ءبىزدى بلوگەرلەردىڭ "سولياركاسى" جانە كوفەسۇيگىش Respublica-مەن (جاڭادان قۇرىلعان ساياسي پارتيا) شاتاستىرۋدىڭ قاجەتى جوق. جاڭادان قۇرىلعان "بايتاق" جاسىلدار پارتياسىنىڭ توراعاسى ازاماتحان ءامىرتاي ەلوردادا ءوتىپ جاتقان پارتيانىڭ سايلاۋ الدىنداعى سەزىندە وسىلاي دەدى.

ونىڭ ايتۋىنشا، پارتيانىڭ قۇرىلعانداعى ماقساتى — ەلدەگى ەكولوگيالىق پروبلەمالاردى كوتەرۋ.

«ءبىز تەك ەكولوگتاردىڭ باسىن بىرىكتىرىپ قانا قويماي، تابيعاتتىڭ كۇيىنە الاڭدايتىن ادامداردى ءبىر ارناعا توعىستىرعىمىز كەلدى. بارلىق وڭىردە وكىلدىكتەرىمىزدى قۇردىق. ارال، سەمەي مەن ەلدىڭ باتىسىنداعى ەكولوگيانى لاستايتىن قالدىقتار پروبلەماسىنا باستى نازار اۋدارامىز. ءبىزدى بلوگەرلەردىڭ "سولياركاسى" جانە كوفەسۇيگىش Respublica-مەن شاتاستىرۋدىڭ قاجەتى جوق، - دەپ اتاپ ءوتتى پارتيا توراعاسى.

سونداي-اق ول ەكولوگيا ماسەلەسىنە توقتالدى.

«اۋامەن باي دا، كەدەي دە تىنىس الادى. بۇگىندە سو2 قالدىقتارى اۋانى لاستاپ، حالىقتىڭ دەنساۋلىعىن قۇرتۋدا. ءومىر ساپاسى دا تومەندەپ بارادى. اتاپ ايتقاندا، تەمىرتاۋ، الماتى، وسكەمەن قالالارى مەن جامبىل جانە اتىراۋ وبلىستارى قاتتى زارداپ شەگۋدە. وسى وڭىرلەردەگى 4 ملن-نان استام ادام اللەرگياعا شالدىققان. پرەزيدەنت قاسىم-جومارت توقاەۆ اۋاعا شىعارىلاتىن سو2 قالدىقتارىن 2060 جىلعا دەيىن 0-گە دەيىن ازايتۋ تۋرالى تاپسىرما بەردى. وسى ماقساتقا جەتۋ ءۇشىن بۇل ماسەلەمەن اينالىسۋدى بۇگىننەن باستاپ قولعا الۋىمىز كەرەك»، - دەدى ازاماتحان ءامىرتاي.

Abai.kz