قازاقستان رەسپۋبليكاسىنىڭ
سىرتقى ىستەر ءمينيسترى م.ب. تىلەۋبەردىگە!

قۇرمەتتى مۇحتار بەسكەنۇلى!

مەنىڭ قولىما WhatsApp جەلىسى ارقىلى تومەندەگى حات پەن ەكى دانا فوتو سۋرەت كەلىپ ءتۇستى. بىردەن تانىدىم، بۇل – جانارگۇل.

كەزىندە الماتىدا تالاي مارتە كورگەم. جاقىن ارالاسپاسام دا، سىرتتاي جۋرناليست رەتىندە بىلەتىنمىن. مىنە، سول قارىنداسىمىز قازاقستانداعى تانىستارىنىڭ ءبىرىنىڭ WeChat جەلىسى ارقىلى مەنىڭ اتىما حات جازىپ، كومەك سۇراپتى.

جانارگۇلدىڭ حاتىن وقىپ، ساي سۇيەگىم سىرقىرقىراپ كەتتى. توپ-تولىق قىزدىڭ ابدەن ارىعان بەينەسى جۇرەگىمدى سىزداتتى. ەگەر، ونىڭ سول قيناۋدان كەيىنگى قۇر سۇلدەسى قالعان سۋرەتىن كورسەم، مەن ونى مۇلدە تاني الماس ەدىم.

قارىنداسىمىز قازاقستاندا «ىقتيارحاتپەن» جۇرگەن كورىنەدى. ۇرىمجىگە بارىپ، اتالمىش «وقۋ ورتالىعىنا» تۇسكەن سەكىلدى. ار جاعى ايتپاساق تا بەلگىلى...

سوڭعى بەس جىلدىڭ كولەمىندە قىتايداعى از ساندى ۇلتتارعا قاراتا جۇرگىزىلگەن گەنوتسيدتى بۇكىل دۇنيەجۇزى بىلەدى. جانارگۇل دە سونىڭ ءتىرى قالعان قۇرباندارىنىڭ ءبىرى بولىپ وتىر.

اتالعان ساياسي جانىشتاۋدان بۇل كۇندە ونداعى جۇرتتىڭ ءتىلى بايلانىپ قالعان. شىڭجاڭدا تۇرىپ، بارلىق قازاق ءوزى جايلى اقپارات ايتۋدان قالعان. تەك، «بىزدە ءبارى جاقسى!» دەگەننەن باسقا ءسوز ايتا المايتىن كۇيگە تۇسكەن. ارى كەتكەندە، استارلاپ قانا بىردەمەلەر ايتقان بولادى...

ولىمنەن باسقانىڭ ءبارىن كورگەن جانارگۇلدىڭ ايانار جەرى قالماعانى كورىنىپ تۇر. ءۇرىمجىنىڭ قاق ورتاسىندا قاسقايىپ تۇرىپ، قازاقستانعا حات جازۋ – ەڭ اقىرعى قادام!

قانداستار ماسەلەسىمەن اينالىسىپ جۇرگەن سوڭ، ماعان حات جازىپتى. مەنىڭ قولىنان نە كەلەدى دەيسىز؟ كەلەتىن ەدى عوي، تىڭدار قۇلاق بولسا!

قۇرمەتتى مۇحتار بەسكەنۇلى!

ايتپاقشى، ۇرىمجىدەگى ۆيزالىق ورتالىقتىڭ باسشىسى جونىندە دە وكپەسىن ايتىپتى جانارگۇل. ول قىزمەتكەرىڭىزدى دە جونگە سالىڭىز.

بۇدان بىلايعى جەردە «ول قىتاي ازاماتى ەكەن...» دەگەن ءسوز بولماۋ كەرەك!

«قازاقستان رەسپۋبليكاسىنىڭ مەملەكەتتiك تاۋەلسiزدiگi تۋرالى» زاڭىنىڭ 8-بابىندا «قازاقستان رەسپۋبليكاسى رەسپۋبليكا شەگiنەن تىس جەرلەردە تۇراتىن قازاقتاردىڭ ۇلتتىق-مادەني، رۋحاني جانە تiلدiك قاجەتتەرىن قاناعاتتاندىرۋعا قامقورلىق جاسايدى، ولار ازاماتى بولىپ وتىرعان مەملەكەتتەرمەن جاسالعان شارتتار نەگiزiندە بۇل ازاماتتاردىڭ مۇددەلەرiن قورعايدى» دەگەن نورما بار.

قىتاي مەن قازاقستان تاتۋ كورشى، ستراتەگيالىق ارىپتەس ەلدەر. ەكى جاقتىلى جاسالعان كەلىسىمدەردىڭ ىشىندە ەكى ەلگە ورتاق قازاق ماسەلەسى دە قارالعان دەپ ويلايمىن.

