شەكارا قىزمەتى سەرىك كۇدەباەۆتىڭ ەلدەن قاشىپ كەتكەنىن 27 ناۋرىزدا ءبىر-اق بىلگەن. بۇل تۋرالى ۇلتتىق قاۋىپسىزدىك كوميتەتى توراعاسىنىڭ ورىنباسارى – شەكارا قىزمەتىنىڭ ديرەكتورى ەرلان الداجۇمانوۆ ايتتى.

«سەرىك كۇدەباەۆ مەملەكەتتىك شەكارانى رەسمي وتكىزۋ پۋنكتەرى ارقىلى كەسىپ وتكەن جوق. «كۇدىكتى مەملەكەتتىك شەكارانى زاڭسىز كەسىپ، قىرعىز ەلىنە ءوتتى جانە ول جاقتان ءۇشىنشى ەلگە كەتىپ قالدى» دەگەن اقپاراتتىڭ تۇسۋىنە بايلانىستى شەكاراشىلار مەملەكەتتىك شەكارانى زاڭسىز كەسۋى مۇمكىن جەردى انىقتاۋ ءۇشىن قىزمەتتىك تەكسەرۋ جۇرگىزىپ جاتىر. بۇل جۇمىسقا كورشى ەل دە قوسىلدى. قىرعىز رەسپۋبليكاسىنىڭ شەكارا قىزمەتىنە رەسمي ساۋال جىبەرىلدى. مەنىڭشە، قازىرگى ۋاقىتتا ءبىر نارسە ايتۋعا ەرتە. جۇرگىزىلىپ جاتقان تەكسەرۋدىڭ اياقتالۋىن كۇتۋ قاجەت»، - دەدى ەرلان الداجۇمانوۆ.

ەسكە سالا كەتەيىك، 3 ساۋىردە سەرىك كۇدەباەۆقا حالىقارالىق ىزدەۋ جاريالانعان بولاتىن.

Abai.kz