قازاقستان تۇركياعا 250 توننا گۋمانيتارلىق كومەك جىبەرەدى. بۇل تۋرالى تۇركيانىڭ ەلىمىزدەگى توتەنشە جانە وكىلەتتى ەلشىسى ۋفۋك ەكيدجي ەلشىلىكتە وتكەن ءباسپاسوز ءماسليحاتىندا مالىمدەدى.

- قازاقستان مەملەكەتى جەر سىلكىنىسىنىڭ ەكىنشى كۇنى تۇركياعا 41 ادامنان تۇراتىن العاشقى ىزدەۋ-قۇتقارۋ توبىن دايىنداپ، جىبەردى. ەكى كۇننەن كەيىن ەكىنشى كوماندا دا تۇركياعا كەتتى. ىزدەۋ-قۇتقارۋ جۇمىستارىنا بارلىعى 100 ادام مەن 6 يتتەن تۇراتىن توپ قاتىستى. وسى ورايدا قۇتقارۋشىلارعا، قۇرمەتتى قر توتەنشە جاعدايلار مينيسترىنە، ولاردىڭ جۇمىسى ءۇشىن العىس بىلدىرەمىن. ۇلكەن جانكەشتىلىكپەن جانە تابىستى تۇردە ءوز قىزمەتتەرىن اتقارعان  قۇتقارۋ توبى كوپتەگەن ادامداردىڭ ءومىرىن ساقتاپ قالدى جانە وتانداستارىمىزدى ۇيىندىلەر استىنان شىعاردى. قۇتقارۋشىلار توبىن وتكەن جەكسەنبى كۇنى، تۇندە استاناعا ورالعان كەزدە اۋەجايدا قارسى الدىق، - دەپ اتاپ ءوتتى ەلشى.

سونداي-اق ەلىمىز قانشا كولەمدە گۋمانيتارلىق كومەك بەرگەنىنە توقتالدى.

- سونىمەن قاتار قازاقستان 1 ملن دوللار كولەمىندە رەسمي اقشالاي كومەك كورسەتتى. ۇكىمەت ۇسىنعان قوسىمشا 55 توننا گۋمانيتارلىق كومەك تە وتكەن دەمالىس كۇندەرى جەر سىلكىنىسى ايماعىنا جەتكىزىلدى. ءبىزدىڭ ەلشىلىك پەن باس كونسۋلدىقتارىمىزعا قازاقستاندىق ەرىكتىلەر اكەلگەن گۋمانيتارلىق جۇكتەر كەزەگىمەن ەلىمىزگە جىبەرىلدى جانە AFAD-قا تابىستالدى. جيناقتالعان گۋمانيتارلىق جۇكتەردىڭ ەداۋىر بولىگى قازاقستان ۇلتتىق ۇلانىنىڭ قولباسشىلىعى بولگەن ۇشاقتارمەن جەتكىزىلەدى. بۇگىن استانادان العاشقى ۇشاق ۇشىپ شىقتى. ەرتەڭ الماتىدان تاعى ءبىر ۇشاقتى جىبەرۋ جوسپارلانۋدا. وسى جەتكىزىلىمدەرمەن بىرگە قازاقستاننان بارلىعى 250 تونناعا جۋىق گۋمانيتارلىق كومەك جونەلتىلەتىن بولادى، - دەدى ۋفۋك ەكيدجي.

بەلگىلى بولعانداي، اتالعان قاجەتتى زاتتاردىڭ ىشىندە قازىرگى كەزدە ەڭ قاجەتى –شاتىرلار، كورپەلەر، توسەك قاپتارى، گەنەراتور، جىلىتقىشتار بار. قازاقستان ۇكىمەتى سونداي-اق جىلجىمالى دارەتحانا مەن توسەك جابدىقتارى سياقتى اسا قاجەتتى زاتتاردى جىبەردى.

- زاتتاي كومەكتەن باسقا، قازاقستان تۇرعىندارى دا اقشالاي كومەك كورسەتۋدە. وسى ۋاقىتقا دەيىن AFAD-تىڭ جەر سىلكىنىسى ءۇشىن اشىلعان ارنايى رەسمي شوتىنا شامامەن 5 ملن دوللار كەلىپ ءتۇستى. وسى ورايدا مەن اقپارات جانە قوعامدىق دامۋ مينيسترلىگىنە ەرەكشە العىس ايتقىم كەلەدى. ولار باستاعان ناۋقانمەن جانە ولار اشقان شوت ارقىلى ولار ءبىزدىڭ قاراجات جيناۋ ناۋقانىنا ۇلكەن قولداۋ كورسەتتى، - دەدى ول.

Abai.kz