كوكتەمگى جاپپاي اسكەرگە شاقىرۋ ناۋقانىنىڭ باستالۋى الدىندا قوعامدا، اسىرەسە جاستار اراسىندا اسكەري قىزمەتتىڭ ماڭىزدىلىعىن ءتۇسىندىرۋدىڭ بەرەرى مول. بۇل رەتتە اسكەري قىزمەتكە بايلانىستى اتا-انالارمەن، اسكەري مىندەتىن وتەۋگە باراتىن جاستاردىڭ ءار ءتۇرلى كەرەعار تۇسىنىكتىڭ اسەرىنەن تۋىنداعان كوڭىل الاڭىن سەيىلتۋ ءۇشىن مۇنداي ناسيحات جۇمىسىنىڭ ونىمدىلىگى وتە جوعارى ەكەنى ايتپاسادا تۇسىنىكتى.

اسكەري سالاعا كوڭىل ءبولۋدىڭ ايقىن كورىنىسى بولعان جىل سايىن كەمەلدەنىپ كەلە جاتقان جارقىن وزگەرىستەردى كوپكە جەتكىزۋدىڭ، قۇلاعدار ەتۋدىڭ باسقا ءتيىمدى جولى جوق. سونى كورسەتۋ ارقىلى جاستاردىڭ وتان قورعاۋعا دەگەن ىنتاسىمەن جىگەرىن، بولاشاعىنا دەگەن سەنىمدىلىگىن وياتۋعا، اسكەري مىندەتىن وتەۋگە الاڭسىز اتتانۋعا جول اشۋعا بولادى.

سونى جاقسى تۇسىنگەن قورعانىس مينيسترلىگى وكىلدەرى وسى باعىتتاعى جۇمىستاردى قارقىندى الىپ بارۋدا. وعان جارقىن مىسال رەتىندە وڭىرلىك ەكى ناسيحاتتىق قيمىلدى اتاۋعا بولادى. ونىڭ ءبىرى بولاشاق اسكەري مىندەتىن وتەۋگە ۇمىتكەر مەكتەپ وقۋشىلارىمەن ساربازداردىڭ ونلاين رەجيمدە وتكەن كەزدەسۋى.

مەكتەپ وقۋشىلارى مەن ستۋدەنتتەرگە ارنالعان مۇنداي قىزىقتى فورماتتاعى كەزدەسۋ قۇرلىق اسكەرلەرى باس قولباسشىسى باسقارماسىنىڭ باستاماسىمەن ءوتتى.

ەلوردالىق 68665 اسكەري ءبولىمىنىڭ باسشىلىعى العاش رەت جاقىن ارادا ساربازداردىڭ ورنىن باساتىن جاسوسپىرىمدەرمەن كەزدەسۋ ۇيىمداستىردى. اتالعان شاراعا قۇرلىق اسكەرلەرى باس قولباسشىسىنىڭ تاربيە جانە يدەولوگيالىق جۇمىس جونىندەگى ورىنباسارى پولكوۆنيك سامات تولەپباەۆ باسشىلىق ەتتى.

بەينەبايلانىسقا مەرزىمدى قىزمەتتەگى ساربازدار اسكەري قىزمەتكە دەيىن وقىعان اقمولا، قوستاناي جانە سولتۇستىك قازاقستان وبلىستارىنىڭ وقۋ ورىندارى شىقتى.

پولكوۆنيك سامات تولەپباەۆ ارمياداعى قىزمەتتىڭ اسكەرگە شاقىرىلعان جاستارعا بەرەتىن ارتىقشىلىقتارى تۋرالى جان-جاقتىلى ايتىپ بەردى. ولاردىڭ ىشىندەگى ەڭ ماڭىزدىسى – قورعانىس مينيسترلىگىنىڭ اسكەري وقۋ ورىندارىنا ەمتيحانسىز ءتۇسۋ بولدى.

