قر ۇلتتىق مۋزەيىنىڭ ەكس-ديرەكتورى ارىستانبەك مۇحامەديۇلىنىڭ ءىسى استانا قالاسىنىڭ بايقوڭىر اۋداندىق سوتىندا قارالادى.

«بايقوڭىر اۋداندىق №2 سوتى بيۋدجەت قاراجاتىن تالان-تاراجعا سالۋ ايىبى تاعىلعان ا. مۇحامەديۇلى، ا. نۇرازحان، ا. كوشەنوۆ جانە ا. سادۋاقاسوۆانى ايىپتاۋ بويىنشا قىلمىستىق ءىستى وندىرىسكە الدى. اتالعان قىلمىستىق ءىس بويىنشا باستى سوت تالقىلاۋى اشىق سوت وتىرىسىندا 2023 جىلعى 17 ءساۋىر كۇنى ساعات 10:00-گە بەلگىلەنگەن»، - دەلىنگەن استانا قالالىق سوتىنىڭ ءباسپاسوز قىزمەتى تاراتقان اقپاراتتا.

ەسكە سالساق، 2022 جىلعى 29 مامىردا ارىستانبەك مۇحامەديۇلى بيۋدجەت قاراجاتىن جىمقىردى دەگەن كۇدىكپەن قاماۋعا الىندى.

انتيكور ۇلتتىق مۋزەيدىڭ بۇرىنعى باسشىسىنا «التىن ادامنىڭ الەم مۋزەيلەرىنە شەرۋى» حالىقارالىق كورمەسىن وتكىزۋ جونىندەگى مەملەكەتتىك ساتىپ الۋ تۋرالى شارت اياسىندا 146 ميلليون تەڭگە سوماسىندا بيۋدجەت قاراجاتىن جىمقىردى دەگەن ايىپ تاقتى.

ارىستانبەك مۇحامەديۇلى 2019 جىلدىڭ شىلدەسىندە مۋزەي ديرەكتورى بولدى. وعان دەيىن بەس جىل مادەنيەت جانە سپورت مينيسترلىگىن باسقارعان.

ارىستانبەك مۇحامەديۇلىنا قاتىستى تەرگەلىپ جاتقان قىلمىستىق ىستەر بويىنشا مەملەكەتكە كەلتىرىلگەن زالالدىڭ سوماسى 7 ميلليارد تەڭگەنى قۇراعان.

Abai.kz