ەندەشە، قازاقستان تارابى «قازاقستان رەسپۋبليكاسىنىڭ مەملەكەتتiك تاۋەلسiزدiگi تۋرالى» زاڭىنىڭ اتالعان نوماسىن بۇلجىتپاي ورىنداۋعا مىندەتتى. ەگەر، ورىنداماسا، وندا تاۋەلسىزدىكتى تارك ەتكەندىك بولىپ ەسەپتەلەدى.

سىزدەن جانارگۇل جۇماتايقىزىنىڭ ماسەلەسىن ءوز قولىڭىزعا الىپ، قىتاي جاعىنا سۇراۋ سالۋىڭىزدى وتىنەمىن. سونداي-اق، پەكيندەگى قازاقستان رەسپۋبليكاسىنىڭ توتەنشە جانە وكىلەتتى ەلشىسى نۇرىشەۆ شاحرات مىرزانى شىڭجاڭعا جىبەرىپ، جانارگۇلدىڭ ءحالىن ءبىلدىرۋىڭىزدى، قازاقستانعا ورالتۋعا ىقپال ەتۋىڭىزدى سۇرايمىن.

قازاقتىڭ قىزىن قارا تۇنەك قاپاستا قالدىرۋ – ەلدىگىمىز بەن جىگىتتىگىمىزگە سىن!

قۇرمەتپەن،

اۋىت مۇقيبەك،

«قۇرمەت» وردەنىنىڭ يەگەرى.

جانارگۇلدىڭ حاتى قاز-قالپىندا: مەنى وسى توزاقتان قۇتقارۋىڭىزدى وتىنەمىن!

اۋىت مۇقيبەكۇلىنا!

قۇرمەتتى اۋىت اعا، امان-ەسەنسىز بە؟

مەن قحر شۇار ءۇرىمجى اۋدانىنىڭ تۋماسىمىن. قازىر ءۇرىمجى قالاسى سايباع رايونى ساڭفاڭگۋ جولى 59-ءنومىر، 4-رايۋن، 11-بينا، 1-پودەز، 202-پاتەردىڭ تۇرعىنى جۇماتايقىزى جانارگۇل بولامىن. ءتول قۇجات نومەرىم: 650105197511302220

اعا، مەن ءسىزدى جاقسى تانيمىن ءارى ەل ءۇشىن جاساعان ەڭبەكتەرىڭىزدى اسا جوعارى باعالايمىن. ءبىر كەلسە، اۋىت اعانىڭ قولىنان كەلەدى-اۋ، دەگەن ۇمىتپەن، سىزگە وسى حاتتى جازىپ وتىرمىن.

قايتەيىن، قارىنداسىڭىز بۇگىن جاعداي بيلەپ، ءتۇرلى قيىندىق كەشىپ، ءسىزدىڭ الدىڭىزعا رەسمي تۇردە كومەك سۇراپ، ءدات ايتقالى بارعان قانداستارىڭىزدىڭ قاتارىنان تابىلىپ وتىر.

قىسقاشا ايتار بولسام، مەن وسىنداعى قۇلقىن جايلاپ، قارا نيەتى قابىنعان زومەگەرلەردىڭ ء(ۇرىمجى اۋداندىق ۇكىمەت) تەگەۋرىنىنە ءىلىنىپ، اتالمىش «وقۋ ورنى» (2-قاماقحانا، 3-قاماقحانا) دەگەنىندە جازىقسىز 2 جىل 23 كۇن قامالدىم (26.09.2017 -18.10.2019)!

بۇلار مەنى الداپ اپارىپ، ۇستاپ، قاماعاننان كەيىن، ماعان «مەن تەلەفونىما instagram, facebook سەكىلدى تەرروريزمدى ءناسيحاتتايتىن جۇمساق بولشەك تۇسىرگەم، سول بولشەكپەن ناماز وقىپ وتىرعان ادامنىڭ سۇرەتىن ءتۇسىردىم، يدەيام ۋلانعان، پارتيا مەن ۇكىمەت ءبىر رەت شىعار جول بەرسىن دەپ، «قاتەلىگىڭدى» تانىپ، مويىندا!» دەپ قينادى.

بىراق مەنى قانشا قيناسا دا ىستەمەگەن ءىستى موينىما المادىم! ءالى كۇنگە دەيىن مويىنداماي كەلەم! وقۋدا قولىما كوزىر، اياعىما كىسەن سالىندى. سودان وڭ اياعىمنىڭ توبىعىمنىڭ ءسىڭىرى جانشىلعان. ينە سۇعىپ قيناۋ، قاتە ءدارى بەرىپ ۋلاۋ دەگەننىڭ ءبارىن كوردىم. 86 كگ سالماقپەن كىرىپ، بىرنەشە اۋرۋ جاماپ، 50 كگ مەن قۋ سۇيەك بولىپ، ايتەۋ ءتىرى ورالدىم ۇيىمە!

