ۇيىم 24 قاڭتار كۇنگى حابارلاماسىندا رەسمي استانانى كىنالىلەردى جاۋاپقا تارتۋعا جانە اقپارات قۇرالدارىنىڭ ەركىن جۇمىس ىستەۋىنە جاعداي جاساۋعا شاقىرعان.
12 قاڭتاردان بەرى قازاقستاندا ءبىر ءجۋرناليستىڭ كولىگى ورتەنىپ، ءبىرىنىڭ پاتەرىنە "شابۋىل جاسالدى". رەداكتسيا كەڭسەسىنىڭ تەرەزەسى شاعىلىپ، ءبىر سايتتىڭ باس رەداكتورىنىڭ جەكە دەرەكتەرى ينتەرنەتكە جاريالانىپ كەتتى. بۇعان دەيىن پوليتسيا كولىكتى ورتەپ، رەداكتسيا كەڭسەسىنىڭ اينەك ەسىگىن شاقتى دەپ كۇدىككە ىلىنگەن بەس ءجاسوسپىرىمدى ۇستاعانىن حابارلاعان.
"جۋىردا جۋرناليستەرگە جاسالعان ەكى شابۋىلعا قاتىستى كۇدىكتىلەردى تەز انىقتاعانى ءۇشىن قازاقستان بيلىگى ماقتاۋعا تۇرارلىق بولسا دا، بيلىك اقپارات قۇرالدارىنا جاسالعان قورقىتۋ امالدارىن جان-جاقتى تەرگەۋگە كۇش سالۋى كەرەك جانە وعان تاپسىرىس بەرۋشىلەر جازالانۋعا ءتيىس. ەگەر بيلىك جۋرناليستەردىڭ قاۋىپسىزدىگىن قامتاماسىز ەتە الماسا، "جاڭا قازاقستان" جايلى ريتوريكاسى بوس ءسوز بولىپ قالا بەرمەك" دەدى ۇيىمنىڭ ەۋروپا جانە ورتالىق ازيا باعدارلامالارى بويىنشا ۇيلەستىرۋشىسى گۋلنوزا سايد.
قازاقستاندا كەيىنگى كەزدە تاۋەلسىز جۋرناليستەر مەن باسىلىمدارعا شابۋىل جيىلەگەن. وتكەن اپتادا جۋرناليست ۆاديم بورەيكونىڭ پاتەرىنىڭ ەسىگىنە بەلگىسىز بىرەۋلەر جەلىم جاعىپ، پودەزىن بوياپ كەتكەن. جۋرناليست پوليتسياعا ارىز ءتۇسىرىپ، وقيعانى كاسىبي قىزمەتىمەن بايلانىستىرعان. ونىڭ الدىندا Ulysmedia سايتىنىڭ باس رەداكتورى سامال يبراەۆا سايتتىڭ بۇزىلعانىن حابارلاپ، العاشقى بەتىنە ءوزى مەن وتباسىنىڭ جەكە دەرەكتەرى جاريالانىپ كەتكەنىن حابارلاعان.
ونىڭ الدىندا قاڭتارداعى ازاپتاۋلار تۋرالى اقپارات تاراتىپ جۇرگەن جۋرناليست دينارا ەگەۋباەۆا بەلگىسىز بىرەۋلەر كولىگىنە وت قويعانىن حابارلاعان. ىزىنشە پوليتسيا كۇدىكتى رەتىندە بەس ءجاسوسپىرىم ۇستالعانىن حابارلاعان.
ەلدە Elmedia رەداكتسياسى وتىراتىن بيزنەس ورتالىقتىڭ ءبىرىنشى قاباتىنداعى اينەك ەسىك كەيىنگى ءتورت ايدا التى رەت شاعىلىپ، كىرەبەرىسكە «Elmedia» دەپ قىزىل باياۋمەن جازۋ قالدىرىلعان.
20 قاڭتاردا پرەزيدەنتتىڭ ءباسپاسوز حاتشىسى رۋسلان جەلدىباي توقاەۆ "قۇقىق قورعاۋ ورگاندارىنا جۋرناليستەرگە قارسى باعىتتالعان بىرقاتار قىلمىس بويىنشا مۇقيات تەرگەۋ جۇرگىزۋدى تاپسىردى" دەپ مالىمدەگەن.
ء"ادىل ءسوز" ءباسپاسوز ەركىندىگىن قورعاۋ ۇيىمىنىڭ مالىمەتىنشە، 2023 جىلدىڭ العاشقى ايى وتپەي جاتىپ، قازاقستاندا جۋرناليستەرگە بەس شابۋىل جاسالعان.
"جۋرناليستەردى قورعاۋ كوميتەتى" 24 قاڭتار كۇنگى حابارلاماسىندا جۋرناليستەرگە جاسالعان شابۋىل جونىندە قازاقستان ىشكى ىستەر مينيسترلىگىنە رەسمي ساۋال جىبەرگەنمەن جاۋاپ كەلمەگەنىن جازدى.
"شەكاراسىز تىلشىلەر" حالىقارالىق ۇيىمىنىڭ ء"سوز بوستاندىعى يندەكسىندە" قازاقستان 180 ەلدىڭ اراسىندا 122-ورىندا تۇر. ەلدە ءسوز بوستاندىعىنىڭ احۋالى كۇردەلى دەپ باعالانادى.
Abai.kz
