قر ەڭبەك سىڭىرگەن سپورتشىسى داۋلەت تۇرلىحانوۆتىڭ ۇلى نۇراسىل الماتىدا ەكى زاڭگەردى سوققىعا جىققان. بۇل تۋرالى جابىرلەنۋشى اننا ديميتريەۆيچ الەۋمەتتىك پاراقشاسىندا جازدى.

ايتۋىنشا، الماتىدا ءبىر عيماراتتىڭ الدىندا ەر ادام قىزدى ۇرىپ-سوققان. ونى كورگەن ادۆوكاتتار اننا ديميتريەۆيچ پەن ونىڭ كۇيەۋى ولەگ چەرنوۆ اراشا تۇسپەك بولادى. بىراق جىگىت پەن ونىڭ دوستارى قۇقىق قورعاۋشىلاردىڭ وزدەرىن سوققىعا الادى. ولەگ چەرنوۆتىڭ قابىرعاسىن سىندىرىپ، اننا ديميتريەۆيچتىڭ جاعىنان ۇرعان، قاتتى سوققىدان قۇلاعان ول قولىن جاراقاتتاپ العان.

«مەن ولەگ ەكەۋمىزدى ۇرىپ-سوققان جىگىتتىڭ كىم ەكەنىن بىلەمىن. ونىڭ اتى – نۇراسىل. ول داۋلەت تۇرلىحانوۆتىڭ ۇلى ەكەنى بەلگىلى بولدى. داۋلەت بولاتۇلى – اتاقتى ادام، قۇرمەتتى سپورتشى. داۋلەت بولاتۇلى ۇلىنا سپورتشىلارعا ءتان ادامگەرشىلىك پرينتسيپتەرىن سىڭىرگەن شىعار دەگەن ۇمىتتەمىن»،-دەپ جازدى زاڭگەر.

سونداي-اق اننا ديميتريەۆيچ وزىنەن ەشكىمنىڭ كەشىرىم سۇراماعانىن ايتادى.

پوليتسيا بولعان وقيعاعا قاتىستى قىلمىستىق ءىس قوزعالعانىن مالىمدەدى.

"بۇل فاكت قر قك 293-بابى (بۇزاقىلىق) بويىنشا سوتقا دەيىنگى تەرگەپ-تەكسەرۋدىڭ بىرىڭعاي تىزىلىمىندە تىركەلگەن. قىلمىستىق ءىس بويىنشا العاشقى تەرگەۋ ارەكەتتەرى جۇرگىزىلىپ، ساراپتامالار تاعايىندالدى", – دەپ حابارلادى الماتى پوليتسيا دەپارتامەنتى.

سونداي – اق، كۇدىكتىنىڭ اسكەري قىزمەتشى ەكەندىگى اتاپ ءوتىلدى، سوندىقتان ءىس ماتەريالدارى قالا پروكۋراتۋراسىنا بەرىلگەن.

Abai.kz