بۇگىن ءماجىلىس كۋلۋارىندا جۋرناليستەردىڭ «قازاقستاندى رەسەي پروپاگانداسىنان قالاي قورعايمىز؟ رەسەيلىك ارنالارعا شەكتەۋ قويىلا ما؟» دەگەن سۇراعىنا اقپارات جانە قوعامدىق دامۋ ءمينيسترى دارحان قىدىرالى جاۋاپ بەردى.

«اقپاراتتىق قاۋىپسىزدىك ءبىزدىڭ باسىم باعىتتارىمىزدىڭ ءبىرى. بىراق، ءبىز سوتتىڭ ۇكىمىمەن عانا شەكتەي الامىز. وسىعان بايلانىستى ازاماتتارىمىزدىڭ شاعىمى مەن سوت ۇكىمى بولسا، ءبىز ونى ورىندايمىز. قازىر جالپى مونيتورينگ جاساپ جاتىرمىز. بۇعان قاتىستى كوپتەگەن ماسەلە سىرتقى ىستەر مينيسترلىگىنىڭ قۇزىرەتىندە»، - دەدى مينيستر.

رەسەي تەلەارنالارىنىڭ بۇرىننان پروپوگاندالىق ساياساتتى بەلسەندى جۇرگىزىپ كەلە جاتقانى كوپكە ءمالىم. قازاقستاننىڭ تۇتاستىعىنا، مەملەكەتتىگىنە، تىلىنە قاتىستى كوپتەگەن داۋلى مالىمدەمەلەر ايتالىپ كەلەدى. اسىرەسە رەسەي-ۋكراينا سوعىسى باستالعالى ونىڭ قاۋپى ءتىپتى، ارتا ءتۇستى.

دەگەنمەن، وسى كۇنگە دەيىن قازاقستان تاراپىنان رەسەي ارنالارىنا توقتاۋ بولماي كەلەدى. ءبىز بۇل تۋرالى بىرنەشە جىلدان بەرى جازىپ كەلەمىز. الەمنىڭ وركەنيەتتى ەلدەرى رەسەي ۋكرايناعا باسقىنشىلىق شابۋىل جاساعاننان كەيىن، ونىڭ ارەكەتىن قاتتى سىناپ، باسقا ونىمدەرىنە سالعان سانكتسيالارىن ايتپاعاندا، اقپارات قۇرالدارىنا تىيىم سالعان. ءتىپتى، ىرگەلەس ەلدەردە مامىر ايىندا رەسەي تەلەارنالارىنىڭ ءبىرازى بۇعاتتالعانى تۋرالى اقپارات شىقتى.

تۇركىمەنستاندا ەڭ ءىرى بايلانىس وپەراتورى – اشحاباد قالالىق تەلەفون جەلىسى تاراتاتىن رەسەيلىك «روسسيا-1» جانە «زۆەزدا» تەلەارنالارى حابار تاراتۋدى توقتاتسا، قىرعىزستاندا «روسسيا-24»، «روسسيا كۋلتۋرا» جانە «زۆەزدا» ارنالارى ۋاقىتشا بۇعاتتالدى.

«بىرقاتار ەلدەردە بۇكىلرەسەيلىك تەلەارنالاردى تاراتۋعا زاڭنامالىق شەكتەۋلەر قابىلدانۋىنا بايلانىستى - حالىقارالىق سپۋتنيكتەردە بۇكىلرەسەيلىك مەملەكەتتىك تەلەۆيزيا مەن راديوستانتسيا كومپانياسىنىڭ تەلەارنالارىن تاراتۋ بىرجاقتى تۇردە توقتاتىلدى»، - دەدى «اقنەت» قىرعىز تەلەكوممۋنيكاتسيالىق كومپانياسى.

رەسەي-ۋكراينا سوعىسى باستالعاننان سوڭ رەسەيلىك ارنالاردىڭ ۇگىت-ناسيحات ارەكەتىنەن قاۋىپتەنگەن بەلسەندىلەر 2022 جىلعى ناۋرىز ايىندا ەلىمىزدەگى رەسەيلىك ارنالاردىڭ جۇمىس ىستەۋىنە قارسىلىق پەتيتسياسىن جاريالادى. بۇگىندە ونلاين پەتيتسياعا 10 مىڭنان 9972 ادام قول قويعان.

اقپارات جانە قوعامدىق دامۋ ءمينيسترى دارحان قىدىرالى بۇگىن «رەسەيلىك ۇگىت-ناسيحات ارنالارىن جابۋ سوت ۇكىمىمەن عانا ىسكە اساتىنىن ايتا كەلە، كوپتەگەن ماسەلەنى شەشۋ سىرتقى ىستەر مينيسترلىگىنىڭ قۇزىرىنا كىرەتىنىن» جەتكىزدى. ەندەشە سىرتقى ىستەر مينيسترلىگىنەن وسى ماسەلەنى شەشەتىن ارەكەت كۇتەمىز.

Abai.kz