«سامۇرىق-قازىنا» اق كومپانيالار توبىنىڭ بىرىڭعاي قايىرىمدىلىق وپەراتورى قولداعان «تابىستى وتباسى» جوباسى ارقىلى ەلىمىزدىڭ 5 وڭىرىندە 117 ادام وقۋعا دەن قويدى. ونىڭ ىشىندە، قازىرگى كەزدە، تۇركىستان وبلىسىندا 27 ادام تەگىن كاسىپ كۋرستارىنان وتۋدە.

بۇگىن تۇركىستان وبلىسى اۋماعىندا الەۋمەتتىك جەلىدەگى ماركەتينگ، سۇلۋلىق سالوندارى، اسپازدىق  كاسىبي ماماندىقتارىن يگەرىپ جاتقان جوبا قاتىسۋشىلارىمەن «سامۇرىق-قازىنا» قورىنىڭ وكىلدەرى كەزدەستى. كەزدەسۋ بارىسىندا «سامۇرىق-قازىنا» اق قوعاممەن بايلانىس، الەۋمەتتىك-ەڭبەك قاتىناستارى جانە ەڭبەك قورعاۋ جونىندەگى باسقارۋشى ديرەكتورى عيبرات اۋعانوۆ جوبانىڭ ماڭىزدىلىعى مەن  قوعامعا بەرەر پايداسىن اتاپ ءوتتى.

«بۇل وڭىرلەردەگى جۇرتشىلىقتى قولداۋداعى بىرەگەي جوبالاردىڭ ءبىرى. ول ايماقتار مەن شالعاي اۋداندارداعى تۇرعىنداردىڭ قاجەتتىلىكتەرى مەن مۇمكىندىكتەرىن ەسكەرە وتىرىپ جۇزەگە اسىرىلۋدا. جوبانى ىسكە اسىرۋعا «سامۇرىق-قازىنا» اق كومپانيالار توبىنىڭ اتىنان شامامەن 200 ملن تەڭگە ءبولىنىپ وتىر. «تابىستى وتباسى» جوباسى بارىسىندا قاتىسۋشىلار تالىمگەرلەر مەن جاتتىقتىرۋشىلاردان ءبىلىم الىپ قانا قويماي، ءوز كاسىبىن باستاۋدا قاجەتتى جابدىقتارعا يە بولادى. بارلىق جوبا قاتىسۋشىلارىنا تەك ساتتىلىك تىلەيمىن»، - دەدى عيبرات اۋعانوۆ.

«تابىستى وتباسى» شەڭبەرىندە قاتىسۋشىلاردى سۇيەمەلدەۋ، تاجىريبەلىك ترەنينگتەر، شەبەرلىك ساباقتارى كوزدەلگەن. بۇل رەتتە ءار قاتىسۋشىعا جەكە كوزقاراس تانىتىلادى.

«سامۇرىق-قازىنا» اق كومپانيالار توبىنىڭ بىرىڭعاي قايىرىمدىلىق وپەراتورى – «Samruk-Kazyna Trust» الەۋمەتتىك جوبالاردى دامىتۋ قورىنىڭ كەشەندى قولداۋىمەن ىسكە اسىرىلۋداعى جوبا حالىقتىڭ نەعۇرلىم وسال توپتارىنىڭ وكىلدەرىن، ونىڭ ىشىندە كوپبالالى جانە از قامتىلعان، سونداي-اق جالعىزباستى جانە ەرەكشە قاجەتتىلىكتەرى بار بالالاردى  تاربيەلەپ وتىرعان وتباسىلاردى، ولاردان شىققان جاستاردى كەشەندى وقىتۋعا باعىتتالعان.

جوباعا قاتىساتىن 300 ادامنىڭ ءتىزىمى جەرگىلىكتى اتقارۋشى ورگاندار تاراپىنان ۇسىنىلدى.

«جۇمىسسىزبىن، التى بالانىڭ اناسىمىن. ءبىزدىڭ وبلىستا ىسكە اسىرىلۋداعى «تابىستى وتباسى» جوباسىنا قاتىسقانىما وتە قۋانىشتىمىن. قازىرگى ساتتە سارىاعاش اۋدانىندا الەۋمەتتىك جەلىدەگى ماركەتينگ ماماندىعىن تاڭداپ، سول بويىنشا كۋرستان ءوتىپ جاتىرمىن. الداعى ۋاقىتتا قاجەت بولاتىن اقپاراتتى يگەرۋدەمىن. بولاشاقتا ءوزىمنىڭ كاسىبىمدى اشامىن. العىسىم شەكسىز!»، - دەپ ويىمەن ءبولىستى جوباعا قاتىسۋشى دينارا قالتاەۆا.

«مەن كوپبالالى انامىن. جاسىم 36-دا. بۇگىندە اسپاز كاسىبىن يگەرۋ ءۇشىن جوباعا قاتىسىپ وتىرمىن. وسى جوباعا كەلگەنىمە وتە قۋانىشتىمىن. ۇيىمداستىرۋشىلارعا، تالىمگەرلەرگە ۇلكەن راحمەت. بولاشاققا ۇلكەن قادام جاساۋعا كەرەمەت مۇمكىندىك بەرىپ جاتىرسىزدار، وسىنى بارىنشا پايدالانۋعا تىرىسامىن»، - دەپ العىسىن جەتكىزدى كەلەسى جوباعا قاتىسۋشى ساۋلە ءابدىراحمانوۆا.

بىرەگەي جوبانىڭ قاتىسۋشىلارى قىسقا مەرزىمدە ءوز ءىسىن اشۋ ءۇشىن بارىنشا ءبىلىم مەن داعدىلاردى الادى. ءبىر ايلىق وقۋدان وتكەن تۇلەكتەردى، تاجىريبەلى تالىمگەرلەر ءۇش اي بويى سۇيەمەلدەپ وتىرادى. جوبا سوڭىندا ۇلىتاۋ، اباي، جەتىسۋ، اقتوبە جانە تۇركىستان وبلىستارىنداعى بەس باعىت بويىنشا ارنايى ماماندىق يگەرگەن قاتىسۋشىلارعا سەرتيفيكات تابىستالادى. اتاپ وتەر جايت، وقۋدى ءساتتى اياقتاعاندارعا ءوز ءىسىن اشۋ ءۇشىن قولداۋ قارجىلاي ەمەس، ۇيرەنگەن كاسىبىنە قاجەتتى قۇرال-جابدىق تۇرىندە بەرىلەدى.

وقۋدىڭ ەكىنشى كەزەڭى قاڭتار ايىندا قولعا الىنىپ، 183 قاتىسۋشى تىگىنشىلىك، اسپازدىق، سۇلۋلىق سالوندارى، ەلەكتر مەحانيگى جانە الەۋمەتتىك جەلىدەگى ماركەتينگ باعىتتارى بويىنشا قامتىلادى دەپ جوسپارلانىپ وتىر.

«تابىستى وتباسى» قايىرىمدىلىق جوباسىن ىسكە اسىرۋ كەزەندەرى تۋرالى اقپارات باق بەتىندە جانە @tabysty.otbasy ينستاگرام پاراقشاسىندا ورنالاستىرىلادى.

Abai.kz