رەسمي مالىمەت بويىنشا 30 جىلدا قازاقستانعا الەمنىڭ 120-دان استام ەلىنەن 370 ملرد دوللار شەتەلدىك ينۆەستيتسيا تارتىلىپتى.
قازاقستانعا ينۆەستيتسيا سالعان ەلدەردىڭ الدىنعى وندىعىن نيدەرلاند، اقش، شۆەيتساريا، بەلگيا، رەسەي، وڭتۇستىك كورەيا، قىتاي، فرانتسيا، ۇلىبريتانيا جانە تۇركيا باستاپ تۇر.

سوڭعى 5 جىل ىشىندە قازاقستانعا جىل سايىن 20 ملرد دوللاردان استام ينۆەستيتسيا قۇيىلعان. جاھاندى جايلاعان پاندەمياعا بايلانىستى 2020 جىلى تىكەلەي شەتەلدىك ينۆەستيتسيا (تشي) كولەمى ازايعانىمەن، 2021 جىلى قايتا قالپىنا كەلىپ، 23,7 ملرد دوللاردى قۇراعان. ال وتكەن 2022 جىلى تشي كولەمى 27 ملرد دوللارعا جەتىپ، 17,8%-عا ءوسىم كورسەتكەن. قازىرگى تاڭدا جالپى قۇنى 30 تريلليون تەڭگە بولاتىن 850 ينۆەستيتسيالىق جوبادان تۇراتىن رەسپۋبليكالىق پۋلمەن جۇمىس جۇرگىزىلىپ جاتىر. ينۆەستيتسيالىق ساياساتتىڭ جاڭا تۇجىرىمداماسىنا سايكەس، تشي كولەمىنىڭ جىل سايىنعى اعىنى 2026 جىلعا قاراي 25,5 ملرد دوللارعا جەتۋى ءتيىس.

ينۆەستيتسيالاردىڭ جالپى كولەمىندە تاۋ-كەن سەكتورى ەڭ ۇلكەن ۇلەسكە (30%) يە. وتكەن جىلى سالاعا تارتىلعان جالپى ينۆەستيتسيا كولەمى 4,5 ترلن تەڭگەنى قۇراعان، بۇل 2021 جىلمەن سالىستىرعاندا 14,6%-عا كوپ.
ال وڭدەۋ ونەركاسىبىندە جالپى ينۆەستيتسيا كولەمى 2022 جىلى 1,5 ترلن تەڭگەنى قۇراعان. بۇل 2021 جىلمەن سالىستىرعاندا 5,6%-عا از. بۇل سالاعا سالىنعان ينۆەستيتسيالاردىڭ ۇلەسى دە تومەندەگەن، جىل قورىتىندىسى بويىنشا، نەگىزگى كاپيتالعا سالىنعان ينۆەستيتسيالاردىڭ جالپى كولەمىنىڭ 10%-ىن عانا قۇراعان.

ينۆەستيتسيالاردىڭ جارتىسىنان استامى مەتاللۋرگيا وندىرىسىنە (606 ملرد تەڭگە نەمەسە وڭدەۋ ونەركاسىبىنە ينۆەستيتسيانىڭ جالپى كولەمىنىڭ 40%-ى) جانە حيميا ونىمدەرىن وندىرۋگە (230 ملرد تەڭگە نەمەسە وڭدەۋ ونەركاسىبىنە ينۆەستيتسيانىڭ جالپى كولەمىنىڭ 15%-ى) تارتىلعان.

جىلجىمايتىن مۇلىك سەكتورىنىڭ ينۆەستيتسيالىق كورسەتكىشتەرى 3,1 ترلن تەڭگەگە دەيىن (وتكەن جىلمەن سالىستىرعاندا 15,2%-عا), كولىك جانە قويما شارۋاشىلىعى 1,6 ترلن تەڭگەگە دەيىن (5,4%-عا) جانە اۋىل شارۋاشىلىعى 853,5 ملرد تەڭگەگە (6,7%-عا) دەيىن وسكەن.

جالپى ەكونوميكانىڭ شيكىزاتتىق ەمەس سەكتورلارىنا (مەملەكەتتىك بيۋدجەتتەن ينۆەستيتسيالاردى قوسپاعاندا) ينۆەستيتسيا كولەمى 4,8%-عا وسكەن.
سىرتقى ينۆەستيتسيا كولەمىنىڭ ۇلعايۋىنا الەمدىك گەوساياسي جاعداي، شەتەلدىك الپاۋىت كومپانيالاردىڭ رەسەي نارىعىنان جاپپاي كەتۋى دە وڭ اسەر ەتكەن.
«KAZAKH INVEST» ۇك» اق باسقارۋشى ديرەكتورى ازامات قوجانوۆتىڭ دەرەگىنشە، قازىرگى ۋاقىتتا رەسەي نارىعىنان كەتەتىنىن جاريا ەتكەن نەمەسە ينۆەستيتسيالىق قىزمەتىن توقتاتقان 40-قا جۋىق ەلدىڭ 400-دەن استام كومپانياسىمەن كەلىسىم جاساۋ كوزدەلىپ وتىر.

«62 كاسىپورىنمەن تىعىز جۇمىس جۇرگىزىلپ جاتىر، ونىڭ ىشىندە قازىرگى تاڭدا 24 كاسىپورىن قونىس اۋدارۋ پروتسەسىن اياقتادى. بۇل مۇمكىندىكتى تاعى 17 كومپانيا پايدالانعىسى كەلىپ وتىر. الداعى ۋاقىتتا تاعى وڭدەۋ جانە تاماق ونەركاسىبى، IT, مەتاللۋرگيا، ماشينا جاساۋ سالاسىنداعى تاعى 21 كومپانيا كەلمەك»،-دەيدى قوجانوۆ.

1-ءساۋىر كۇنى قر پرەمەر-ءمينيسترى ءاليحان سمايىلوۆ قازاقستاننىڭ سىرتقى ساۋداسىنىڭ وزەكتى ماسەلەلەرى بويىنشا كەڭەس وتكىزدى. سانكتسيالىق ساياساتتىڭ ەلىمىزدىڭ ساۋدا اعىنىنا اسەرى، ونىڭ ىشىندە ساۋدا قۇرىلىمىنداعى وزگەرىستەر مەن تاۋار جەتكىزۋ لوگيستيكاسى تۋرالى باياندامامەن تانىستى. سمايىلوۆ مەملەكەتتىك ۋاكىلەتتى ورگاندارعا جاعدايدى باقىلاۋدا ۇستاپ، ساۋدا ءتارتىبىن بۇزۋ فاكتىلەرىنە بايلانىستى جەدەل ارەكەت ەتۋدى، سونداي-اق بيزنەس وكىلدەرىنە كەڭىنەن ءتۇسىندىرۋ جۇمىستارىن جۇرگىزۋدى تاپسىردى.

Abai.kz