اسكەري قىزمەتكەرلەردىڭ بەيبىت كۇندە اسكەري تەحنيكالاردى يگەرۋگە كوڭىل ءبولىپ، باسىم ۋاقىتىن جۇمساپ قانا قويماي، كۇندەلىكتى فيزيكالىق جاتتىعۋلارعا دا باسىمدىق بەرەتىنى داۋسىز. بۇل رەتتە ولاردىڭ جەكە دايىندىعىن، دەنەلىك شىمىرلىعىن شىڭداۋدا، جەتىلدىرۋدە سپورتتىڭ الاتىن ورنى ەرەكشە.

قورعانىس سالاسى باسشىلارى دا ونى باستى نازاردا ۇستاپ كەلەدى. سونىمەن بىرگە تەحنيكالىق بازامەن قامتاماسىز ەتىپ، بارىنشا جاعداي جاساۋدا. مۇنداي قولداۋلار ءوز كەزەگىندە ونىمدىلىگىن كورسەتىپ، تابىستى ناتيجەلەرگە جەتكىزۋدە. سونىڭ ءبىر ايقىن كورىنىسى جاقىندا وتكەن قويان-قولتىق ۇرىستان قازاقستان چەمپيوناتىنداعى قارۋلى كۇشتەر قىزمەتكەرلەرىنىڭ جەتكەن تولاعاي جەتىستىكتەرى.

چەمپيونات اقمولا وبلىسىنىڭ ششۋچينسك قالاسىندا ەرلەر مەن ايەلدەر اراسىندا قويان-قولتىق، ارميالىق قويان-قولتىق، تولىق جاناسپالى قويان-قولتىق ۇرىستارى جانە ءوزىن-ءوزى قورعاۋ بويىنشا ءوتتى.

جارىسقا قالالاردىڭ، وبلىستاردىڭ جانە كۇشتىك قۇرىلىمداردىڭ 450 سپورتشىدان تۇراتىن 26 كومانداسى قاتىستى.

– چەمپيونات ارميا سپورتشىلارىنىڭ دايىندىق دەڭگەيىنىڭ جوعارى ەكەنىن كورسەتتى. قاتىسۋشىلاردىڭ كوپتىگىنەن فينالعا جەتۋ وڭاي بولعان جوق. ءبىزدىڭ ەندىگى مىندەت – الەم چەمپيوناتتارىندا ءساتتى ونەر كورسەتۋ، – دەپ اتاپ ءوتتى ورتالىق سپورت كلۋبىنىڭ سامبو جانە قويان-قولتىق جەكپە-جەكتەن جاتتىقتىرۋشىسى اسان مامبەتقۇلوۆ.

«قويان-قولتىق» ۇرىسىنان 73 كەلىگە دەيىنگى سالماقتا قورعانىس مينيسترلىگى ورتالىق سپورت كلۋبى – سپورت كوميتەتىنىڭ حالىقارالىق دارەجەدەگى سپورت شەبەرى مەرزىمدى قىزمەتتىڭ قاتارداعى جاۋىنگەرى اسەت انارباەۆ التىن مەدالدى جەڭىپ الدى. قورعانىس ۆەدومستۆوسىنا تاعى ءبىر «التىندى» 57 كەلىگە دەيىنگى سالماق دارەجەسىندە ونەر كورسەتكەن قارۋلى كۇشتەردىڭ اسكەري قىزمەتشىسى مايور امان شاكىرتوۆ اكەلدى.

ايەلدەر اراسىندا قارۋلى كۇشتەردىڭ قىزمەتكەرلەرى ورتالىق سپورت كلۋبىنىڭ سپورتشىلارى 53 جانە 64 كەلىگە دەيىنگى سالماق دارەجەسىندە ايان تۇرسىن مەن سورا راحمونوۆا چەمپيون اتاندى.

جالپى ەسەپتە قورعانىس مينيسترلىگىنىڭ كومانداسى ءتورت التىن، ەكى كۇمىس جانە ءۇش قولا مەدال جەڭىپ الىپ، جالپى كوماندالىق ءبىرىنشى ورىنعا يە بولدى. مۇنداي جەڭىستەردىڭ الداعى كۇندەردە دە جالعاسىن تاباتىنىنا، بالۋانداردىڭ جوعارى شىڭداردى باعىندىرىپ، قورعانىس كۇشتەرىنىڭ مارتەبەسىن بيىكتەتە بەرەتىنىنە سەنەمىز.

Abai.kz