تاڭعى سەرۋەننەن قايتىپ كەلە جاتقام. جاياۋ جۇرگىنشىلەر جولىنداعى كەشە تۇسكەن قالىڭ قاردى كۇرەپ جۇرگەن وڭكەي قازاق ايەلدەرىنە نازارىم اۋدى.

- ارمىسىزدار! ىستەرىڭىزگە بەرەكە بەرسىن! - دەپ، قاستارىنان وتە بەردىم.

كەنەت شارشاڭقى ءجۇزىن ءاجىم تورلاعان، قيمىلى باسقالارعا قاراعاندا باياۋلاۋ، قارتاڭداۋ ايەلدى كوزىم شالىپ، ءوتىپ بارىپ كىلت بۇرىلدىم.

- جاسىڭىز ءبىراز جەرگە كەلىپ قالعانعا ۇقسايدى، مىنا جۇمىس سىزگە اۋىرلاۋ ەمەس پە؟ - دەپ سۇرادىم.

- اۋىرى اۋىر عوي، شىراعىم، بىراق باسقا امالىم بار ما؟ اۋىلدا جۇمىس جوق. كەنجە قىزىم اۋرۋحانادا. ءتورت جيەن نەمەرەمدى ءوزىم باعىپ وتىرمىن. ءتورت كىشكەنتاي بالاسىمەن قىزىمدى كۇيەۋى تاستاپ كەتكەن. باسقا ايەلگە ۇيلەنىپ كەتتى. قىزىم كۇيەۋىمەن زاگسكە وتىرماعان ەدى، اليمەنت تە تولەمەيدى، - دەپ قارت انا ماڭدايىنان اققان تەردى جەڭىمەن سۇرتە بەردى.

"شىراعىم" دەپ سويلەگەنىنە قاراعاندا، جاسى مەنەن دە ۇلكەن بولعانى ما؟ شىقپاي جۇرگەن جانى-اي! بۇل كىسىنىڭ ورنىندا مەن بولسام، انا تەمىر كۇرەكتى جارتى ساعات ۇستاپ تۇرعاننىڭ وزىنە بەلىمنەن شويىرىلىپ، توڭقالاڭ اسار ەدىم دەپ ويلاعان سايىن، جۇرەگىمە شانشۋ قادالا بەرگەن.

- ايىپ بولماسا، ايتاسىز با، جاسىڭىز قانشادا؟

- الپىس تورتكە تولدىم.

سوندا مىنا كىسى مەنى وزىنەن كىشى دەپ ويلاعانى ما؟ تۇرمىس تاۋقىمەتى ادامنىڭ ءتانىن عانا ەمەس جانىن دا قارتەيتىپ جىبەرەدى ەكەن-اۋ! وبالداعى-اي!

ءوزى ءبىر اشىق جان ەكەن، سالدىرلاپ، ىشىندەگى بارىن اقتارىپ-اق جاتىر.

وسى ماڭايدىڭ قارىن كۇرەپ جۇرگەن كارى-جاسى بار، ون سەگىز ادام الماتى وبلىسى، ەڭبەكشىقازاق اۋدانى، "تەسكەنسۋ" دەگەن اۋىلدان كەلگەن بولىپ شىقتى. كۇندە تاڭەرتەڭگىسىن اۆتوبۋسپەن ەكى ساعات ءجۇرىپ، قالاعا اكەلەدى ەكەن. كەشكە دەيىن جۇمىس ىستەتىپ، كەشكىسىن تاعى ەكى ساعات ءجۇرىپ وتىرىپ، اۋىلىنا اپارىپ تاستايدى. كۇندىك اقىسى - 4 مىڭ تەڭگە. كۇندەلىكتى قولما-قول تولەپ وتىرادى. مىڭ تەڭگەسىنە تۇسكى تاماعىمىزدى ىشەمىز، 3 مىڭ تەڭگەسىن ۇيىمىزگە اپارامىز دەيدى.

فينانستىق زاڭ بۇزىلعانى كوزگە ۇرىپ تۇر.

وسى ارادا اڭگىمەگە ەكىنشى جاستاۋ ايەل ارالاستى.

-نەگىزىندە ءبىزدىڭ كۇندىك اقىمىز 9 مىڭ تەڭگە كورىنەدى. 4 مىڭىن بىزگە بەرىپ، 5 مىڭىن وزدەرى قالتالارىنا سالىپ الادى ەكەن، وڭباعاندار!

- ونى سىزگە كىم ايتتى؟

- انوۋ، جولدىڭ ار جاعىندا جۇرگەن كوك كاستۇمدى جىگىت ايتتى.

- ول جىگىت كىم؟

- وسى اراداعى جۇمىستى باسقارىپ جۇرەدى.

جۇمىسشى ايەلدىڭ بەرگەن اقپاراتى راس بولسا، الاياقتىق پەن ادام قاناۋ فاكتىسى ايعايلاپ تۇر.

- رۇقسات ەتسەڭىزدەر، سىزدەردى ۆيدەوعا ءتۇسىرىپ السام.

- تۇسىرە بەرىڭىز! تەلەۆيزوردان كورسەتىڭىزشى! - دەپ جاتىر الگى ايەل.

جانقالتامنان سمارتفونىمدى شىعارىپ ۆيدەوعا تۇسىرە باستاعانىم سول ەكەن، جولدىڭ ار جاعىندا جۇرگەن الگى كوك كاستۇمدى جىگىت "نەگە تۇسىرەسىز؟ تۇسىرمەڭىز!" دەپ ايعايلاپ، جانۇشىرا ماعان قاراي جۇگىردى. ماعان جەتە بەردى دە، كامەرانى وزىنە قاراي بۇرعانىمدى بايقاپ، ءجۇزىن كورسەتكىسى كەلمەدى مە ەكەن، تەرىس قاراپ كەتتى.

نەگە ەكەنىن قايدام، سمارتفونىم دا ءدال سول ارادان ءتۇسىرۋىن توقتاتىپتى. ۆيدەونىڭ باس جاعى دا تولىق جازىلماي قالىپتى.

وسى پوستتى جازعانداعى ايتپاعىم نە؟

اۋىلدا جۇمىس بولسا، وسىناۋ 18 ادام كۇندە ءارلى-بەرلى 4 ساعات جول ءجۇرىپ، بولىمسىز تيىن-تەبەن ءۇشىن وسىلاي تەنتىرەمەس ەدى.

دامىعان ەلدەردەگىدەي ەكى ارادا ەلەكتريچكا قاتىناسا، مۇمكىن 4 ساعات ءبىر ساعاتقا قىسقارار ما ەدى.

مەملەكەتتىڭ بالالارعا تولەيتىن جاردەماقىسى مەن زەينەتاقىسى مول بولسا، قارت انا بەينەتىنىڭ زەينەتىن كورەر شاعىندا بۇلايشا ارقا ەتى ارشا، بورباي ەتى بورشا بولىپ جۇرمەس ەدى.

جەمقورلىققا تۇساۋ سالىنسا، ادامنىڭ ادال اقى، ماڭداي تەرى اردان بەزگەن الاياقتارعا جەم بولماس ەدى.

شىلي ارمانداپ كەتتىم-اۋ دەيمىن. ارماندار ورىندالادى دەيدى عوي. مەن سوعان سەنەم.

ال ازىرگە ءادىل قازاقستان ورناتۋشىلاردىڭ قۇلاعىنا التىن سىرعا.

گۇلماريا بارمانبەكوۆا

Abai.kz