مەملەكەت باسشىسى قاسىم-جومارت توقاەۆ بارشا قازاقستاندىقتى تاۋەلسىزدىك كۇنىمەن قۇتتىقتادى. 

«قۇرمەتتى وتانداستار!

1991 جىلعى 16 جەلتوقسان – ءتول تاريحىمىزداعى مەرەيلى بەلەس. بۇل – ەگەمەن ەل بولۋدى اڭساعان اتا-بابا ارمانى اقيقاتقا اينالعان ۇلى كۇن.

تاۋەلسىزدىك كۇنىنىڭ ايرىقشا ءمان-ماعىناسى بار. ازاتتىق ءۇشىن ارپالىسقان ۇلت پەرزەنتتەرىن ەل جادىندا ماڭگى ساقتاۋ – قاسيەتتى پارىزىمىز. ولاردىڭ وتانشىلدىق قاسيەتى – بۇگىنگى جانە بولاشاق ۇرپاققا ءاردايىم ۇلگى-ونەگە.

ءبىز تامىرى تەرەڭ مەملەكەتتىگىمىزدىڭ ماڭىزدى بەلەستەرىن ۇلىقتاپ، ۇلتتى ۇيىستىراتىن ورتاق قۇندىلىقتاردى نىعايتا بەرەمىز. سول ارقىلى قاستەرلى تاۋەلسىزدىگىمىزدىڭ تۇعىرىن بيىكتەتە تۇسەمىز.

تاۋەلسىزدىك – باعا جەتپەس بايلىق. ءبارىمىز ونى كوزدىڭ قاراشىعىنداي ساقتاۋىمىز كەرەك. مەملەكەتىمىزدىڭ ەگەمەندىگىن، ەلىمىزدىڭ اماندىعى مەن جەرىمىزدىڭ تۇتاستىعىن قورعاۋ – ءار ازاماتتىڭ قاستەرلى بورىشى.

بيىل ەلىمىز ءۇشىن بەتبۇرىستى جىل بولدى. بۇرىن-سوڭدى بولماعان سىن-قاتەرلەرمەن بەتپە-بەت كەلدىك. ەلدىگىمىزگە ىشتەن دە، سىرتتان دا زور قاۋىپ ءتوندى. دەگەنمەن مىزعىماس بىرلىك پەن ىرىس-ىنتىماقتىڭ ارقاسىندا بارلىق قيىندىقتى ەڭسەرىپ كەلەمىز.

ءبىز اۋقىمدى ساياسي جانە ەكونوميكالىق رەفورمالاردى قولعا الىپ، مەملەكەتىمىزدى جاڭعىرتۋدىڭ جاڭا كەزەڭىنە قادام باستىق. بۇل باستامالاردى تابىستى جۇزەگە اسىرۋ – ارقايسىمىزدىڭ قولىمىزدا.

ەگەمەن ەلىمىزدى ودان ءارى دامىتۋ – الدىمىزدا تۇرعان باستى مىندەت. ءبىز وسى جولدا ايانباي ەڭبەك ەتۋىمىز قاجەت. سوندا عانا قازاقستان قۋاتتى مەملەكەتكە اينالادى.

بارشاڭىزدى بۇگىنگى ۇلىق مەرەكەمەن شىن جۇرەكتەن قۇتتىقتايمىن!

سىزدەرگە زور دەنساۋلىق، باق-بەرەكە تىلەيمىن! قازاقستانىمىز وركەندەي بەرسىن! قاسيەتتى تاۋەلسىزدىگىمىز ماڭگى بولسىن!» - دەدى پرەزيدەنت.

Abai.kz