ەلىمىزدە 3-كلاستى بيداي باعاسى تونناسىنا 91 مىڭ تەڭگەگە دەيىن ءوستى. 2-كلاستى بيدايدىڭ قۇنى 93 مىڭ 200 تەڭگە، 1-كلاستى بيدايدىڭ قۇنى 95 مىڭ 500 تەڭگەگە جەتتى، دەپ حابارلايدى Ulysmedia.kz.

«اپك ءنوۆوستيدىڭ» جازۋىنشا، 3-كلاستى بيداي ءبىر اپتا ىشىندە 1500 تەڭگەگە قىمباتتادى: 10 ساۋىردە 1 تونناسى 89500 تەڭگە تۇرسا، 18 ساۋىردە 91000 تەڭگە بولدى. ايتا كەتۋ كەرەك، 8 ساۋىردە ونىڭ قۇنى 87500 تەڭگە بولعان، ال ودان بۇرىن –  29 ناۋرىزدان 4 ساۋىرگە دەيىن 85500 تەڭگە دەڭگەيىندە ساقتالدى.

2-كلاستى بيداي 1200 تەڭگەگە قىمباتتادى جانە قازىر 1 تونناسى 93200 تەڭگە تۇرادى. 1-كلاستى بيداي باعاسى 1000 تەڭگەگە ءوستى – بۇگىن ونىڭ 1 تونناسى 95500 تەڭگەگە ساتىلىپ جاتىر.

ايتا كەتەيىك، ءبىر اپتا بۇرىن قازاقستان بيلىگى  رەسەيدىڭ ارزان استىعىن ەلگە اۆتوكولىكپەن اكەلۋگە التى ايعا تىيىم سالۋ تۋرالى شەشىم قابىلدادى. بۇل جەرگىلىكتى فەرمەرلەر ءۇشىن بيداي باعاسىن كوتەرۋ ماقساتىندا جاسالدى. حابارلانعانداي، وتكەن اپتادا قاتتى سۇرىپتى ساپالى بيدايدىڭ 1 تونناسى ءۇشىن 87 مىڭ تەڭگە ۇسىنىلدى. قويمالاردا ونداعان مىڭ توننا استىق جاتقانىنا قاراماستان، فەرمەرلەر ءونىمدى ساتۋعا اسىقپادى.

Abai.kz