2023 جىلعى 1 ناۋرىزداعى جاعداي بويىنشا بىرىڭعاي جيناقتاۋشى زەينەتاقى قورىنداعى سالىمشىلار جيناعىنىڭ جالپى سوماسى 15,1 ترلن تەڭگەگە جەتتى.

Ranking.kz پورتالىنىڭ دەرەگىنشە، بىلتىرعى وسى ۋاقىتپەن سالىستىرعاندا زەينەتاقى جيناقتارىنىڭ كولەمى بىردەن 11,4 پايىزعا نەمەسە 1,5 ترلن تەڭگەگە ءوستى. كورسەتكىشتىڭ ءوسۋى جارنالار تۇرىندەگى كىرىس اعىندارى، سونداي-اق ينۆەستيتسيالىق كىرىس ەسەبىنەن قالىپتاستى.

جيناقتاردىڭ ءوسۋى جارنالاردىڭ بارلىق تۇرلەرى بويىنشا بايقالادى. وسىلايشا، مىندەتتى زەينەتاقى جارنالارى بويىنشا جيناق كولەمى 11,1 پايىزعا ارتىپ، 14,7 ترلن تەڭگەگە جەتتى. بۇل قازاقستاندىقتاردىڭ بارلىق جيناقتارىنىڭ 97 پايىزىن قۇرايدى.

مىندەتتى كاسىپتىك زەينەتاقى جارنالارى بويىنشا زەينەتاقى جيناقتارى ءبىر جىلدا 21 پايىزعا ارتىپ، 466,4 ملرد تەڭگەگە جەتتى. بۇل رەتتە ەڭ كوپ ءوسىم (2 ەسەدەن استام) 3,8 ملرد تەڭگەنى قۇراعان ەرىكتى زەينەتاقى جارنالارى بولدى.

وڭىرلەر بويىنشا زەينەتاقى جيناقتارىنىڭ ەڭ كوپ مولشەرى الماتىدا - 2,8 ترلن تەڭگە نەمەسە رەسپۋبليكاداعى جالپى كولەمنىڭ 18,5 پايىزى. ودان كەيىن استانا - 1,4 ترلن تەڭگە. ۇزدىك ۇشتىكتى قاراعاندى وبلىسى تۇيىندەدى - 1,2 ترلن تەڭگە.

زەينەتاقى جيناقتارىنىڭ كولەمى بويىنشا كوش باستاعان بەس ايماققا شىمكەنت (1,2 ترلن تەڭگە) قالاسى مەن شىعىس قازاقستان وبلىسى (832,5 ملرد تەڭگە) دا كىردى.

Abai.kz