بيىلعى جىلى ەلىمىزدىڭ جوعارى وقۋ ورىندارى جاۋىنگەرلىك دايارلىقتىڭ ۇزدىكتەرى مەن وزدەرىن جاقسى جاعىنان كورسەتكەن اسكەري قىزمەتشىلەرگە ءۇش مىڭ كۆوتا ءبولىپ وتىر. ولار سونداي-اق اقىسىز جوعارى ءبىلىم دە الا الادى. تاعى ءبىر جەڭىلدىك – مەرزىمدى اسكەري قىزمەت وتكەرۋ ۋاقىتىندا نەسيەنى جانە شاعىن كرەديتتىك ۇيىمدارداعى قارىزدى تولەۋدى كەيىنگە قالدىرۋعا مۇمكىندىك جاسالىپ وتىر.

مەرزىمدى قىزمەتتەگى اسكەريلەر بالالارعا اسكەري قىزمەتتىڭ قىر-سىرىن، جاۋىنگەرلىك دوستىق، دەمالىستى ۇيىمداستىرۋ تۋرالى، اسكەري-ەسەپتىك ماماندىقتى يگەرۋگە قاجەتتى ءبىلىم مەن داعدىلاردى بەرەتىن كوماندير-تالىمگەرلەر جايلى اڭگىمەلەپ بەردى.

وقۋشىلار اسىرەسە بەيىمدەلۋ كەزەڭىنەن ءوتۋ، اسكەري جانە ازاماتتىق وقۋ ورىندارىنا ءتۇسۋ، اسكەري اتاق الۋ جانە بەلگىلى ءبىر اسكەر تۇرىنە قالاي كىرۋ تۋرالى بىلگىسى كەلىپ، قىزىعۋشىلىق تانىتتى. بالالار ويىنداعى سۇراقتارىنا تولىق جاۋاپ الدى.

ەرەكشە فورماتتا وتكەن كەزدەسۋ ارقىلى وقۋشىلار وتان الدىندا بورىش وتەۋدىڭ ماڭىزدىلىعىن جەتە ءتۇسىنىپ، اسكەري قىزمەتكە قىزىعۋشىلىعى ارتىپ، ەرەكشە ىنتالىلىق كورسەتتى.

ەكىنشى كەزدەسۋدىڭ دە ماڭىزدىلىعى، ناسيحاتتىق كۇشى، تاربيەلىك سالماعى وتە جوعارى بولدى. الدىڭعى كەزدەسۋدەن بولاشاق اسكەري مىندەت وتەۋشىلەر اسكەري قىزمەتپەن جاڭالىقتارمەن جان-جاقتىلى تانىسسا، ەكىنشى كەزدەسۋ اسكەري مىندەتىن وتەۋشىلەردىڭ بولاشاعى جايىندا ۇكىمەتتىڭ جاساپ جاتقان يگىلىكتەرىن، ناقتى جۇزەگە اسۋ جولدارىن انىق ءتۇسىندىرىپ بەردى. سول ماقساتتا قورعانىس مينيسترلىگىنىڭ اقپاراتتىق «دەسانتى» اقتاۋ گارنيزونىندا بولدى.

قورعانىس ءمينيسترىنىڭ ورىنباسارى دارحان احمەديەۆ اقتاۋ گارنيزونىنىڭ اسكەري بولىمدەرىندە بولدى. ساربازدارمەن كەزدەسۋ بارىسىندا ول اسكەردەگى قىزمەت قانداي مۇمكىندىكتەر مەن پەرسپەكتيۆالار اشاتىنى تۋرالى حاباردار ەتتى.

قر قارجى نارىعىن رەتتەۋ جانە دامىتۋ اگەنتتىگىمەن مەموراندۋم جاسالىپ، مەرزىمدى اسكەري قىزمەت كەزەڭىندە ازاماتتاردىڭ نەسيەلەرى بويىنشا تولەمدەردى «توقتاتۋ» الگوريتمى ازىرلەندى. قىرىقتان استام جوعارى وقۋ ورنىمەن وتان الدىنداعى اسكەري بورىشىن وتەگەن جاستار ءۇشىن ءبىلىم بەرۋ پرەفەرەنتسيالارى تۋرالى كەلىسىمدەرگە قول قويىلعانىن جەتكىزدى.

