حالىق اراسىندا "قويان جىلى قۇت بولادى، كەيدە مالعا جۇت بولادى" دەگەن دانالىق بار. قويان جىلى ورتالىق ازياعا قىس قىسپاعىن سالۋدا.

جەلتوقساندا قازاقستاننىڭ ەكىباستۇز قالاسىندا جىلۋ جۇيەسىندە اپات بولىپ، قالا جىلۋسىز قالدى. اپات سالدارىن بىرنەشە اپتادا ارەڭ جويعان بيلىك، كادرلىق شەشىمدەر قابىلدادى. ەكىباستۇزداعى اپاتقا بايلانىستى پاۆلودار وبلىسىنىڭ اكىمى قىزمەتىنەن كەتتى. ال ەكىباستۇز قالاسىنىڭ اكىمى تامىز ايىندا اۋىسقان بولاتىن. 

جىلۋ جۇيەسىندەگى اقاۋ تەك قانا قازاقستاندا ەمەس، كورشىلەس وزبەكستاندا دا بار. ءبىر اي بۇرىن وزبەكستان بيلىگى سۇيىتىلعان گازدىڭ تاپشىلىعىنا بايلانىستى گاز ەكسپورتىنا ۋاقىتشا تولىق تىيىم سالدى.

ەلدە ەنەرگەتيكا سالاسىندا داعدارىس بولۋدا. ەل استاناسى تاشكەنتتىڭ وزىندە جىلىتۋ جۇيەلەرى ىستەن شىعىپ، عيماراتتار جىلۋسىز قالعان. مەملەكەتتىك ورگان عيماراتتارى جىلۋدىڭ جوقتىعىنا بايلانىستى كەي تۇستا ونلاين قىزمەتكە اۋىسقان.

پرەزيدەنت ميرزيەەۆ ەلدەگى ەنەرگەتيكا سالاسىنداعى داعدارىستى دەرەۋ شەشۋگە تاپسىرما بەردى. ول پرەمەر-مينيسترگە جانە ەنەرگەتيكا مينيسترىنە جىلۋدى حالىققا جىلدام جەتكىزەتىن جۇيە قۇرۋدى تاپسىرىپ، حالىققا ناقتى اقپارات بەرۋدى جىلدامداتۋ كەرەكتىگىن ايتتى.

حالىققا گاز بەن كومىر جەتكىزۋ مەحانيزمىن ءتۇسىندىرۋدى تاپسىرا وتىرىپ، ەكى ايدىڭ ىشىندە شەتەلدەن بىلىكتى مامانداردى الدىرىپ، ەنەرگەتيكا سالاسىن وڭتايلاندىرۋ كەرەكتىگىن شەگەلەپ ايتتى. سۋىق كۇندەرى جارىق پەن جىلۋعا قارىز بولعان تۇرعىن ۇيلەردى جىلۋ-جارىق جۇيەسىنەن اجىراتۋعا تىيىم سالدى.

بۇگىنگى جيىن بارىسىندا ميرزيەەۆ تاشكەنت حوكيمى دجاحونگير ارتىقحودجاەۆ، ەنەرگەتيكا ءمينيسترىنىڭ ورىنباسارى شەرزود حودجاەۆ پەن "جىلۋ ەلەكترونستانتسيالارىنىڭ" باسشىسى فارحود ابدۋراحمانوۆتى قىزمەتىنەن شەتتەتتى. ول ەلدەگى جىلۋدىڭ تاپشىلىعىنا وسى ءۇش ازاماتتىڭ جۇمىسىنىڭ ساپاسىزدىعى كىنالى دەيدى.  "ايماقتىق جىلىتۋ جۇيەلەرى", "وزبەكمۇنايگاز", "وزترانسگاز" باسشىلارى ءۇش ايعا سىناق مەرزىمىندە قالدى. وسىلايشا ول كادرلىق اۋىس-ءتۇيىس جاساپ، ماسەلەنى شەشۋدە ناقتىلىق تانىتاتىنىن حالىققا كورسەتتى.

وزبەكستانداعى گاز تاپشىلىعى سالدارىنان بولعان بۇل داعدارىستىڭ ارتىندا رەسەيدىڭ "قازاقستان-رەسەي-وزبەكستان" گاز وداعىن قۇرۋ يدەياسىنىڭ قۇلاعى قالقيىپ تۇرۋى مۇمكىن دەيدى cاراپشىلار.

Abai.kz