اتىراۋدىڭ اتموسفەرالىق اۋاسىندا كۇكىرتتى سۋتەگى شەكتى نورمادان 20 ەسەگە ارتقان.

وبلىستىق ەكولوگيا دەپارتامەنتى ءباسپاسوز قىزمەتىنىڭ مالىمەتىنشە، اۋا ساپاسى 34 ستانسادان باقىلانادى. ونىڭ ىشىندە «قازگيدرومەت» اق وڭىرلىك فيليالىنىڭ بالانسىندا – 11, اتىراۋ مۇناي وڭدەۋ زاۋىتىنا تيەسىلى – 4, «نورت كاسپيان وپەرەيتينگ كومپاني» كومپانياسىنىڭ يەلىگىندە 19 ستانسا بار.

كەيىنگى بىرنەشە تاۋلىكتە اتموسفەرالىق اۋادا كومىرتەگى مەن ازوت ديوكسيدى، كۇكىرتتىڭ جوعارى مولشەرى ءجيى انىقتالعان. ماسەلەن، اتىراۋ قالاسىنداعى «شاعالا» ستانساسىندا وتكەن تاۋلىكتە كۇكىرتتى سۋتەگىنىڭ مولشەرى ءبىر تەكشە مەترگە 22,6 مكگ بولىپ تىركەلگەن. بۇل – رۇقسات ەتىلگەن شەكتى نورمادان 20 ەسە كوپ.

مۇنداي دەرەكتىڭ تىركەلۋى ءبىرىنشى رەت ەمەس. وبلىستىق ەكولوگيا دەپارتامەنتى باسشىسىنىڭ ورىنباسارى سىرىم تىلەگەنوۆتىڭ دەرەگىنە جۇگىنسەك، اۋاداعى جاعىمسىز ءيىس 24 ناۋرىزدا بىلىنە باستاعان.

ال، «قازگيدرومەت» رمك ءباسپاسوز قىزمەتى اتىراۋدا كۇن سايىن دەرلىك اۋا ساپاسىنىڭ ناشارلايتىنىن حابارلاپ وتىر. بۇعان قولايسىز مەتەورولوگيالىق جاعدايلار، اتاپ ايتقاندا اتموسفەرالىق اۋانىڭ بەتكى قاباتىندا زياندى (لاستاۋشى) زاتتاردىڭ شوعىرلانۋىنا ىقپال ەتەتىن قىسقامەرزىمدى مەتەوفاكتورلار اسەر ەتەدى. ونىڭ ىشىندە تىمىق اۋا رايى، جەڭىل جەل، تۇمان، ينۆەرسيا جيىنتىعى بار.

مامانداردىڭ پىكىرىنە سۇيەنسەك، اتموسفەرالىق اۋادا كۇكىرتتى سۋتەك بولماۋى ءتيىس. اۋاداعى كۇكىرتتى سۋتەگىنىڭ كوپ مولشەرى باس جانە جۇرەك اينۋىن تۋىنداتادى.

ەسكە سالا كەتەلىك، بۇعان دەيىن اتىراۋ تۇرعىندارى اۋاداعى ساسىق يىسكە شاعىمدانعانىن جازعان ەدىك.

ءوڭىر ەكولوگتەرى اتىراۋ اۋاسىندا كۇكىرتتى سۋتەك شەكتى نورمادان اسىپ كەتكەنىن انىقتادى.

كاسپي جاعالاۋىندا جانعان قامىس ءتۇتىنى اتىراۋدى باسىپ قالدى. وسىعان بايلانىستى اتىراۋلىق تۇرعىن كوشەگە گازدان قورعايتىن ماسكا كيىپ شىقتى.

جاعالاۋداعى قامىس ءورتى 5 كۇننەن سوڭ ءسوندىرىلدى.

Abai.kz