ءماجىلىس دەپۋتاتى كونستانتين اۆەرشين قازاقستان قارۋلى كۇشتەرى تۋرالى شىنايى اقپارات تاراتۋ ءۇشىن جۋرناليستەر مەن بلوگەرلەردى ەرىكتى تۇردە اسكەرگە شاقىرۋدى ۇسىندى، دەپ حابارلادى Halyq Uni .

ول دەپۋتاتتىق ساۋالىن قورعانىس ءمينيسترى رۋسلان جاقسىلىقوۆقا جولدادى.

بۇگىندە قازاقستان قارۋلى كۇشتەرى تۋرالى ءارتۇرلى پىكىر بار. جاعداي شيەلىنىسىپ تۇر. وكىنىشكە قاراي، مۇنى اسكەري بورىشىن وتەمەگەن، اسكەري سالاعا قاتىسى جوق «ديۆان ساراپشىلارى» ايتادى. بۇل ماسەلەگە جاۋاپكەرشىلىكپەن قاراپ، بوس سوزگە جول بەرۋگە بولمايدى. سونداي-اق حالىق قازاقستان قارۋلى كۇشتەرىندەگى ءىستىڭ جايىنان جاقسى حاباردار بولۋعا ءتيىس. بۇل ۇلتتىق قاۋىپسىزدىكپەن جانە اسكەرگە شاقىرۋشىلاردىڭ ءومىرى مەن دەنساۋلىعىنا تىكەلەي بايلانىستى. سەبەبى، ولار دا بىرەۋدىڭ بالاسى، اعاسى مەن تۋىسى، - دەدى دەپۋتات ءماجىلىستىڭ جالپى وتىرىسىندا.

كونستانتين اۆەرشيننىڭ پىكىرىنشە، اسكەر تۋرالى شىنايى اقپارات تاراتقىسى كەلەتىن باق وكىلدەرىن ەرىكتى تۇردە اسكەرگە شاقىرۋ كەرەك.

قورعانىس مينيسترلىگىمەن بىرلەسىپ، «قازاقستاننىڭ جالپىعا بىردەي اسكەري مىندەت جانە اسكەري قىزمەت تۋرالى» زاڭىنا سايكەس (كەيىنگە قالدىرۋ نە باسقا دا نەگىزدەر بويىنشا) اسكەري بولىمدەردە ءتيىستى اسكەري-دارىگەرلىك كوميسسيانى وتكەننەن كەيىن اسكەرگە شاقىرىلماعان ازاماتتادى مەرزىمدى اسكەري قىزمەت وتەۋ شارتتارى نەگىزىندە ەرىكتى تارتىپپەن اسكەردە (1-3 اي) بولۋ مۇمكىندىگىن پىسىقتاۋ كەرەك. بۇل شارا اسكەري قىزمەت تۋرالى شىنايى اقپارات تاراتقىسى كەلەتىن مۇددەلى تۇلعالارعا: بلوگەرلەر، جۋرناليستەر، قوعامدىق پىكىر كوشباسشىلارىنا مۇمكىندىك بەرىپ، ولار اسكەردىڭ اتموسفەراسىن سەزىنە الادى. قوعامعا قازاقستان قارۋلى كۇشتەرى قاتارىنان رەپورتاجدار ۇسىنىلادى، - دەدى ول.

ونىڭ پىكىرىنشە، بۇل بارلىق نيەت بىلدىرۋشىگە، ناعىز پاتريوتتارعا ەلدىڭ قورعانىس قابىلەتىن نىعايتۋعا ءوز ۇلەسىن قوسۋعا مۇمكىندىك بەرەدى.

ولار اسكەري قىزمەتتىڭ بارلىق قيىندىعى مەن اۋىرتپالىعىن سەزىنەتىن بولادى. مەنىڭ ويىمشا، بۇل ولاردىڭ دۇنيەتانىمىن وزگەرتەدى. وسىلايشا، اسكەري قىزمەت تۋرالى اقپارات تاراتاتىن تۇلعالاردىڭ جاۋاپكەرشىلىگى دە ارتادى. سونداي-اق بۇل شارا قانداي دا ءبىر جاعدايعا بايلانىستى وتان الدىنداعى بورىشىن وتەمەگەن، قولىنا اۆتومات ۇستاماعان ادامدارعا العاشقى اسكەري دايىندىقتان وتۋگە مۇمكىندىك بەرەدى، - دەدى كونستانتين اۆەرشين.

ءسوز سوڭىندا ول مينيستر رۋسلان جاقسىلىقوۆتان بۇل ماسەلەنى نازارعا الۋدى سۇرادى.

«قورعانىس مينيسترلىگىنە وسى ماسەلەنى قاراۋدى، نورماتيۆتىك-قۇقىقتىق اكتىلەرگە، قورعانىس مينيسترلىگىنىڭ بۇيرىقتارىنا ءتيىستى وزگەرىستەر ەنگىزۋ تۋرالى ۇسىنىستار دايىنداۋدى، قاجەت بولسا، ازاماتتاردىڭ اسكەري جيىنداردان وتۋىنە قاتىستى جاڭا بۇيرىقتار ازىرلەۋدى ۇسىنامىن»، - دەدى دەپۋتات.

Abai.kz