ول – ول ما، قۋىرداقتىڭ كوكەسى وقۋىنان ورالعاننان كەيىن بولدى. ءتۇرلى كەمسىتۋ، قورقىتۋ، ۇركىتۋ، بوگەۋ، جانىشتاۋ، كۇن سايىن ەرتەلى-كەش مازالاۋ، زورلىق-زومبىلىق دەگەننىڭ ءتۇر-ءتۇرىن باسىمنان وتكەرىپ، ءالى كۇنگە دەيىن كورگىلىكتى كورىپ كەلەمىن. ءبىر-بىرىمەن استاسقان ارامدار بىلاي بارسام، اربانى سىندىرىپ، ولاي بارسام وگىزدى ولتىرەدى. وزدەرىنىڭ جەگەن-ىشكەنى مەن قىلمىسىن بۇركەمەلەۋ ءۇشىن، جان تالاسىپ، نەتۇرلى قاسكويلىككە بارۋدا. بۇلار مەنى جۇلمالاپ ءجۇرىپ دەنساۋلىعىمنان، باسپانامنان، جۇمىسىنان، قالىپتى تىرلىگىمنەن، ەركىندىگىمنەن ايىرىپ تاستادى. 2017 جىلى بەرىلگەن سىيلىق اقشامنىڭ بارلىعىن جەپ قويدى. سوڭعى كەزدە تىپتەن «اتامنىڭ تاياعى سىلتەنگەن سايىن اسا تيەدى» بولىپ بارادى. ماعان بۇل جەردە جان باعۋ ەمەس، جان ساۋعالاۋدىڭ ءوزى ۇلكەن مۇڭ! ۇلتتىقتاردىڭ نوپوسىن جوتكەمەيمىز دەپ، قىل-اياعى ىشكى ولكەگە جوتكەپ بەرمەيدى. ءتىپتى، ۇرىمجىدەن اتتاپ شىعارمايلى. نە جۇمىس ىستەتكىزبەيدى. بۇل جەردە زاڭ مەن ءتارتىپ ساقتاۋ مەكەمەلەرىنىڭ قايدا قاراپ وتىرعانىن بىلمەيمىز. ادامدىق قۇقىق اتىمەن جوق. بارلىعىن وزدەرىن وكىمەت قارماعىنداعى مەكەمەمىز دەپ اتاپ العان ءشىچۇي باسقارادى. سول ءشىچۇي اۋرۋ دەسە اۋرۋسىڭ، سول قارا دەسە قاراسىڭ. ولار الدىمەن تۇلكىنىڭ كۇلكىسىمەن كۇلىپ كەلىپ ارباسا، ارتىنان ساقشىلار (ساڭفاڭگۋ پايشۋسۋو جانە باسقا) جىبەرىپ قىسىم جاسايلى. تالاپتار قويادى، وتىرىك سۇراۋلار سۋرايدى، شىرعالايدى. قاندايدا ءبىر WeChat جەلىسىندەگى جەكەلىك ينفورماتسيالارىڭدى قالاعانىنشا وزگەرتە بەرەدى. سول ارقىلى ءجۇرىس-تۇرىسىڭا باقىلاۋ  قويىپ، قۇعىنداي الادى...

مەن، مىنە، وسىنداي ءومىر كەشىپ جاتىرمىن! نەگە بۇيتە بەرەسىڭدەر؟ مەندە قانداي ءبىر قىلمىس بار ما؟! ءبىر بەيۋازدى وسىنشا جازىقسىز مىجعىلاپ سورلاتا بەرەسىڭدەر مە؟ زاڭ قايدا؟ ادامدىق قۇقىق قايلا؟ جاندارىڭ اشىماي ما؟

نەشە مارتە سۇرادىم ساقشىلاردان. ول بايقۇستاردىڭ «ءسىز ەشقانداي قاتە جوق. بار دەگەن سوڭ كەلدىك. ءبىزدىڭ دە جانىمىز اشيدى سىزگە، بىزدە دە امال جوق!» دەيدى، كەيبىرەۋى. كەيبىرەۋى توتە قۇقاي كورسەتەدى.

مەن وسىنداعى ءار دارەجەلى قۇزىرلى ورگاندارعا جاعدايىمدى ءتۇسىندىرىپ، وبالدى بولعانىمدى ايتسام دا ەش ءونىم بولمادى، چىن چۋانگوعا حات تا جازىپ، بادىرايعان دالەلدەر كورسەتتىم، بىراق الدىنا جەتكەن-جەتپەگەنىن بىلمەيمىن. ورتالىقتاعى ارىز-شاعىم مەكەمەسىنە جازعانىم دا، شىچۋي ساقشى  باستاپ كەلىپ، سەنى قايتادان وقۋعا نەمەسە جىندىلار ۇيىنە اپارىپ تاستايمىز دەپ، ۇيگە باسىپ كىرىپ سۇيرەلەپ زورلىقپەن ماشيناعا باسپاقشى بولدى. ماڭايىمداعى ادامدار ايتىسىپ-تارتىسىپ ءجۇرىپ الىپ قالماعاندا، وسى كۇندە نە بولارىمدى كىم ءبىلسىن؟!

