اقش استاناسى ۆاشينتوندا قازاقستاننىڭ تاۋەلسىزدىگىن ەڭ العاشقى بولىپ تانىعان الىستاعى باۋىرىمىز تۇركيياداعى ءزىلزالادان قۇربان بولعانداردى ازا تۇتىپ ەسكە الۋ جيىنى ءوتتى. الەمنىڭ ونەر جۇلدىزدارى - امەريكاندىق دجەي پارك، كورەيالىق سيۆون چوي، يتاليالىق سپورتشى ميكەلە مورونە، بەلگىلى قايراتكەرلەر، شەتەل كاسىپكەرلەرى كومەك كورسەتىپ جاتىر. امەريكانىڭ ءبىر عانا STK كومپانياسى 10 ميلليون دوللار بولگەن. تايۆان ليدەرى تساي يڭ ۆەن ءبىر ايلىق جالاقىسىن تۇركيياعا كومەك قورىنا اۋدارعان. جالپى تايۆاندا اشىلعان قورعا ءبىر كۇندە 10 ميلليون جاڭا تايۆان دوللارى (NT 10000000) تۇسكەن. بۇل 6 ميلليون تۇرىك ليراسىنا تەڭ.

بۇل قاسىرەت ساياسي ساحناداعى بىتىسپەس جاۋلاردى دا تابىستىرىپ، دانەكەر بولعان سياقتى. كومەك قولىن سوزىپ تۇركياعا كەلگەندەردىڭ اراسىندا ارمەنيا مەن گرەكيا دا، بۇگىنگى گەوساياسي باقتالاسى يران دا بار.

تۇرىك گازەتتەرىنىڭ جازۋىنشا، گرەكيانىڭ باستى ERT تەلەارناسى ءوزىنىڭ تاڭعى حابارلارىن تۇرىك انىمەن باستاسا، «كاتيمەريني» سياقتى كوپتارالىمدى گرەك گازەتتەرى «ءبارىمىز بىرگەمىز!» دەگەن جولدارمەن شىققان. دۇنيەنىڭ ءتورت بۇرىشىنان اعىلىپ كەلىپ جاتقان كومەك لەگى تولاستار ەمەس. بىراق ءزىلزالادان كەلگەن زارداپ وراسان. تۇرىك باسىلىمدارىن تولقىماي، كوزگە جاس الماي وقۋ مۇمكىن ەمەس. وسى جولداردى جازىپ وتىرعاندا «ميلليەت» گازەتى رەجەپ تايىپ ەردوعاننىڭ جەر سىلكىنىسىنەن قازا بولعاندار سانى 17 ادامنان اسقانىن حابارلاپ جازىپتى. قۇتقارۋشىلار ءۇيىندى استىندا 80 ساعاتتان استام جاتىپ قالعان ادامدى دا ءتىرى كۇيىندە شىعارىپ العان. ءبىر عانا پولشادان كەلگەن توپ كەشەگى كۇنگە دەيىن 14 ادامدى قۇتقارىپ قالعان.

«التايدىڭ التىن كۇنى ەركەلەتىپ،

كەلگەندە جولبارىس بوپ جاڭا ەر جەتىپ،

اق تەڭىز، قارا تەڭىز ار جاعىنا

باۋىرىم، مەنى تاستاپ قالدىڭ كەتىپ!» دەپ، جالىن-اقىن ماعجان ساعىنىشپەن جىرلاعان، ەجەلگى زاماندا التايدىڭ باۋىرىندا، اقىن ايتاتىنداي «تەبىسىپ ءبىر توسەكتە جاتقان» تۇرىك باۋىرلارىمىزدىڭ قايعىسىنا ورتاقتاسىپ، كومەك كورسەتىپ جاتقان قازاق ازاماتتارى، كاسىپكەرلەر جوق دەپ ايتا المايمىن. سولتۇستىك قازاقستان وبلىستىق قازاقستان حالقى اسسامبلەياسىنىڭ تۇرىك ەتنومادەني ورتالىعىندا  ياكۋب دەيتىن جىگىت جىلى كيىمدەر، قاجەتتى زاتتار جيناپ جاتىر. قازىر باسپاناسىز قالعاندارعا ەڭ قاجەتتىسى جىلى كيىم ەمەس پە؟ اقشانى دا سول ياكۋب كورسەتكەن ەسەپشوتقا اۋدارعان دۇرىس دەپ ويلايمىن.

كەشە تاڭەرتەڭ تۇركياعا كومەك قارجى اۋدارۋ جونىندە قىزىلجارلىق جۋرناليست ءومىر ەسقالي ءىنىمىز باستاما كوتەرگەن. بىراق قارجىنى قالاي، قايدا اۋدارۋ كەرەكتىگىن باسىندا بىلمەدىك. ينتەرنەتتە بىرەۋ ەسەپشوت دەرەكتەرىن كورسەتىپتى، بىراق وندايدا سەنۋ قيىن. قازىر نە كوپ، الاياق كوپ. ال تۇرىك مادەني ورتالىعى قانشا ايتقانمەن سەنىمدى بايلانىس قوي. ەلىمىزدىڭ كەز كەلگەن وبلىس ورتالىعىندا وسىنداي ۇيىم بار دەپ ويلايمىن. جالپى تۇركياعا كومەك الداعى ايلاردا دا وتە قاجەت بولادى. بۇل جۇمىستى ورتالىقتاندىرىپ، ءبىر ىزگە سالۋ كەرەك.

دۇنيە ەلدەرى ۇلتىنا، دىنىنە، ساياسي ۇستانىمىنا قاراماستان باۋىرلاس، قانداس ەلگە جاردەم ەتىپ جاتقاندا ويىن-ساۋىق، توي-تومالاق دەگەندى تىم بولماسا بىرەر كۇنگە قويا تۇرىپ، ءزىلزالا قۇرباندارىنىڭ ارۋاعىنا قۇرمەت كورسەتكەنىمىز دۇرىس ەمەس پە؟ ازىرگە راديودان دا، تەلەديداردان ماڭىراعان-اڭىراعان ءان، قىسىر ءسوز، مىلجىڭ اڭگىمە، داراقى كۇلكى عانا.

مارات ەرمۇقانوۆ  

Abai.kz