بىلتىر مامىر ايىندا قاماۋعا الىنعان ارىستان مۇحامەديۇلىن 28 مامىردا سوت سانكتسياسىمەن قاماۋدا ۇستاۋ تۇرىندەگى بۇلتارتپاۋ شاراسى تاعايىندالعان ەدى.

سىبايلاس جەمقورلىققا قارسى قىزمەت «الەم مۇراجايلارى بويىنشا التىن ادام شەرۋى» حالىقارالىق كورمەسىن وتكىزۋ بويىنشا مەملەكەتتىك ساتىپ الۋ تۋرالى شارت شەڭبەرىندە 146 ميلليون تەڭگە مولشەرىندە بيۋدجەت قاراجاتىن جىمقىرۋ دەرەگىنە قاتىستى ۇلتتىق مۋزەيدىڭ لاۋازىمدى تۇلعالارىنا جانە باسقا دا ادامدارعا قاتىستى تەرگەۋدى باستادى.

شىلدەدە سىبايلاس جەمقورلىققا قارسى قىزمەت اگەنتتىگى وكىلدەرى ۇلتتىق مۋزەيدىڭ بۇرىنعى باسشىلىعىنا جانە باسقا دا ادامدارعا قاتىستى 2017-2018 جىلدارى «اقپاراتتىق رەسۋرستاردا نىسانداردى تانىمال ەتۋ ءۇشىن جالپىۇلتتىق تىزبەگە ەنگىزىلگەن نىسانداردىڭ 3D-مودەلدەرىن قۇرۋ» جوباسىن ىسكە اسىرۋ كەزىندە اسا ءىرى مولشەردە بيۋدجەت قاراجاتىن ۇرلاۋ دەرەگى بويىنشا تەرگەۋ جۇرگىزىلىپ جاتقانىن مالىمدەدى. رەسمي دەرەكتەر بويىنشا، تەرگەلىپ جاتقان قىلمىستىق ىستەر بويىنشا مەملەكەتكە كەلتىرىلگەن زالالدىڭ الدىن الا سوماسى شامامەن 7 ميلليارد تەڭگە بولادى.

بيىل قاڭتاردا بۇل ىسكە قاتىستى جاڭا دەرەكتەر اشىلىپ، ۇلتتىق مۋزەي ديرەكتورىنىڭ بۇرىنعى ورىنباسارى الماز نۇرازحاننىڭ دا تۇتقىندالعانى بەلگىلى بولدى. ال بيىل اقپان ايىندا ارىستانبەك مۇحامەديۇلىن قاماۋدا ۇستاۋ مەرزىمى ەكى ايعا ۇزارتىلعان.

سوت وتىرىسى استانا قالاسىندا بايقوڭىر اۋداندىق №2 سوتىندا ءوتىپ جاتىر. ءىستى سۋديا باعلان ىدىرىسوۆ قارايدى. ارىستانبەك مۇحامەديۇلى سوت وتىرىسىنا №64 مەكەمەدەن ونلاين رەجيمدە قاتىسادى.

«بۇگىن سوتتالۋشى اۋا رايىنا بايلانىستى ونلاين قاتىسادى، كەيىن وفلاين رەجيمدە قاتىسادى»، – دەدى سۋديا ب. ىدىرىسوۆ.

Abai.kz