ءماجىلىس دەپۋتاتى جيگۋلي دايراباەۆتىڭ ۇلدارى ديدار مولداقالىق پەن مارات دايراباەۆقا تاراز قالاسىنىڭ №2 سوتى الاياقتىق جاسادى جانە ءىرى مولشەردە اقشا جىمقىردى دەپ ايىپتاپ، ۇكىم شىعاردى.

ەسكە الا كەتەيىك، جامبىل وبلىستىق اۋىل شارۋاشىلىعى باسقارماسى باسشىسىنىڭ وسىمدىك شارۋاشىلىعى ماسەلەلەرى جونىندەگى ورىنباسارى ەرلان قۇلكەەۆ، كاسىپكەرلەر ەلجان ەلىباي، ديدار مولداقالىق جانە مارات دايراباەۆ سۋبسيديا قاعيدالارىن بۇزا وتىرىپ، «البيون» قۇلپىناي كوشەتتەرىنە مەملەكەتتەن سۋبسيديا العان.

ونىڭ ءبىر بولىگى الاياقتىق جولمەن ۇرلانىپ، جەكە قاجەتتىلىگىنە جۇمسالعان. مەملەكەتكە 550 849 430 تەڭگە كولەمىندە زالال كەلدى.

وسىنىڭ ىشىندە ديدار مولداقالىق پەن مارات دايراباەۆ - ءماجىلىس دەپۋتاتى جيگۋلي دايراباەۆتىڭ ۇلدارى.

سوتتا ايىپتىلاردىڭ كىناسى تولىق دالەلدەندى.

ءوز كەزەگىندە سوتتالۋشىلار كىناسىن مويىنداماي، اقتاۋدى ءوتىندى.

باسقارما باسشىسىنىڭ ورىنباسارى ەرلان قۇلكەەۆ 6 جىلعا سوتتالدى، ول ءومىر بويى مەملەكەتتىك قىزمەتتە ەڭبەك ەتە المايدى.

ال ديدار مولداقالىق پەن مارات دايراباەۆ 5 جىلعا شارتتى تۇردە سوتتالدى.

Abai.kz