شىعىس قازاقستان وبلىسىنىڭ اكىمى دانيال احمەتوۆ بيىل قىركۇيەكتە ريددەردەگى جەو جۇمىسى قالىپقا كەلتىرىلەتىنىنە ۋادە بەردى، - دەپ حابارلايدى Tengrinews.kz.

بۇل تۋرالى ايماق باسشىسى جەرگىلىكتى جۋرناليستەرمەن كەزدەسۋدە ايتتى. دانيال احمەتوۆ جىلۋ ورتالىعى جاڭا قوجايىندارىنىڭ ءىس-ارەكەتىندە ناقتى نە قاناعاتتاندىرماعانىنا دا جاۋاپ بەردى.

"بۇل كومپانيانىڭ قارىزى 3,3 ميلليارد تەڭگە. ولار جارىق ءۇشىن دە، زاۋىت ءۇشىن دە، مازۋت ءۇشىن دە تولەمەيدى، جۇمىسشىلارعا جالاقى بەرمەيدى - ولار مۇلدەم ەشتەڭە جاسامايدى. جەو-نىڭ بۇرىنعى يەلەرى دە تولەمەگەن. ءبىز قازىرگىلەردىڭ ار-ۇجدانى بولار دەپ كۇتتىك، بىراق ولار دا سونداي، ءتىپتى ودان دا جامان", - دەدى دانيال احمەتوۆ.

بۇگىندە جىلۋ ەلەكتر ورتالىعىنا كومىر جەتكىزۋدى وسكەمەننىڭ جىلۋ جەلىلەرى جۇزەگە اسىرادى، ولار مازۋتپەن دە قامتاماسىز ەتەدى. قالانى جىلۋمەن قامتۋ ءۇشىن الدىن الا تولەم جاسالعان.

"سوتقا 2,7 ميلليارد تەڭگەگە تالاپ-ارىز بەردىك. زاڭ تالابىنا ساي شارالاردى جالعاستىرامىز. بار بەرەشەك ەسەبىنەن جەو مۇلكىنە تىيىم سالىندى، ول كوممۋنالدىق مەنشىككە وتەدى. قىركۇيەكتىڭ ورتاسىنا قاراي ستانتسيانى قالىپتى جاعدايعا كەلتىرەتىنىمىزگە سەنىمدىمىن", - دەدى دانيال احمەتوۆ.

ونىڭ ايتۋىنشا، قازىرگى ۋاقىتتا كاسىپورىنعا باسشىلار مەن ينجەنەرلىك كادرلار ىرىكتەلىپ جاتىر. احمەتوۆتىڭ ايتۋىنشا، بيلىك جەو-نى باسقارۋدى ءوز قولىنا العان، ونىڭ ۇستىنە، جىلۋ ورتالىعى كومىرمەن جانە مازۋتپەن قامتاماسىز ەتىلگەن، جىلۋ ءۇشىن اۆانستىق تولەم بار، اقپان بويىنشا قىزمەتكەرلەرگە جالاقى قارىزى جابىلعان.

ايماق باسشىسى جاعدايدى شىنايى باعالايتىنىن جانە جاڭا جىلۋ بەرۋ ماۋسىمىنىڭ باستالۋىنا از عانا ۋاقىت قالعانىن تۇسىنەتىنىن، سوندىقتان جەو-نى جوندەۋ ءۇشىن قاۋىرت جۇمىس ىستەۋگە تۋرا كەلەتىنىن اتاپ ءوتتى.

Abai.kz