ءبىزدىڭ ەلدە ەرەكشە شەكسىز بيلىكتىڭ يەلەرى دەپ وبلىس اكىمدەرىن ايتۋعا بولادى. ولار، بىلايشا ايتقاندا، قۇداي ەمەس، الايدا ول قۇدايدان كەم دە ەمەس، تىم شىرقاۋ بيىكتە. جالاقىسى دا سوعان سايكەس، ولقى تۇسپەيدى. 2 ميلليون تەڭگەگە جەتىپ جىعىلادى. ءوزى باسقاراتىن وڭىردە وعان باعىنبايتىن ەشبىر لاۋازىم يەسى جوق. سوندىقتان وبلىستا ونىڭ ايتقانى زاڭ، ىستەگەنى قاشان دا دۇرىس، قاتەلەسۋى مۇمكىن ەمەس اق قاناتتى پەرىشتەنىڭ دەڭگەيىندە.

ءبىر قىزىعى، پرەزيدەنتتەن باسقا ەشكىمگە دە ەسەپ بەرمەيدى. ال بەرە قالعان ەسەبى قاشان دا ادامنىڭ باسى اينالاتىنداي عاجاپ كورسەتكىشتەرگە تولى بولادى. وعان ەشكىم دە كۇدىك كەلتىرمەيدى. ءتىپتى اندا-ساندا سول ەسەپتى الىپ وتىرعان ادامنىڭ ءوزى دە. سوسىن كوكىرەگى وسپەي، ءوزىن-ءوزى قۇدىرەت ساناماي قايتەدى؟ ال انا ۇكىمەت باسشىسىنىڭ اندا-ساندا بىرەر ايتقان سىني پىكىرىن ول ەش جەرىنە دە قىستىرمايدى. ارينە، باس شۇلعىعان بولادى. ءتىپتى قۇلاق سالىپ تىڭداعان سىڭاي دا تانىتادى. الايدا، بۇل جاعداي ونىڭ تىنىش تا، قايعىسىز ومىرىنە ەش سىزات تۇسىرە المايدى. ويتكەنى، ونىڭ قوجايىنى بىرەۋ.

ال قالعانى... ە، استانادا وتىرىپ، قولىنان كوپ نارسە كەلمەسە دە، اقىل ايتىپ قوپاڭدايتىندار جەتەدى ەمەس پە؟ سولاردىڭ ءبارىن تىڭداي بەرسەڭ، قاي ءومىرىڭ جەتەدى؟ سوسىن "يت ۇرەدى، كەرۋەن كوشەدى" دەيتىن ەشقاشان توزبايتىن پالساپامەن تىرشىلىك ەتە بەر. مۇرتىڭدى بالتا شاپپايدى. تەك كەيبىرەۋلەر قوجايىنىڭا بىردەڭەنى بىقسىتىپ جۇرمەسە بولعانى. وندايلاردىڭ دا ءجونىن كەلتىرۋگە بولادى. ولار دا پەندە، ولاردىڭ دا وسال تۇستارى كەزدەسىپ قالادى. ماسەلە، سونى ءدوپ باسۋ. ارعى جاعى وپ-وڭاي.

ەڭ باستىسى، سەن قانداي دۇنيەنى قالاي بۇلدىرسەڭ دە، ەشكىم ەشتەڭە بىلمەيدى. اكىم بولعان كەزىڭدە ءبارىن قاتىرىپ قويساڭ جەتىپ جاتىر. "قالعانىن ءبىر قۇدايدىڭ ءوزى كەشىرەدى" دەپ جۇرە بەر. سەنبەيسىزدەر مە؟ ولارىڭىز بەكەر، ارينە. بىزدە قانداي اكىمنىڭ قانداي تالانتى ءۇشىن تاعايىندالعاندىعى نەمەسە ورنىنان تۇسسە، نە كىناسى ءۇشىن جىلى ورنىنان ايىرىلعاندىعىن حالىققا كىم، قاشان ءتۇسىندىرىپ ەدى؟ ماسەلەن، ءبىزدىڭ قوستاناي وبلىسىنا قۇمار اقساقالوۆ جاقىندا عانا اكىم بولىپ كەلدى. سولتۇستىك قازاقستان وبلىسىنداعى وسىنداي قىزمەتىنەن اۋىستى. سوندا ول انا قىزىلجار وڭىرىندە بۇكىل ەل سۇيسىنەرلىكتەي قانداي يگىلىكتى ىستەر تىندىرىپتى؟ ول نەگە ايتىلمايدى؟ نەگە ءبىز سوعان بوركىمىزدى اسپانعا اتىپ، ريزا بولمايمىز؟ ايتپەسە، ءبىر وبلىستان ەكىنشىسىنە ىعىستىرا سالۋدىڭ وتە ءتيىمدى ەكەندىگىن  كىم تايعا تاڭبا باسقانداي ەتىپ حالىققا دالەلدەپ بەرىپتى؟

ال ەندى وسىندا 7 جىلدان استام وتىرعان، اقتوبەدەن اۋىسىپ كەلگەندە، قۇيرىعىنا "30 پايىزدىق اكىم" اتاعىن بىرگە بايلاپ كەلگەن بۇرىنعى اكىمىمىز ارحيمەد مۇقانبەتوۆ كىمگە ۇناماي قالىپتى؟ ءۇن-ءتۇنسىز ءتۇسىرىپ تاستايتىنداي نە ءبۇلدىرىپتى؟ ال مۇنى دا از دەسەڭىز، قاراعاندىنى باسقارىپ جارىتپاعان جەڭىس قاسىمبەكتىڭ استانانىڭ اكىمى بولىپ كوتەرىلىپ كەتۋى قانداي تالانتىنىڭ ارقاسىندا ەكەن؟ الدە ونىڭ اكەسى ماحمۋد قاسىمبەكوۆتىڭ كەزىندە بۇرىنعى پرەزيدەنتتىڭ ءومىر-باقي كەڭسەسىن باسقارىپ، تالاي-تالاي مەمۋارىن جازعاندىعىنا ايتىلعان راحمەت پە؟

مىنەكەي، وبلىس اكىمدەرىنىڭ اۋىس-ءتۇيىسىنىڭ وسىلايشا حالىقتان اسا قۇپيا تۇردە، جاسىرىن جۇرگىزىلۋى "جاڭا قازاقستان" نەمەسە "ادىلەتتى قازاقستان" دەگەن سوزدەردىڭ تەك ادەمى ۇراندارعا اينالىپ بارا جاتقاندىعىن كورسەتپەي مە؟ ولاي بولسا، ولاردىڭ ەسكىرگەن قازاقستاننان ايىرماشىلىعى قانداي؟ مۇمكىن، سىزدەر بىلەرسىزدەر؟

جايبەرگەن بولاتوۆ

Abai.kz