"قاڭتار وقيعاسى: اقوردا ءۇشىن كۇرەس" كىتابىن جازعان جاقسىبەك قۇلەكەەۆ ءماجىلىستىڭ ەكس-سپيكەرى نۇرلان نىعماتۋليننىڭ قاڭتار وقيعاسىنان كەيىن نەلىكتەن ورنىنان كەتكەنىن ءتۇسىندىرىپتى.  

Arbat.media-نىڭ جازۋىنشا، اۆتور بيلىكتەگى بىرقاتار تۇلعالارعا توقتالىپ وتكەن. سولاردىڭ ءبىرى ءىرى شەندى – نۇرلان نىعماتۋلين. ونىڭ قايعىلى وقيعادان كەيىن ارادا ءۇش اپتا وتكەندە قىزمەتىنەن كەتۋى سەبەبىن جاقسىبەك  قۇلەكەەۆ باسقاشا تۇسىندىرگەن.

«1 اقپاندا ەلىمىزدەگى ەڭ ىقپالدى ساياساتكەرلەردىڭ ءبىرى نۇرلان نىعماتۋلين قر پارلامەنتى ءماجىلىسىنىڭ توراعاسى قىزمەتىنەن كەتىپ، ونىڭ ورنىنا بۇعان دەيىن پرەزيدەنت اكىمشىلىگىن باسقارعان ەرلان قوشانوۆ كەلدى. ال ەرلان جاقانۇلىنىڭ ورىنتاعىنا مۇرات نۇرتىلەۋ جايعاستى. ەكس-پرەزيدەنت ن.نازارباەۆتىڭ تۋىستارى جوعارى لاۋازىمدى قىزمەتتەردەن كەتىپ جاتقان كەزدە نۇرلان زايروللاۇلىنىڭ ورنىن بوساتۋى اركىم ءارتۇرلى ءتۇسىندى. ەكس-توراعانىڭ «وقشانتايدان» ءتۇسىپ قالۋىنا نە اسەر ەتتى؟»، - دەپتى اۆتور.

نىعماتۋليننىڭ قىزمەتىنەن قوشتاسۋىنا قاڭتار وقيعاسى كەزىندەگى ارەكەتى سەبەپ بولعان كورىنەدى. ول ەلدە بولىپ جاتقان تارتىپسىزدىكتەردى كورە تۇرا، اۋزىن بۋعان وگىزدەي وتىرا بەرگەن. تەك وقيعادان كەيىن بيلىك تولىعىمەن قاسىم-جومارت توقاەۆتىڭ قولىنا وتكەندە عانا ويىن قىسقاشا جەتكىزگەن.

«قاڭتار دۇربەلەڭى باستالعاندا سەنات توراعاسى ماۋلەن اشىمباەۆ ءبىر ەمەس، بىرنەشە رەت حالىقتى سابىرعا شاقىرىپ، مالىمدەمە جاساعانى ەستە قالدى. ال سول كەزدەگى ماجىلىس توراعاسى ن.نىعماتۋليننىڭ داۋىسى ەستىلمەدى. تەك قاسىم-جومارت توقاەۆ بيلىكتى تولىقتاي قولىنا العان كەزدە، ياعني، 10 قاڭتار كۇنى ول "ەلىمىز ءۇشىن كۇردەلى كەزەڭدە مەملەكەت باسشىسى قاسىم-جومارت كەمەلۇلى توقاەۆتىڭ بارلىق شەشىمدەرى مەن باتىل قادامدارى بىرەگەي جانە ۋاقىتىلى" دەگەندى ايتتى»، - دەپ جازادى جاقسىبەك قۇلەكەەۆ.

قاڭتار وقيعاسىندا جانە ودان كەيىن كوپتەگەن ساياسي قىزمەتتەگى تۇلعالار لاۋازىمىنان ايىرىلدى. ولاردىڭ اراسىندا ۇكىمەتتىڭ بۇرىنعى باسشىسى اسقار مامين، الماتى قالاسىنىڭ سول كەزدەگى اكىمى باقىتجان ساعىنتاەۆ، ۇقك ەكس-توراعاسى كارىم ءماسىموۆ، قورعانىس ءمينيسترى بولعان مۇرات بەكتانوۆتىڭ ەسىمى اتالدى بۇلاردىڭ سوڭعى ەكەۋى بىردەن قاماۋعا الىندى.

ال نىعماتۋلين 1 اقپاندا قىزمەتىمەن كەتۋىمەن قاتار، سول جولى جيىندا ەكس-پرەزيدەنت نۇرسۇلتان نازارباەۆقا ەرەكشە العىس ايتقان بولاتىن.

Abai.kz