– بيىلعى جىلى جوعارى وقۋ ورىندارى قارۋلى كۇشتەر قاتارىندا بەلگىلەنگەن مەرزىمدە قىزمەت ەتكەندەردى تەگىن وقىتۋ ءۇشىن ءۇش مىڭ ورىن ءبولىپ وتىر. كۆوتالار ۇزدىكتەردىڭ ۇزدىگىنە بەرىلەدى. بۇل سەندەر ءۇشىن ۇلكەن ىنتالاندىرۋ، – دەدى قورعانىس ءمينيسترىنىڭ ورىنباسارى دارحان احمەديەۆ اسكەري تەڭىزشىلەرمەن كەزدەسۋدە.

جاۋىنگەرلىك دايارلىق پەن جۇكتەلگەن مىندەتتەردى ورىنداۋدا جوعارى ناتيجەلەرگە قول جەتكىزگەن، ۇلگىلى اسكەري ءتارتىبى بار اسكەري قىزمەتشىلەر وقۋ ورنىنىڭ كۆوتاسى ەسەبىنەن جوو-دا وقۋ ءۇشىن اسكەري ءبولىم قولباسشىلىعىنىڭ ۇسىنىمىن الا الادى. قولدانىستاعى رەگلامەنت بويىنشا وقۋ ورنىنا جىبەرۋ تۋرالى شەشىمدى قورعانىس مينيسترلىگىنىڭ كوميسسياسى قابىلدايدى.

استانا قالاسىنىڭ سارىارقا قورعانىس ىستەرى جونىندەگى اۋداندىق باسقارماسىنان شاقىرىلعان ماتروس بايبولسىن قۇدىش ەلوردالىق جوعارى وقۋ ورنىنا ءتۇسۋدى ارماندايدى:

– ءوز بولاشاعىمدى Astana IT University-مەن بايلانىستىرعىم كەلەدى. بالا كۇنىمنەن بەينەمونتاجبەن اينالىسامىن. اتالعان وقۋ ورنىندا زاماناۋي تەحنولوگيالاردى يگەرىپ، وسى باعىتتاعى جۇمىستاردى دامىتاتىن بولامىن دەپ ويلايمىن،- دەيدى ول.

قورعانىس ۆەدومستۆوسى اسكەري ءبىلىم جانە عىلىم دەپارتامەنتى باستىعىنىڭ ورىنباسارى كاپيتان ليۋدميلا پەرياكينا اسكەري تەڭىزشىلەرگە اسكەري قىزمەتشىلەردى تەگىن جوعارى ءبىلىم الۋعا ۇسىنۋ ءۇشىن ىرىكتەۋدىڭ اشىقتىعى قالاي قامتاماسىز ەتىلەتىنى تۋرالى ايتىپ بەردى.

– سىزدەردىڭ ارقايسىڭىز قورعانىس مينيسترلىگىنىڭ «مەرزىمدى قىزمەت 2.0» سايتىنىڭ اقپاراتتىق جۇيەسىن پايدالانا وتىرىپ، ءوز دەرەكتەرىڭىزدى تابا الاسىزدار. بۇل الاڭدا جاۋىنگەرلىك، اسكەري-كاسىپتىك دايارلىق جانە اسكەري ءتارتىپ ناتيجەلەرى بويىنشا ۇپايلار كورسەتىلەدى، – دەپ ءتۇسىندىردى ول.

سونداي-اق، قورعانىس ءمينيسترىنىڭ ورىنباسارى دارحان احماديەۆ كەزدەسۋگە قاتىسۋشىلارعا قورعانىس مينيسترلىگىنىڭ ءبىلىم بەرۋ جەڭىلدىكتەرى جونىندەگى جوباسىن وتاندىق IT كومپانيالار قولداعانىن جەتكىزدى. ولار اسكەري بولىمدەرگە اسكەري قىزمەتشىلەرگە جوعارى وقۋ ورىندارىنا تۇسۋگە دايىندالۋعا كومەكتەسەتىن پلانشەتتەر مەن نوۋتبۋكتەردى سىيعا تارتقان.

مۇنداي ناتيجەلى شارالاردىڭ جاستاردى اسكەري مىندەتىن وتەۋگە، ەل الدىنداعى، وتان الدىنداعى بورىشىن ادال اتقارۋعا، ەل ەرتەڭى ءۇشىن ادال قىزمەت وتەۋگە جىگەرلەندىرەرى ءسوزسىز.

Abai.kz