭ كوپتەگەن ەلدەرىندە بۇرىننان نون گراتا العان ادام بولاتىن جانە قازىر بۇكىل جەردەگى سانكتسيالىق قارا تىزىمدەردە كوش باستاپ كەلەدى. سوندىقتان ىزا-كەكتىڭ بۋىنان ول ەلدىڭ بارىنە جارماسىپ «ۋلى سىلەكەيىن» شاشىپ ءجۇر. بۇرىن «روسسيا 1» ارناسىندا ول الماتىعا بومبا «تاستاپ جىبەرۋ» تۋرالى دا ايتقان بولاتىن. باعدارلامانىڭ قوناعى – مەملەكەتتىك دۋمانىڭ دەپۋتاتى ونيششەنكو دا ودان قاتتى شوشىنىپ قالعان ەدى»، - دەدى مۇحتار قۇل-مۇحاممەد.

سونداي-اق، ول سولوۆەۆتىڭ بارشانى جەك كورۋى كەسىرىنەن كوبىنەسە وزەۋرەپ ءوزى سويلەپ، باعدارلامانىڭ مەيماندارىن جانجال مەن ارانداتۋعا يتەرمەلەيتىنىن اتاپ ءوتتى. ونىڭ ءبارى تىكەلەي ەفيردە جانە ەسۋاس كەيپىندە بولاتىنىن تىلگە تيەك ەتتى.

«رەسەيلىك ساياساتتانۋشى دروبنيتسكيدىڭ «كەلەسى ماسەلە قازاقستان بولۋى مۇمكىن. ويتكەنى ۇلتشىلدىق ۇردىستەرى سول جەردە دە باستالۋى ىقتيمال» دەگەن سوزىنەن ءبىزدىڭ ەلىمىزگە تىكەلەي قاتەر ءتوندىرۋ انىق بايقالىپ وتىر.

ەگەر ول ەۋرازيالىق ەكونوميكالىق وداق پەن ۇقشۇ-دا بىزبەن بىرگە تۇرعان وزىمىزگە دوس رەسەيدىڭ مەملەكەتتىك ارناسىنىڭ ەفيرىندە كورسەتىلمەسە، ءدۇدامال ساراپشى-فانتاست دروبنيتسكي-جۋكوۆتىڭ پىكىرىنە نازار اۋدارماس ەدىك. رەسەيلىك ساياساتكەرلەردىڭ وسىنداي ەكپىندى، ماقساتتى شابۋىلدارى سولوۆەۆتىڭ شوۋىندا بۇرىننان جۇيەلى تۇردە جالعاسىپ كەلە جاتقاندىقتان، ولار رەسەي فەدەراتسياسىنىڭ فەدەرالدى بيلىگى تاراپىنان وبەكتيۆتى جاۋاپقا لايىق» دەپ باعا بەردى حالىقارالىق قاتىناستار، قورعانىس جانە قاۋىپسىزدىك كوميتەتىنىڭ توراعاسى.

ءسوز سوڭىندا مۇحتار قۇل-مۇحاممەد قازاقستان 30 جىلدان استام ۋاقىت بويى تاۋەلسىز مەملەكەت ەكەنىن، سولوۆەۆ پەن سول سەكىلدى ساياساتكەرلەر شىنايى شىندىقتى ءتۇسىنىپ، جاڭا گەوساياسي اقيقاتپەن ساناسۋدى ۇيرەنەتىن ۋاقىت كەلگەنىن اتاپ ءوتتى.

ايتا كەتەيىك، جوعارىدا ايتىلعان رەسەيلىك ساياساتتانۋشى دروبنيتسكي «كەلەسى ماسەلە قازاقستان بولۋى مۇمكىن. ويتكەنى ۇلتشىلدىق ۇردىستەرى سول جەردە دە باستالۋى ىقتيمال» دەگەن پىكىرى «روسسيا 1» ارناسىنداعى سولوۆەۆتىڭ شوۋىندا ايتىلعان بولاتىن.

Abai.kz