Chocolife كومپانياسىنىڭ باسشىسى، كاسىپكەر راميل مۋحورياپوۆقا قاتىستى ءىس توقتاتىلدى. بۇل تۋرالى الماتى قالاسىنىڭ پروكۋراتۋراسى مالىمدەدى.

«سوتقا دەيىنگى تەرگەپ-تەكسەرۋ ناتيجەلەرى بويىنشا قىلمىستىق قۋدالاۋ ورگانى قىلمىستىق ءىس جۇرگىزۋ كودەكسىنىڭ 35-بابىنىڭ 1-بولىگى 2-تارماعىنا سايكەس قىلمىستىق قۇقىق بۇزۋشىلىق قۇرامىنىڭ بولماۋىنا بايلانىستى قىلمىستىق ءىستى توقتاتۋ تۋرالى پروتسەسسۋالدىق شەشىم قابىلدادى. الماتى قالاسىنىڭ پروكۋراتۋراسى پروتسەسسۋالدىق شەشىممەن كەلىستى»، - دەدى الماتى قالاسى پروكۋرورىنىڭ ورىنباسارى نۇرلان اۋعانباەۆ.

بۇعان دەيىن، الماتى قالالىق پوليتسيا دەپارتامەنتى راميل مۋحورياپوۆتىڭ كوپشىلىك قاۋىمنىڭ اشۋىن تۋدىرعان ءسوزىن باسشىلىققا الىپ، الەۋمەتتىك، ۇلتتىق، رۋلىق، ناسىلدىك، تاپتىق جانە ءدىني ارازدىقتى قوزدىرۋ فاكتىسىن تەكسەرۋ ءۇشىن سوتقا دەيىنگى تەرگەۋدى باستاعان بولاتىن.

ەستەرىڭىزدە بولسا، كاسىپكەر بىلتىر قازان ايىندا رەسەيلىكتەردى جيناپ الىپ، ۇلكەن كەزدەسۋ وتكىزگەن. سول جيىندا ول "قازاق تىلىندە سويلەۋ – مادەنيەتسىزدىك بەلگىسى ەكەنىن" ايتقان بولاتىن. ونىڭ ۆيدەوسى جەلىدە تارادى. بۇل مالىمدەمە كوپشىلىكتىڭ اشۋ-ىزاسىنا ءتيىپ، ونىڭ كومپانياسىنىڭ ونىمدەرىن ۇيالى تەلەفوندارىنان ءوشىرىپ جاتتى.

جۋرناليست زارينا احماتوۆا مۋحورياپوۆتى يمپەريالىق رەپرەسسيانىڭ مۇراسىنان باس تارتۋعا شاقىردى. ال جۋرناليست ايبار ولجاەۆ كاسىپكەردىڭ قىلىعى زاڭ بويىنشا جازاسىن الۋى كەرەك ەكەنىن جازدى.

«جاڭا قازاقستان» دەپۋتاتتار توبى دا كاسىپكەردىڭ ءسوزىن تەكسەرۋ كەرەكتىگىن ايتىپ، باس پروكۋرور بەرىك اسىلوۆقا حات جولداعان بولاتىن. دەپۋتاتتار باس پروكۋروردان مۋحورياپوۆقا قر قىلمىستىق كودەكسىنىڭ 174-بابى بويىنشا (“الەۋمەتتىك، ۇلتتىق، رۋلىق، ناسىلدىك، تەكتىك-توپتىق نەمەسە ءدىني الاۋىزدىقتى قوزدىرۋ”) شارا قولدانۋدى سۇرادى.

جۋرناليست كۇلتەگىن اسپانۇلى كاسىپكەردىڭ ۇستىنەن الماتى قالاسىنىڭ پروكۋراتۋراسىنا ارىز تۇسىرگەن.

«الماتى ق. پد ەقىسب باستىعىنىڭ مىندەتىن اتقارۋشى د.ە.ابيكۋلوۆ قول قويعان حاتقا سەنسەك، پد تەرگەۋ باسقارماسىنىڭ قر قىلمىستىق كودەكسىنىڭ 174-بابىنىڭ (“الەۋمەتتىك، ۇلتتىق، رۋلىق، ناسىلدىك، تەكتىك-توپتىق نەمەسە ءدىني الاۋىزدىقتى قوزدىرۋ”) 1-بولىگىمەن سوتقا دەيىنگى تەرگەپ-تەكسەرۋدى باستاعان.

بۇل ايىپتىڭ جازاسى زاڭدا ءۇش نۇسقادا كوزدەلگەن: 2 مىڭ-7 مىڭ اەك ايىپپۇل، 2-7 جىل ارالىعىندا باس بوستاندىعىن شەكتەۋ نەمەسە ايىرۋ. ايىپتى دەپ تانىلسا، سوت ءمان-جايدى ەسەكەرە وتىرىپ وسى ۇشەۋىنىڭ بىرەۋىن تاڭدايدى»،-دەپ جازدى ول الەۋمەتتىك پاراقشاسىندا.

كەيىنىرەك راميل مۋحورياپوۆ قازاقستان حالقىنان كەشىرىم سۇراعان ۆيدەو ۇندەۋ جاريالاپ، الداعى ۋاقىتتا قازاقشا ۇيرەنەتىنىن ايتقان بولاتىن.

Abai.kz