2022 جىلى قازاقستاننان وزبەكستانعا جونەلتىلگەن قارجى كولەمى كوش باستاپ تۇر. LS-نىڭ جازۋىنشا، بۇدان باسقا، ەلىمىزدەن تۇركياعا، رەسەيگە، قىرعىزستانعا جانە گرۋزياعا بەلسەندى تۇردە اقشا اۋدارىمدارى جاسالعان ەكەن.

وزبەكستانعا 289,5 ملرد تەڭگە اقشا اۋدارىمى جاسالعان، اسىرەسە تامىز ايىندا ەڭ كوپ، ياعني 38,1 ملرد تەڭگە اۋدارىلعان. دەگەنمەن 2021 جىلدىڭ سايكەس ۋاقىتىمەن سالىستىرعاندا بۇل قاراجات 1,6 ملرد تەڭگەگە از.

ەكىنشى ورىندا تۇركيا مەملەكەتى تۇر. ءبىر جىل ىشىندە قازاقستاننان جىبەرىلگەن قاراجاتتىڭ جالپى سوماسى 271,3 ملرد تەڭگەنى قۇرادى. كۇز ءۇش ايىندا اۋدارىلعان اقشا 86,9 ملرد تەڭگەگە جەتكەن.

ءۇشىنشى ورىندى رەسەي يەلەندى. سولتۇستىكتەگى كورشىگە ءبىر جىل ىشىندە 195 ملرد تەڭگەدەن استام قارجى اۋدارىلعان. ماۋسىمدا 22,5 ملرد تەڭگە، قاراشادا 23,1 ملرد تەڭگە جونەلتىلىپ، وسى ەكى ايدا اقشا اۋدارۋ ەرەكشە قارقىن العان.

سونداي-اق قىرعىزستانعا – 73,8 ملرد تەڭگە، گرۋزياعا – 70,6 ملرد تەڭگە اۋدارىلدى.

ال قازاقستانعا بىلتىر ەڭ كوپ قاراجات رەسەي مەن قىرعىزستاننان اۋدارىلعان. اسىرەسە رەسەي ۋكرايناعا جورىعىن باستاعاننان كەيىن اقشا اۋدارىمدارى قارقىندى جۇرگەن. رەسەيدەن قازاقستانعا اقشا جونەلتۋدىڭ رەكوردتى كەزەڭى ماۋسىمعا (66,8 ملرد تەڭگە) جانە شىلدەگە (54,6 ملرد تەڭگە) سايكەس كەلەدى.

ەكىنشى ورىنعا قىرعىزستان جايعاسىپتى. 2022 جىلدىڭ I توقسانىندا قىرعىزستاننان ترانزاكتسيالار كولەمى رەسەي، وزبەكستان، اقش، وڭتۇستىك كورەيادان تومەن بولدى. بىراق ءساۋىر ايىنان باستاپ قازاقستانعا اۋدارىمدار سانى وسە باستادى. بۇل ەلدەن ەڭ كوپ اقشا، 17,7 ملرد تەڭگە، تامىز ايىندا كەلدى.

سونداي-اق كۇز ايلارىندا قازاقستانعا وزبەكستاننان اۋقىمدى قارجى اۋدارىلدى: قىركۇيەك ايىندا – 6,2 ملرد تەڭگە، قازان ايىندا – 7,5 ملرد تەڭگە، قاراشا ايىندا – 6,6 ملرد تەڭگە.

اقش پەن وڭتۇستىك كورەيا اقشا اۋدارىمدارىندا ايتارلىقتاي ايىرماشىلىق جوق. ءساۋىر ايىندا امەريكادان 8,3 ملرد تەڭگە، وڭتۇستىك كورەيادان 5,9 ملرد تەڭگە تۇسكەن.

Abai.kz