وسىعان ۇقساس جاعدايلار ءبىر ەمەس، نەشە مارتە قايتالاندى. تاعىسىن تاعىلار!

مەن ولاردىڭ قيتۇرقىلىعىن تىلمەن جەتكىزە المايمىن! الماتىداعى ىستەپ وتىرعان جۇمىسىم اتسىز-اياقسىز قالىپ، وندا بارا الماي وتىرعانىما التى جىل بولدى. شىڭجاڭدىقتارعا پاسپورت بەرۋدە ورتالىقتان ەرەكشە شارتتار قويىلعان دەپ، جوقتى سىلتاۋراتىپ پاسپورتىمدى جيىپ الىپ، سىرەسىپ بەرمەي وتىر.

سول اتالمىش شارتىنىڭ بىرەۋى – قازاقستان رەسپۋبليكاسىنىڭ سىرتقى ىستەر مينيستىرلىگىنەن «قازاقستاندا شۇعىل جۇمىس بار» دەگەن حات الدىرۋ بولاتىن.

مەنىڭ الماتىداعى جۇماعۇلوۆا ءلاززات وڭعارقىزى (تەل: 87478747271) ەسىمدى سەرىكتەسىمنىڭ اتىنان سول مازمۇنداعى حات ۇرىمشىدەگى قازاقستاننىڭ ۆيزالىق ورنىنا تۇسكەلى ءتورت ايدىڭ ءجۇزى بولدى.

بۇلار حاتتىڭ نۇسقاسىن نە وسىنداعى ۋايبانعا جولدامايدى، نە قولىما بەرمەيدى! باستىعى بولات سىزدىبايەۆ دەگەن مىرزا جوقتى سىلتاۋراتىپ، اندا- مىندا سەندەتەدى. ولمەكتىڭ ۇستىنە تەپپەك بولىپ، بار سەنگەن بايتالعا... دەگەننىڭ كەرىن قۇشىپ، ءوزىم شارشاپ جۇرگەندە جانىم قينالىپ، ءتىپتى تيتىقتاپ ءبىتتىم. باسقاسى باسقا عوي، قازاقتىڭ وسىنداعى قارا شاڭىراعى دەپ، پانا تىلەپ بارعاندا جاندارى اشىعاننىڭ ورنىنا، مىنالاردىڭ كەبىن ەندى وسىلار كيىپ العان با دەيسىڭ.

مەن 2020 جىلعى 16 جەلتوقساننان باستاپ جىلاپ-ەڭىرەپ كومەك سۇراپ، پرەزيدەنت قاسىم-جومارت توقاەۆتىڭ اتىنا ءوتىنىش حات تا جازدىم. بىراق، ەشقانداي جاۋاپ الا المادىم. ەلشىلىكتىڭ ءوزى كەلىپ تۇرعان دايىن حاتتى جەتەر جەرىنە جەتكىزبەگەنىنە جۇرەگىم قان جىلادى. ەندى ءوز قانداسىمنىڭ تىعىرىققا تىرەگەنى جانىما قاتتى باتتى. قايدا بارسام قورقىتتىڭ كورى، ءوستىپ ءجۇرىپ ءبىر كۇنى مەرت قىلا ما!! مەنىڭ جۇيكەم توزىپ بارادى، دەنساۋلىعىمدا دا اقاۋ كوپ!

اعا، وتىنەم، كومەك بەرىڭىز! مەن وبالدى بولعانىمدى تورتكىل دۇنيەگە ايتىپ كومەك سۇراعىم كەلەدى. ەگەر، شىنداپ كىرىسەر كىسى بولسا، اقيقاتى سالعان جەردەن قالقىپ شىعاتىنىنا مەن جۇرەگىمنەن سەنىپ تۇرمىن! مەنىڭ اتىمنان الىس-جاقىنداعى قۇزىرلى ورگاندارعا ءوتىنىش بەرىپ، ادامدىق قۇقىعىمدى قورعاۋعا ات سالىسىپ، مەنى وسى توزاقتان قۇتقارۋلارىڭىزدى وتىنەم!

سىزدەن كوپ ءۇمىت كۇتىپ، كومەك سۇراعان قارا كوز قارىنداسىڭىز

جانارگۇل جۇماتايقىزى

بايلانىس تەلەفون جانە ۋيچاتىم:

18449890393

Abai.kz