قىزىلوردا وبلىسىندا قاڭتار وقيعاسى كەزىندە جاپپاي تارتىپسىزدىككە قاتىسقان ەر ادام سوتتالدى.

قىزىلوردا وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا جاپپاي تارتىپسىزدىكتەرگە قاتىسىپ، اسكەري قىزمەتشىنىڭ ومىرىنە قول سۇعىپ، لاڭكەستىك ارەكەت جاسادى دەپ ايىپتالعان قازىبەك قۇدايبەرگەنوۆ ەسىمدى ازاماتقا قاتىستى قىلمىستىق ءىس قارالدى.

سوتتا انىقتالعانداي، 5 قاڭتاردا سوتتالۋشى قالاداعى ساۋدا ۇيلەرىنىڭ ءبىرىنىڭ الدىندا بولعان جاپپاي تارتىپسىزدىككە قاتىسۋ كەزىندە اسكەري قىزمەتشىگە قارسى كۇش قولدانىپ، «كاماز»  اسكەري كولىگىنە وتىرىپ العان. كولىككە وتىرعاننان كەيىن گاز پەدالىن سوڭىنا دەيىن باسىپ، ونى كىرپىشپەن تىرەپ، ارتىنشا كولىكتى شەگىنىپ بارا جاتقان اسكەري قىزمەتشىلەر ساپىنا قاراي بۇرىپ، ءوزى كولىكتەن سەكىرىپ تۇسكەن.

سونىڭ سالدارىنان جۇك كولىگى ءبىر اسكەري قىزمەتشىنى باسىپ كەتكەن. ول العان جاراقاتىنان وقيعا ورنىندا كوز جۇمعان.

سوتتالۋشىنىڭ كىناسى كۋالاردىڭ ايعاقتارىمەن، قىلمىستىق ءىس ماتەريالدارىنا تىركەلگەن بەينەجازبالارمەن، سونداي-اق سوت-مەديتسينالىق ساراپتاماسىنىڭ قورىتىندىسىمەن دالەلدەندى.

سوت جاۋاپتىلىق پەن جازانى جەڭىلدەتەتىن جانە اۋىرلاتاتىن ءمان-جايلاردى ەسكەرە وتىرىپ، قۇدايبەرگەنوۆتى 17 جىلعا باس بوستاندىعىنان ايىرۋ، قىلمىستىق-اتقارۋ جۇيەسىنىڭ قاۋىپسىزدىگى بارىنشا جوعارى مەكەمەلەرىندە وتەۋ تۋرالى ۇكىم شىعاردى.

قۇدايبەرگەنوۆتىڭ ءوزى ايىبىن مويىنداعان جوق. ازاتتىق ونىڭ سوت ۇكىمىنەن ەسەڭگەرىپ قالعانىن جانە كوز جاسىن تىيا الماعانىن جازادى.

34 جاستاعى قازىبەك قۇدايبەرگەنوۆتىڭ جاقتاستارى التى ايعا سوزىلعان سوتتا ونىڭ ادۆوكاتتارى دالەلدەر كەلتىرگەنىمەن سوت بىردە-ءبىرىن ەسكەرمەگەنىن ايتادى.

ازاتتىقتىڭ جازۋىنشا، سوت ۇكىمى ءالى كۇشىنە ەنگەن جوق، ەكى تاراپتىڭ اپەللياتسيالىق شاعىم تۇسىرۋگە قۇقىعى بار.

Abai.kz