امەريكا داۋسىنىڭ حابارلاۋىنشا اۋعانىستاندا ارەكەت ەتەتىن يسلام مەملەكەتى تەروريستىك ۇيىمىنىڭ «قوراسان» توبى 48 مينۋتتىق بەينە ۇندەۋ جاريالاپ: «قىتايداعى ۇيعىرلاردى ازات ەتۋ ءبىزدىڭ – قاسيەتتى پارىزىمىز»، - دەگەن.

ودان ءبىر كۇن بۇرىن 112 بەتتەن تۇراتىن ۇگىت كىتاپشاسىندا تالىپتەر مەن قىتايدىڭ قاتىناسىن، قىتاي بيلىگىنىڭ ۇيعىرلارعا جاساپ وتىرعان قياناتىن سىنعا العان.

كابۋلدا وتكەن جىلى جەلتوقساننىڭ 12-ءسى كۇنى، قىتايدىڭ اۋعانىستانداعى ەلشىسىمەن ءتالىپ سىرتقى ىستەر ءمينيسترىنىڭ كەزدەسۋىنەن ءبىر كۇننەن كەيىن، قىتايلاردىڭ رەستورانىندا جارىلىس بولعان. 3 ادام قازا تاۋىپ، 18 ادام اۋىر جارالانعان. قىتايعا جيھاد جاريالاعان بەينە ۇندەۋدە اتالمىش ۇيىم جارىلىسقا قالاي دايىندالعاندارىن باستان-اياق انىق كورسەتكەن. «كاپىرلەردى اياماي، شىعىس تۇركىستانداقتاردى باقىت پەن ەركىندىككە جەتكىزەتىندەرىن» ايتقان. ولار سونداي-اق، رەسەي مەن پاكىستان ەلشىحاناسىندا بولعان جارىلىستاردى مويىندارىنا العان.

بىرىككەن ۇلتتار ۇيىمى مەن اقش باستاعان كوپتەگەن ەلدەر اتالمىش ۇيىمدى «تەرروريستىك ۇيىم» دەپ تانىپ، سانكتسيا سالعان. بۇۇ-نىڭ مالىمەتىنشە، ۇيىمنىڭ 1 مىڭ مەن 3 مىڭنىڭ اراسىندا ساربازدارى بار. ولاردىڭ ىشىندە 200-ءى ورتا ازيا ەلدەرىنەن كەلگەن. سوڭعى كەزدە اتالمىش ۇيىم اقپاراتتىق ۇگىتتى كۇشەيتىپ، قاتارىن كوبەيتۋگە كىرىسكەن. جەكە راديو جەلىسىن اشىپ، پارسى، تاجىك، وزبەك، ورىس، ءپۋشتۇن تىلدەرىندە ۇگىت ماتەريالدار تاراتقان. نەگىزگى قارجىلىق كوزى اپيىن ساتۋدان كەلەدى ەكەن.

ولار وزدەرىن تالىپتەرگە بىردەن ءبىر قارسىلاسپىز دەپ سانايدى. اۋعانىستان، پاكىستان، ورتا ازيانى قوسىپ حاليفات قۇرعىسى كەلەدى. قىتاي، ءۇندىستان، يران، پاكىستان، رەسەي قاتارلى ەلدەردىڭ اۋعانىستانداعى ەلشىلىكتەرىنە قارسى شابۋىلدار ۇيىمداستىرىپ، سول ارقىلى ولارمەن تالىپتەردىڭ بايلانىسىن ۇزبەك نيەتتە.

Abai.kz